Konqresmen Baydenə yazdı: İranla danışıqları kəs!
ABŞ və İran arasında aparılan danışıqlarla bağlı yayılan xəbərlərdən böyük narahatlığımı ifadə edərək bildirirəm ki, Konqresin koordinasiyası olmadan atılan bu addım sizin hökumətinizin qanunlara riayət etmək niyyətini şübhə altına alır.
Axar.az xəbər verir ki, bunu ABŞ Nümayəndələr Palatasının Xarici Əlaqələr Komitəsinin sədri Maykl Makkol ölkə Prezidenti Co Baydenə yazdığı məktubunda deyib.
O, İranın uranın zənginləşdirilməsi istiqamətindəki təxribatçı hərəkəti barədə xəbərdarlıq edib.
Makkol Tehranın 84% zənginləşdirməyə hazır olmasına və ölkənin geridönməz nüvə bilikləri əldə etməsinə toxunub:
“İranın nüvə proqramını dayandırmaq əvəzinə onu məhdudlaşdıracaq istənilən razılaşma nüvə silahlarının yayılmaması haqqında beynəlxalq müqavilənin zəifləməsinə səbəb olacaq”.
O, İslam Respublikasının Yaxın Şərqdəki dağıdıcı fəaliyyətini də diqqətə çatdırıb:
“İran Ukrayna müharibəsində Rusiyaya hərbi dəstək göstərir. Bu rejim ABŞ torpaqlarında Amerika vətəndaşlarını öldürməyə cəhdlər edib. Bayden hökuməti hərbi önləyici rıçaqlarından istifadə etmək əvəzinə, İranın dağıdıcı fəaliyyətinin qarşısını almaq üçün apardığı danışıqlarla Tehran hökumətini mükafatlandırır”.
