Zəfər Günü ilə bağlı bir qrup müharibə iştirakçısı və gənclə görüş keçirilib
8 Noyabr - Zəfər Günü ilə əlaqədar şəhid ailələri, Vətən Müharibəsi iştirakçıları və bir qrup rayon gənci ilə görüş keçirilib.
Avrasiya.net xəbər verir ki, tədbirdə Şabran rayon İcra Hakimiyyətinin başçısı Asif Hüseynov, YAP Şabran rayon təşkilatının sədri Mehdi Balabəyov,rayonun hüquq-mühafizə orqanlarının rəhbərləri, müharibə veteranları və rayon ictimaiyyəti iştirak edib.
Tədbiri giriş sözü ilə açan Asif Hüseynov bildirdi ki, ötən əsrin sonlarında Ermənistanın Azərbaycanın tarixi torpaqlarına ərazi iddiaları ilə başlayan hərbi təcavüzü ərazilərimizin işğalı ilə nəticələnmiş, itirilmiş torpaqlarımızın danışıqlar yolu ilə həllinə otuz il ərzində nail olunmamış, əksinə, mənfur düşmən ölkəmizə qarşı təxribatlarını daha da intensivləşdirmişdi.
Ermənistanın artan hərbi təxribatlarına cavab olaraq 2020-ci il sentyabrın 27-də əks-hücum əməliyyatları ilə başlayan Vətən müharibəsi Azərbaycan torpaqlarının azad edilməsi üçün yeni mərhələnin başlanğıcı oldu. Bu, həm də Azərbaycan xalqının torpaqların qaytarılması arzusundan irəli gəlirdi.
Prezident, Müzəffər Ali Baş Komandan İlham Əliyevin rəhbərliyi ilə müharibənin ilk günlərindən tarixi torpaqlarımızı, strateji ərazilərimizi və yüksəkliklərimizi işğaldan azad edən rəşadətli Azərbaycan Ordusu daha da ruhlanaraq 44 gün ərzində Qarabağ torpaqlarında mərdliklə vuruşaraq əsl qəhrəmanlıq dastanı yazdı. Döyüş meydanında şanlı tarix yazan Azərbaycan Ordusu ermənilərin 30 il ərzində qurduğu istehkamları qısa müddətdə darmadağın edərək uğurlu əks-həmlə əməliyyatları ilə 8 Noyabr - Zəfər Gününə gedən yolu günbəgün yaxınlaşdırırdı. Azərbaycanın hərb sahəsində qazandığı qələbələr, xüsusilə Şuşanın düşmən əsarətindən qurtarılması əməliyyatı müharibənin taleyində həlledici rol oynadı.
Beləliklə, yağı düşmən üzərində cəmi 44 gün ərzində şanlı Qələbə çalan Azərbaycan xalqı özünün qalib xalq olduğunu bütün dünyaya sübut etdi.
Daha sonra Şabran rayon İcra Hakimiyyəti başçısının müvafiq Sərəncamı ilə mükafatlandırılmış rayonun ictimai-siyasi həyatında fəal iştirak edən bir qrup müharibə veteranı və rayon gəncinə Fəxri Fərmanlar təqdim olunub.