Müzəffər Ordunun Ali Baş Komandanı
44 günlük Vətən müharibəsi və əldə edilmiş böyük qələbə Azərbaycan tarixinin ən parlaq səhifələrindən biridir. Müharibənin ilk günündən xalqımız öz liderinin ətrafında sıx birləşməklə ən böyük amal olan milli birliyin yaranmasına öz töhvəsini vermiş oldu.
Bu birliyin yaranmasında əsas amillərdən biri xalqın öz liderinə olan sonsuz inamı və dövlət başçısının ötən müddət ərzində öz fəaliyyəti ilə xalqın dərin rəğbətini qazanması idi. Döyüşlərin getdiyi 44 gün ərzində Ali Baş Komandan İlham Əliyev cənabları hərb meydanında müzəffər sərkərdə, diplomatik cəbhədə isə nə qədər mahir siyasətçi olduğunu bütün dünyaya nümayiş etdirmiş oldu. Xüsusilə müharibə dövründə ölkə başçımızın dünyanın müxtəlif aparıcı televiziya kanallarına verdiyi 30-a yaxın müsahibə məhz informasiya müharibəsində Azərbaycanın haqq səsinin məharətlə bütün dünyaya çatdırılmasında önəmli rol oynadı. Hər zaman xalqının dəstəyinə arxalanan cənab prezident bütün təzyiqlərə cəsarətlə sinə gərdi və lider kimi mübarizlik, müdriklik rəmzinə çevrildi.
Son nəticədə isə beynəlxalq dəstəkdən məhrum qalan mənfur düşmən işğal altındakı əzəli torpaqlarmızdan qovuldu. Ali Baş Komandanımızın "Nəyi, necə, nə vaxt etmək lazımdır, bunu mən bilirəm" sözlərinin müdrikliyi və dəyəri əldə edilmiş qələbə ilə bir daha sübuta yetirilmiş oldu.
Nəcməddin Mürvətov
Siyəzən şəhər 1 saylı tam orta məktəbin direktoru, əməkdar müəllim