“Belə bir tələb olmayıb” - Tramp Putini təkzib etdi
ABŞ Prezidenti Donald Tramp telefon danışığı zamanı Putinin Ukraynaya hərbi yardım və kəşfiyyat məlumatlarının ötürülməsinin tamamilə dayandırılmasını tələb etməsi ilə bağlı iddianı təkzib edib. Qeyd edək ki, həmin tələb Kremlin görüşdən sonra yaydığı bəyanatda yer alıb.
“Fox News”-un jurnalisti Amerika Prezidentindən Kremlin bəyanatına münasibət bildirməsini xahiş edib. Cavabında Tramp Putinlə Ukraynaya yardım məsələsini ümumiyyətlə müzakirə etmədiyini deyib: "Xeyr, (Putin) tələb etmədi - biz yardım haqqında danışmadıq. Əslində, biz ümumiyyətlə yardımdan danışmadıq, çox şeylər haqqında danışdıq, amma yardım heç vaxt müzakirə olunmadı".
Putinin niyə tam atəşkəsə razı olmadığı barədə suala Tramp belə cavab verib ki, “cəbhədə bir-birinə tuşlanan çoxlu silah var”.
