Sumqayıtın baş memarının mülkləri – Siyahı/Foto

Sumqayıt şəhər Memarlıq və Tikinti şöbəsinin müdiri - baş memar Adil Xudadatovla bağlı rəsmi qurumlara şikayət edilib.

Axar.az xəbər verir ki, bu barədə Sumqayıtda fəaliyyət göstərən sahibkarlar məlumat verib.

Məlumata görə, baş memarın öz səlahiyyətlərini aşması, qanunsuz tələbetmələr, öz maraqlarına görə bəzi iş adamlarına süni maneələr yaratması, eyni zamanda tikinti-arxitektura qaydalarını kobud şəkildə pozması ənənə halını aldığından artıq ciddi narazılığa səbəb olub.

Şikayətçilər iddia edir ki, A.Xudadatov hətta bəzən Sumqayıt şəhər İcra Hakimiyyəti başçısı adından da sərəncamlar verir, Dövlət Şəhərsalma və Arxitektura Komitəsinin səlahiyyətlərini mənimsəyir:

“Baş memar bu əməllərini daha çox icra başçısı səhhəti ilə bağlı məzuniyyətdə olduğu vaxtlarda həyata keçirir. Tikinti işlərinə nəzarətin gücləndirilməsinə, bu səlahiyyətin Dövlət Şəhərsalma və Arxitektura Komitəsinə verilməsinə baxmayaraq, A.Xudadatov hansısa yollarla bu əməllərini davam etdirir. Yəni onun icazəsi olmadan heç kim Sumqayıtda daşı daş üstünə qoya bilməz”.

İddia olunur ki, Sumqayıt şəhərində aparılmış bütün qanunsuz tikintilərə “icazəni” birbaşa A.Xudadatov verir. Hətta özünün səlahiyyəti çatmadığı tikinti işlərinə də müdaxilə etmək, icazə almaq kimi məsələləri də yalnız baş memar həll edir. Yəni sistem elə qurulub ki, baş memarın şifahi və yaxud da yazılı rəyi olmadan Sumqayıtda iş görmək müşkülə çevrilib.

A.Xudadatovun adı həm də köhnə binaları zədələyərək, əlavə qapıların açılması, yaşayış binalarının birinci mərtəbələrinin obyektlərə çevirmək üçün konstruksiya dəyişiklilərində də hallanır. Bu da bəzən ikinci, üçüncü mərtəbələrdə yaşayan sakinlərin haqlı narazılıqlarına səbəb olur. Çünki konstruksiya dəyişikliləri bəzən köhnə binaların zədələnməsinə, yük saxlamaq gücünün zəifləməsinə səbəb olur. Və yaxud da bu kimi dəyişikliklər nəticəsində açılan obyektlər yaşayış binasının funksiyası ilə tərs-mütənasiblik təşkil edir. Belə olan halda da bina sakinlərinin narazılıqları baş qaldırır.

Baş memarın bu fəaliyyəti onu zəngin bir adama çevrib.

İddia olunur ki, o özünün və yaxınlarının adına rəsmiləşdirilmiş milyonluq daşınmaz əmlaklara sahibdir.

Şikayətçilər A.Xudadatova məxsus olan obyektlərin siyahısını və fotolarını da göndəriblər.

Onların bəzilərini təqdim edirik:

1. Bakı şəhəri, 28 May küçəsi, “Neptun” marketin üstündə yerləşən mənzillər;

2. AAFF Yaşayış Kompleksində mənzillər;

3. Sumqayıt şəhəri, 21-ci məhəllədə villalar;

4. Sumqayıt Memarlıq İdarəsinin qarşısındakı 14 mərtəbəli binanın yaxınlığında yeni tikilən 4 mərtəbəli bina;

5. Yenə eyni ünvanda “Repaprik Pab” (icarədə);

6. 43-cü məhəllədə “Kammet” klinikasının yanında tikilməkdə olan 5 mərtəbəli bina;

7. Sumqayıt şəhəri, 11-ci mikrorayonda yerləşən mebel mağazası (icarədə);

8. Sumqayıt şəhəri, 6-ci mikrorayonda yerləşən “Taxılçı” restoranı və onun yanında “Təndir evi” (icarədə);

9. Sumqayıt şəhəri, 10-cu mikrorayonda yerləşən bir neçə mağaza;

10. Sumqayıt şəhəri 17-ci mikrorayonda yerləşən “5 fəsil” adlanan 4 mərtəbəli qeyri-yaşayış sahəsi…

A.Xudadatov Bakupost.az-a açıqlamasında bildirib ki, deyildiyi sayda olmasa da, müəyyən qədər daşınmaz əmlaka sahibdir:

