Rusiya müharibəyə hər gün 47 milyard xərcləyir
2025-ci ilin birinci yarısında Rusiya büdcəsində hərbi məqsədlərə 8,484 trilyon rubl xərclənib.
Bu barədə Almaniya Beynəlxalq Təhlükəsizlik Araşdırmaları İnstitutunun elmi işçisi Yanis Klyuge deyib.
Onun sözlərinə görə, ötən ilin eyni dövrü ilə müqayisədə orduya və silah istehsalına xərclər 31% artıb:
“2023-cü ilin yanvar-iyun ayları ilə müqayisədə 95%, müharibənin birinci ili ilə müqayisədə isə üç dəfə artım var. Orta hesabla, “müharibə maşını” ayda 1,4 trilyon və ya gündə 46,9 milyard rubl yeyib. Bu, Rusiyanın yoxsul bölgələrinin illik büdcələrini üstələyir (Kalmıkiyada 28,8 milyard rubl, Qaraçay-Çərkəzdə 30,5 milyard rubl, Altay Respublikasında 42,7 milyard rubl). Xəzinədarlıqda hərbi xərclərin payı da rekord qırıb. Keçən il 35%, bu il isə birinci rübdə 41,2%, ikinci rübün sonunda isə 39,8% olub. Büdcə gəlirlərinin 50,1%-i yanvar-mart aylarında, 48,2%-i isə iyunun sonunda müharibəyə yönəldilib. Başqa sözlə, hökumət vergi ödəyicilərindən federal xəzinəyə toplanan hər ikinci rublu orduya və silah alışına xərcləyib”.
Klyugenin hesablamalarına görə, Rusiyada hərbi büdcənin demək olar ki, üçdə ikisi (62%) açıqlanmır: son altı ayda açıq müdafiə vasitələrinə 3,203 trilyon rubl, “kölgə”lərə isə 5,281 trilyon rubl xərclənib.
