50 ildir çimməyən iranlı 94 yaşında öldüİranda 50 ildən çoxdur çimməyən “Hacı dayı” ləqəbli qoca kişi vəfat edib.

Avrasiya.net modern.az-a istinadən xəbər verir ki, bu barədə İranın rəsmi "İrna" agentliyi məlumat yayıb.

Bildirilir ki, xəstələnmək qorxusu ilə yuyunmaqdan imtina edən iranlı 94 yaşında dünyasını dəyişib.

Fars əyalətinin Farsbənd rayonunun Dəcgah kəndində yaşayan qoca bir neçə il əvvəl kənd gəncləri tərəfindən hamama aparılsa da, o, maşından düşüb qaıb.

Xəstələnməkdən qorxduğu üçün çimməkdən qaçan qocaya illər sonra kənd sakinlərinin səyi ilə hamamdan istifadə edib, lakin bundan bir neçə ay sonra xəstələnərək dünyasını dəyişib.
Masallıda ata oğlunun asılmış meyitini tapdıMasallıda intihar hadisəsi olub.

Avrasiya.net Lent.az-a istinadən xəbər verir ki, hadisə bir neçə saat əvvəl rayonun Xıl kəndində qeydə alınıb. 21 yaşlı kənd sakini Fərzəliyev Orxan Şəkərəli oğlu mal-qara saxlanılan tikilidə özünü asıb.

İlkin ehtimala görə, O. Fərzəliyevin uzun müddətdir psixoloji problemləri varmış. Onun meyitini atası Ş. Fərzəliyev hadisədən 2 saat sonra aşkar edib.

Faktla bağlı araşdırma aparılır. İntiharın dəqiq səbəbləri araşdırmanın nəticəsindən sonra bilinəcək.
Bakıda yeni marşrut xətti açılır: gediş haqqı 60 qəpikOktyabrın 27-dən Bakıda gediş haqqı 60 qəpik olmaqla yeni E1 ekspres marşrut xətti fəaliyyətə başlayacaq.

Bu barədə Avrasiya.net-ə Bakı Nəqliyyat Agentliyindən (BNA) məlumat verilib.

Məlumata görə, yeni xətt üzrə avtobuslar metronun “Xalqlar Dostluğu” stansiyasından başlayaraq Qara Qarayev prospekti - “Koroğlu” metro stansiyası - Heydər Əliyev prospekti - Yusif Səfərov küçəsi - Neftçilər prospekti – “Azneft” dairəsi - Bibiheybət -Lökbatan Nəqliyyat Mübadilə Mərkəzi istiqamətində hərəkət edəcək.

Marşrut xətti üzrə sərnişindaşımaları Bakı Bus MMC-nin istismarında olan avtobuslarla icra ediləcək. İlkin mərhələdə daşımalara 10 ədəd avtobus cəlb ediləcək. Xətt üzrə avtobuslar səhər saat 06:30-dan axşam saat 18:30-a qədər fəaliyyət göstərəcək. Avtobuslar hərəkət sxemi üzrə bütün dayanacaq məntəqələri üzrə deyil, yalnız əvvəlcədən müəyyən edilmiş sərnişin təlabatı daha çox olan məntəqələrdə dayanacaq.

"E1 xəttinin fəaliyyətə başlaması ilə vətəndaşların rahat, əlavə ödəniş etmədən metronun “Xalqlar Dostluğu” stansiyasından Lökbatan Nəqliyyat Mübadilə Mərkəzi istiqamətində rahat və birbaşa ictimai nəqliyyatla sürətli gediş-gəlişi təmin ediləcək. Bu da öz növbəsində vətəndaşların metronun qeyd olunan istiqamətdə qanunsuz sərnişindaşıma vasitələrindən, eləcə də fərdi avtmobillərdən istifadəsini azaldacaq. Əhalinin ümumi istifadədə olan nəqliyyatdan istifadəsinin stimullaşdırılması isə xüsusilə şəhərin mərkəzində şəxsi avtomobil ilə hərəkətin azaldılmasına müsbət təsir edəcək", - deyə BNA bəyan edib.
Bu gün Qubadlı günüdür...Bu gün Qubadlı günüdür desəm, məncə, yanılmaram. Çünki bu gün Zəfər tariximizin önəmli bir səhifəsi sayılan Qubadlının işğaldan azad olunmasından 2 il ötür. 25 oktyabr 2020-ci il Azərbaycanın şərqi ilə qərbinin kəsişən nöqtəsində yerləşən qədim Zəngəzur mahalının qapısı sayılan Qubadlı torpağı qəhrəman hərbçilərimiz tərəfindən düşmən tapdağından həmişəlik azad edilib.

Bu rayonun işğaldan azad edilməsi heç də asan başa gəlməyib. Qubadlı uğrunda gedən döyüşlər Azərbaycan Ordusunun Vətən müharibəsində keçirdiyi ən uğurlu hərbi əməliyyatlardan biri hesab olunur. 44 günlük Vətən müharibəsi dövründə Cəbrayıl, Füzuli, Hadrut, Zəngilan uğrunda olduğu kimi Qubadlı uğrunda da şiddətli döyüşlər gedib. Müzəffər Azərbaycan Ordusu torpaqlarımızın hər qarışı uğrunda xüsusi fədakarlıqla döyüşüb. Başqa sözlə desək, Qubadlı torpaqları da şəhidlərimizin qanı bahasına azad edilib. O cümlədən, Milli Qəhrəmanımız polkovnik Şükür Həmidov da öz doğma diyarı uğrunda qəhrəmancasına döyüşərək şəhid olub.

