Elçin Mirzəbəylinin “Xüsusi təyinatlı” marşının təqdimatı keçirildi - FOTO - VİDEO

İyulun 30-da Əməkdar jurnalist Elçin Mirzəbəylinin Xüsusi Təyinatlı Qüvvələrə həsr etdiyi “Xüsusi təyinatlı” marşının təqdimat mərasimi keçirilib.

Avrasiya.net xəbər verir ki, Beynəlxalq Avrasiya Mətbuat Fondunda (BAMF) keçirilən tədbirdə tanınmış ictimaiyyət və media nümayəndələri iştirak edib.

Tədbiri giriş sözü ilə açan BAMF prezidenti Umud Mirzəyev qeyd edib ki, marşın yazılması xüsusi təyinatlarımızın fəaliyyətinin önəmini özündə əks etdirir: "İnanıram ki, bu marş Xüsusi Təyinatlı Qüvvələrin ən sevimli marşına çevriləcək".

Elçin Mirzəbəyli isə bildirib ki, “Xüsusi təyinatlı” marşının sözləri və müəllifi özünə, aranjimanı Fərahim Sadiqə məxsusdur:

“Məşhur “Azadlıq marşı”nı hələ 1988-ci ildə, 21 yaşımda yazmışdım. Təxminən 1 il öncə Şuşada idim. O zaman “Azadlıq marşı”ndan söz düşdü və söz verdim ki, xüsusi təyinatlılar üçün də marş yazım. Bir müddət sonra Qeyri-Hökumət Təşkilatlarına Dövlət Dəstəyi Agentliyinin dəstəyi ilə bu marşı ərsəyə gətirdik”.

Elçin Mirzəbəyli qeyd edib ki, marş iki variantda yazılıb, ikinci variantda bəzi sözlər dəyişdirilib.

Daha sonra tədbir iştirakçılarına “Xüsusi təyinatlı” marşı iki variantda təqdim olunub.