Siyəzəndə 26 İyun Silahlı Qüvvələr gününə həsr olunmuş tədbir keçirilib
İyunun 24-də Siyəzən Rayon Gənclər və İdman İdarəsinin təşkilatçılığı ilə 26 İyun Silahlı Qüvvələr gününə həsr olunmuş tədbir keçirilib.
Gənclər Mərkəzində təşkil olunan görüşdə Vətən müharibəsi iştirakçıları, qazilər, şəhid ailərinin üzvləri, Siyəzən Rayon İcra Hakimiyyətinin məsul işçiləri və gənclər iştirak ediblər.
Tədbirdə ilk öncə torpaqlarımızın azadlığı uğrunda canından keçmiş şəhidlərimizin əziz xatirəsi bir dəqiqəlik sükutla yad edilib. Daha sonra Gənclər və İdman İdarəsinin rəisi Nadir Məmmədov, Qarabağ Müharibəsi Əlilləri, Veteranları və Şəhid Ailələri İctimai Birliyinin Siyəzən rayon təşkilatının sədri Nəbi Əliyev, Vətən müharibəsi iştirakçısı, şəhər 3 saylı tam orta məktəbin Hərbi rəhbəri İlkin İlyasov və digərləri tədbirdə çıxış edərək görüş iştirakçılarını Silahlı Qüvvələr günü münasibəti ilə təbrik ediblər. 
Çıxışlarda bildirilib ki, məhz Azərbaycan Ordusunun igid əsgər və zabitlərinin qəhrəmanlığı nəticəsində Vətən müharibəsində böyük Qələbə qazanıldı, ərazi bütövlüyümüz təmin edildi. Xalqımızın Vətən müharibəsində möhtəşəm Qələbə əldə etməsində Ali Baş Komandan cənab İlham Əliyevin sərkərdəlik qabiliyyəti, onun rəhbərliyi altında səriştəli hərbi planlaşdırma, döyüş əməliyyatlarının hərtərəfli hazırlanması, əsgər və zabitlərimizin yüksək əhvali-ruhiyyəsi və döyüş hazırlığı, Ordu ilə xalq birliyi, inkişaf etmiş hərbi-sənaye kompleksi, güclü və çoxşaxəli iqtisadiyyat misilsiz rol oynadı. 
Belə görüşlərin keçirilməsində də əsas məqsəd Vətən müharibəsi iştirakçılarının cəmiyyətə tanıdılması, Vətən müharibəsinin tarixi əhəmiyyətinin gənc nəsil arasında təbliği, gənclərin vətənpərvərlik ruhunda tərbiyəsi işinin gücləndirilməsidir.
Çıxışlardan sonra tədbirdə məktəblilər tərəfindən vətənpərvərlik mövzusunda şeirlər səsləndirilmiş, Silahlı Qüvvələr gününə həsr olunmuş videoçarx nümayiş etdirilmişdir. 
#SilahlıQüvvələrgünü #VətənMüharibəsi #Zəfər #Qələbə #QarabağAzərbaycandır #DəmirYumruq #SiyəzənGİİ #AZEyouth #AZEgənc #Gənclərİdman
