Makron Trampın hərəkətlərini Avropa üçün elektrik şoku adlandırıb
Donald Trampın ABŞ prezidentliyinə qayıtdıqdan sonra atdığı ilk addımlar Avropa üçün elektrik şoku oldu.
Bunu Fransa Prezidenti Emmanuel Makron Britaniyanın “Financial Times” qəzetinə müsahibəsində deyib.
"Bu elektrik şokudur. Bizə xarici impulslar lazımdır... Avropa üçün bu, sürətləndirmək və hərəkətə keçmək vaxtıdır”, - deyə Makron, eyni zamanda, Avropa Birliyinin başqa seçimi olmadığını da bildirib
Fransız siyasətçinin fikrincə, baş verənlər ABŞ-dan “strateji asılılığı” saxlamaq ümidində olan Avropa ölkələrini ayıqlaşdırmağa kömək edəcək.
Makron qeyd edib ki, Aİ Amerikanın təhlükəsizlik çətirini, Çin satış bazarını və ucuz rus qazını unutmalıdır.
Bundan əlavə, Fransa prezidenti hesab edir ki, Avropa geniş iqtisadi inteqrasiya və tənzimləməni zəiflətməklə öz müdafiəsinə sərmayə qoymağa və ÜDM-in artımına nail olsa, “strateji oyanış”a nail ola bilər, TASS xəbər verir.
