Ukrayna Azərbaycanlıları Radasının qurultayı keçiriləcək
Kiyevdə Diasporla İş üzrə Dövlət Komitəsi (DİDK) əməkdaşlarının iştirakı ilə Ukrayna Azərbaycanlıları Radası (UAR) İdarə Heyətinin görüşü keçirilib.
Bu barədə Diasporla İş üzrə Dövlət Komitəsndən məlumat verilib.
Görüşdən əvvəl iştirakçılar Ukrayna paytaxtında ulu öndər Heydər Əliyevin adını daşıyan parkda abidəsini ziyarət ediblər, əklil və gül dəstələri düzüblər.
Sonra UAR-ın qərargahında keçirilən iclasda təşkilatın fəaliyyəti, qarşıda duran vəzifələr müzakirə edilib. DİDK-nın Aparat rəhbəri Daşqın Rəcəbli UAR-ın fəaliyyətini, xüsusilə pandemiya və Vətən müharibəsi dövründə gördüyü işləri yüksək qiymətləndirib. Qeyd edib ki, təşkilat pandemiya ilə əlaqədar qapanmalar nəticəsində Ukraynada çarəsiz qalmış 700-dək soydaşımıza Komitənin də yardımı ilə dəstək göstərib, onları yer və ərzaqla təmin edib. Ümumilikdə həmin dövrdə Dövlət Komitəsi 7 mindən çox vətəndaşımızın xarici ölkələrdən Azərbaycana təxliyəsi prosesində iştirak edib.
Bundan başqa, 44 günlük Vətən müharibəsi dövründə də dünyadakı bütün soydaşlarımız və diaspor təşkilatlarımız kimi, Ukraynadakı icmamız da istər informasiya savaşına, istərsə də ordumuza böyük maddi-mənəvi dəstəyini göstərməklə hər iki cəbhədə qazandığımız qələbəyə öz töhfəsini verib. Müharibədən sonra isə Ukraynadakı diasporumuz şəhid ailələri və qazilərimiz üçün “Yaşat Marafonu”na ən çox vəsait köçürən beş ölkədəki icmadan biri olub.
Görüşdə UAR-ın bundan sonra da səmərəli fəaliyyətini təmin etmək məqsədilə təşkilatlanma və birləşmə prosesinin davam etdirilməsinin vacibliyi vurğulanıb. UAR-ın həmsədrləri Oleq Krapivin, Hikmət Cavadov və İdarə Heyətnin üzvləri çıxış edərək, gələn ilin birinci yarısında Radanın təsis qurultayından sonra ilk hesabat-seçki qurultayının keçirilməsini təklif ediblər. Eyni zamanda növbəti ildə təşkilatlanma ilə yanaşı, təbliğat işinin gücləndirilməsi, lobbiçilik, soydaşlarımızın inteqrasiyası, hüquqlarının qorunması və digər məsələlərlə bağlı fikir mübadiləsi aparılıb, təkliflər müzakirə edilib və bir sıra vacib qərarlar qəbul olunub.
