ANA SÜDÜ – SAĞLAMLIĞA ZƏMANƏT
"Uşaqların Gələcəyi Naminə" İctimai Birliyi Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirilən “Ana südünün əhəmiyyətinin təşviqi” layihəsi çərçivəsində “Ana südü körpənin sağlamlığının qızıl zəmanətidir” mövzusunda təlimlərə start verdi. 
İctimai Birliyin sədri Könül Quliyevanın Avrasiya.net-ə verdiyi məlumata görə, ilk təlim 22 fevral 2022-ci il tarixində paytaxtın “Şüa” Sağlamlıq-İdman Kompleksində 18 nəfər gənc ana və subay xanımların iştirakı ilə baş tutub. Tədbirdə Azərbaycan Tibb Universiteti Tədris Cərrahiyyə Klinikasının 2-ci Mama-ginekologiya kafedrasının rezident-həkimi Ayan Abduləliyeva ana südünün faydaları ilə bağlı təqdimat keçirib. Həkim ana südünün ən önəmli xüsusiyyəti - körpənin yaşına və fiziki durumuna uyğun olaraq onun orqanizminə müsbət təsir göstərməsi, zaman keçdikcə ağız südünün tərkibində dəyişikliklərin baş verməsi və 10-15 gün ərzində yetkin süd tərkibinin formalaşması barədə təlim iştirakçılarına geniş məlumat verib, gənc anaların çoxsaylı suallarını ətraflı cavablandırıb. 
Təlimə qatılan ali dərəcəli mama-ginekoloq, tibb elmləri üzrə fəlsəfə doktoru Gültəkin Cavadova körpənin düzgün qidalanmasından söhbət açaraq, ana südünün miqdarının artması üçün körpənin tez-tez və hər dəfə ağladığı zaman əmizdirilməsinin vacibliyini qeyd edib. Bildirib ki, yenidoğulmuşlar gün ərzində minimum 8-10 dəfə ana südü ilə qidalanmaq istəyirlər və bu rəqəm zaman keçdikcə azalır. Həkim ona ünvanlanan sualları cavablandıraraq, tez-tez əmizdirmə nəticəsində sinədə şişkinliyin və ağrıların da qarşısının alındığını gənc anaların diqqətinə çatdırıb.
Təlim zamanı psixoloq Ruhiyyə Məmmədova ana südünün körpənin fiziki və psixi sağlamlığı üçün ən uyğun qida hesab olunduğunu, əmizdirmənin ana ilə körpə arasında psixoloji təmas yaradılmasında ən yaxşı vasitə olduğunu diqqətə çatdırıb. Psixoloq ananın südünün körpənin immun sisteminin möhkəmlənməsində faydalı olması ilə yanaşı, əmizdirmənin ananın öz sağlamlığına əhəmiyyətli dərəcədə müsbət təsiri barədə geniş məlumat verib.
Təlim zamanı İctimai Birliyin layihəsindən faydalananlara ana südünün körpənin sağlamlığı üçün əhəmiyyətini əks etdirən maarifləndirici bukletlər paylanılıb.