“Mən kasıb adam deyiləm. Bir neçə obyektim var. Amma onlar mənim səlahiyyətlərimdən istifadə və ya hansısa korrupsiya əməliylə əldə olunan mülklər deyil. Mən bu sahədə işləməzdən əvvəl bizneslə məşğul olmuşam. Onlar da həmin vaxt alınıb. Sumqayıtda çox obyektlər mənim adıma çıxılır. Bunlar yalan söhbətlərdi. Bilirsiz, mən bu şəhərdə böyümüşəm, dost-tanışlar çoxdu. Kimsə nəsə tikmək istəyəndə məndən xahiş edir ki, onlara kömək edim.

Mən də imkan qədər kömək edirəm, icazə üçün aidiyyəti qurumlara müraciət edirəm. Həmin qurumlar da elə bilir ki, öz obyektimdi. Beləliklə, həmin obyektlərin mənə məxsus olmasıyla bağlı şayiələr başlayır. Amma həqiqəti sübut etmək çətin deyil. Kim istəyir gəlsin, sübut edim ki, hansı obyekt kimə məxsusdu. İndi bir dördmərtəbəli obyekt tikilir. Guya ki, mənimdi. Onun bütün sənədləri var: Fövqəladə Hallar Nazirliyindən keçib, Şəhərsalma və Arxitektura Komitəsinin icazəsi və s. bütün sənədlər qaydasındadır. Həmin tikinti də əmimin yoldaşının adınadır. Əmimin yoldaşı Reyhan Verdiyeva sahibkardır. Həmin obyekti 30 ildir əmim alıb, 3 mərtəbəli tikilidir... İndi mən bu vəzifədə çalışıram deyə, əmim öz qanuni yerində nəsə tikməsin?”

A.Xudatov qanunsuz tikintilərə icazə ilə bağlı iddialara da münasibət bildirib:

“Bunlar hamısı boş iddialardır. İndi təkcə icra başçısının, şəhər memarının icazəsi ilə tikinti aparılmır. Bu məsələdə Şəhərsalma Komitəsi ilə İcra Hakimiyyəti birgə işləməlidir. Yəni sənədlər ilkin olaraq İcra Hakimiyyətinin Memarlıq şöbəsindən Şəhərsalmaya göndərilir, əgər tikiləcək ev və yaxud da obyekt tələblərə zidd deyilsə, təsdiqlənir.

Bəzən vətəndaşlar heç bir müraciət etmədən tikintiyə başlayır. İcra Hakimiyyəti sərəncamı yalnız tikintinin layihələndirilməsi üçün verir. Vətəndaşlar layihələndirmə ilə tikintiyə sərəncamı düzgün başa düşmür. İcra hakimiyyətlərinin tikintiyə icazə vermək ixtiyarı yoxdur. Tikintiyə nəzarət funksiyasını yalnız Sumqayıt şəhər İcra Hakimiyyəti yanında Memarlıq İdarəsi həyata keçirir.

Planın çıxarışı varsa, sənədləri hazırlayırıq. Layihəyə baxılır, həmin yerə uyğundursa, Şəhərsalma İdarəsinə məktub göndəririk. Vətəndaş özü Şəhərsalma İdarəsinə gedir, layihəsini təqdim edir, rəsmi ödənişləri ödəyir. Müəyyən icazələri aldıqdan sonra İcra Hakimiyyətinə yenidən gəlir. Bu obyekt tikintisi üzrə prosedurdur. Fərdi yaşayış tikintilərində isə vətəndaş ərizəsini layihəsi ilə birlikdə verir. 5 iş günü ərzində ona cavab verilir. İcazə verilmirsə, onun problemini göstəririk. Məsələn, sıxlıq azdır (çox), yaxud yeri doğru deyil, kanal yaxınlığındadır və s. Fərdi yaşayış tikintilərinə yerin çıxarışı varsa, icazə verilir. Sumqayıt şəhəri elə bir yerdir ki, orada çıxarışı olan yerlər Corat, Saray bağlarıdır. Qalan bütün ərazilər çıxarışsızdır. Biz yazdığımız cavabı 3 gün ərzində Şəhərsalma İdarəsinə göndəririk. Onlar da ona baxır, yəni bir səhv olarsa, bizə deyirlər. Yəni hansısa bir sahibkara obyekt tikmək üçün icazəni biz vermiriksə, ona necə mane ola bilərik və ya ondan hansı əsasla nəsə tələb edərik? Ona görə də, bizə qarşı ittihamları boş və əsassız hesab edirəm”.