ABŞ-nin Baş Qərargah rəisi Trampın “ölüm cəzası” bəyanatlarına cavab verib
ABŞ Silahlı Qüvvələrinin Birləşmiş Qərargah Rəisləri Komitəsinin sədri general Mark Milli sabiq prezident Donald Trampın ona ünvanlanan sərt tənqidləri fonunda təhlükəsizliyini təmin etmək üçün “müvafiq tədbirlər” görəcək.
“Report” xəbər verir ki, bu barədə general keçmiş dövlət başçısının tənqidini şərh edərkən CBS-in efirində bildirib.
“Öz təhlükəsizliyim və ailəmin təhlükəsizliyini təmin etmək üçün müvafiq tədbirlər görəcəyəm”, - yüksəkrütbəli hərbçi açıqlayıb.
Qeyd edək ki, Mark Milli cari vəzifəsinə Trampın dövründə təyin olunub. “Washington Post”un məlumatına görə, Trampın prezidentliyinin son aylarında general özəl qaydada çinli həmkarı Li Szoçenlə təmasa girib və onu ABŞ-nin Çinə hücum etmək niyyəti olmadığına əmin edib. Belə ki, Vaşinqtonun belə bir niyyəti olsaydı, Milli xəbərdarlıq edərdi.
General Pekinin ABŞ-nin Çinə hücum etməyə hazırlaşdığına və buna görə də birinci hücum edə biləcəyinə inandığı kəşfiyyat məlumatlarına istinad edib. Bundan sonra Milli ABŞ-nin Hind-Sakit Okean regionunda hərbi təlimlərinin vaxtını dəyişdirib və yüksəkrütbəli zabitlərdən Trampın nüvə zərbəsi əmri verəcəyi təqdirdə bunun Millinin razılığı olmadan baş verməyəcəyinə and içmələrini istəyib. Həmin dönəm general Trampın vəziyyətini psixi pozğunluq kimi qiymətləndirib.
General əlavə edib ki, Çinə edilən çağırışlarda xainlik və ya yersiz heç nə yoxdur və o, 44 illik hərbi qulluqçu kimi ABŞ Konstitusiyasından heç vaxt üz döndərməyəcək.
O, sentyabrın sonunda təqaüdə çıxacaq. Bunu şərh edən Tramp “Washington Post”un məlumatını xatırladıb və Millinin “ABŞ Prezidentinin düşüncəsini təsvir etməsindən” qəzəblənib.
“Bu, o qədər biabırçı bir hərəkətdir ki, köhnə günlərdə cəzası ÖLÜM olardı! Bu xain hərəkət Çin və ABŞ arasında müharibə ilə sonuclana bilərdi”, - keçmiş prezident sosial şəbəkədə qeyd edib. Trampın bu cür mövqeyi onun Konqresdəki bəzi tərəfdarları tərəfindən dəstəklənib.
