20 min ABŞ əsgəri Avropadan çıxarılır
Avropalı siyasətçilər 20 min Amerika hərbçisinin Avropadan çıxarılması ehtimalından narahat olduqlarını bildirirlər.
Publika.az xəbər verir ki, bu barədə “Washington Post”a diplomatik mənbələrə istinadla məlumat yayıb.
Qeyd edilib ki, bu addım çox yaxın gələcəkdə həyata keçirilə bilər. Avropa liderləri bu qərarın ABŞ Prezidenti Donald Tramp və Rusiya Prezidenti Vladimir Putin arasında əldə olunan hər hansı razılaşmanın nəticəsi olmadığına əminlik axtarırlar.
NATO diplomatlarından biri deyib ki, Ukrayna böhranı ilə əlaqədar Avropaya yerləşdirilən Amerika qoşunları nəhayət ABŞ-a qayıdarsa, o, təəccüblənməyəcək. Diplomatın vurğuladığı kimi, “Avropadan ayrılsalar, bu, normal həyata qayıtmaq olacaq”.
“Washington Post”un məqaləsində Avropa liderlərinin Amerika qoşunlarının çıxarılmasının daha böyük bir razılaşmanın bir hissəsi ola biləcəyi ilə bağlı narahatlıqları vurğulanır. Belə bir razılaşma Rusiya ilə həmsərhəd olan Avropa dövlətlərini öz müdafiələrini gücləndirməzdən əvvəl həssas vəziyyətdə qoya bilər.
