"Müharibənin başlayacağını deməmişəm" - Nazirdən təkzib

Pakistanın müdafiə naziri Xavaca Asif Hindistanla müharibənin başlanacağını proqnozlaşdırmadığını, lakin mövcud vəziyyətin ciddiliyini göstərmək istədiyini deyib.

TASS xəbər verir ki, o bu barədə açıqlamasında bildirib:

"Məndən müharibənin mümkünlüyü barədə soruşdular. Mən dedim ki, qarşıdakı üç-dörd gün vacibdir, amma üç gün ərzində müharibənin başlayacağını deməmişəm", - deyə Asif qeyd edib. O bildirib ki, hərbi əməliyyatların dərhal başlanacağını proqnozlaşdırmasa da, hər iki ölkənin qoşunları sərhədlər boyunca yerləşdirildiyi üçün vəziyyət gərgin olaraq qalır. "Təhlükə var və belə bir vəziyyət yaranarsa, biz tam hazır olacağıq. Əgər bizə hücum edilərsə, layiqli cavab verəcəyik", - deyə nazir əlavə edib.

Daha əvvəl Pakistanın "Dawn" qəzeti yazıb ki, Xavaca Asif Hindistanla 2-4 gün ərzində müharibənin başlaması təhlükəsinin olduğunu deyib.