Bu döyüşlərdə üzləşdikləri məğlubiyyət nəticəsində ermənilərə təkcə hərbi müstəvidə yox, həmçinin mənəvi-psixoloji baxımdan da ağır zərbə vurulub. Eləcə də, Qubadlı istiqamətində gedən döyüşlərdə düşmənin çoxlu sayda texnikasını məhv edən Ordumuz həmçinin çoxlu sayda müxtəlif döyüş texnikaları ələ keçirib. Ordumuzun davamlı hücumları qarşısında duruş gətirə bilməyən düşmən ordusu öz döyüş texnikalarını, hərbi sursatlarını nə istifadə etməyə, nədəki xilas etməyə macal tapmayaraq qorxaqcasına atıb qaçıb. Qubadlı döyüşləri iki ordunun döyüş qabiliyyətini və psixoloji durumunu ortaya qoydu. Hər kəs gördü ki, kim kimdir. Bu mənada, Qubadlının işğaldan azad edilməsi həqiqətən tarixi hadisə idi. Çünki Azərbaycan əsgərləri bu döyüşlərdə ordumuzun və xalqımızın mübarizə əzmini, yenilməz savaş ruhunu bütün dünyaya nümayiş etdirdi.

Qubadlı şəhərinin işğaldan azad edilməsi nəyə görə mühüm əhəmiyyət kəsb edir? İlk növbədə ona görə ki, bu bizim böyük Qələbəmizi daha da yaxınlaşdırdı. İkincisi isə, Qubadlının azad edilməsi ilə Şanlı Ordumuzun hücum əməliyyatları meydanı bir xeyli genişlənmiş oldu. Belə ki, bir yandan, qoşunlarımızın irəliləməsi üçün Hadrut-Şuşa istiqamətində olduqca əlverişli şərait yarandı, digər tərəfdən isə Laçın istiqamətinə yol açıldı və Laçın dəhlizini atəş nəzarətinə götürməyə müvəffəq olduq. Bu isə bizim üçün müharibənin bütün sonrakı gedişatına həlledici təsir imkanının yaranması demək idi.

Ermənilər bütün hərbi texnika, canlı qüvvə və döyüş sursatlarını məhz Laçın dəhlizi üzərindən Qarabağa daşıyırdılar. Lakin Laçın dəhlizinin Ordumuz tərəfindən nəzarətə götürülməsi ilə bütün bu daşımalara son qoyuldu. Həmçinin Laçın dəhlizinin bizim atəş nəzarətimizə keçməsi eyni zamanda Şuşanın işğaldan azad edilməsi üçün də əlverişli şərait yaratdı. Baxın, Qubadlının işğaldan azad edilməsi uğrunda həyata keçirilən döyüş əməliyyatları məhz bu cəhətlərinə görə bütün sonrakı döyüşlərin taleyini həll edən hərbi əməliyyatlar kimi xüsusi əhəmiyyət daşıyır. Qalib Azərbaycan Ordusu Qubadlı əməliyyatını uğurla başa vurduqdan sonra Zəfər missiyasını daha da inamla davam etdirdi.

Bu gün Qubadlı ikinci azadlığını yaşayır. Prezident və Ali Baş Komandanımız İlham Əliyevin təbiri ilə desək, biz Qubadlıya əbədi qayıtmışıq və bu gün işğaldan azad edilmiş bütün torpaqlarımızda olduğu kimi doğma Qubadlıda da üçrəngli bayrağımız qürurla dalğalanır. Dövlətimiz Qubadlıda geniş quruculuq-bərpa işlərinə start verib. Erməni vandalizminin ağır nəticələri sürətlə aradan qaldırılır. Ağdam kimi, Füzuli kimi, Zəngilan kimi Qubadlı da tam şəkildə yenidən qurulur. Eyni zamanda ərazilərin minalardan təmizlənməsi, yolların çəkilməsi, infrastrukturun bərpası işləri aparılır. Bir sözlə, hazırda bütün işlər məhz Böyük Qayıdışın tezliklə baş tutmasına hesablanıb. Yəni ki, soydaşlarımızın tezliklə öz doğma yurd-yuvalarına qayıdacaqları gün elə də uzaqda deyil.

Mən əminəm ki, Şərqi Zəngəzurun ən gözəl guşələrindən biri olan Qubadlı rayonu quruculuq-bərpa işləri başa çatdıqdan sonra hamımız işğal nəticəsində öz yurdlarından köçkün düşən soydaşlarımızın doğma evlərinə qayıtmasının şahidi olacayıq. Elə mən özüm də o günü xüsusi səbirsizliklə gözləyirəm. Çünki mən də 30 ilə yaxındır məcburi köçkün həyatını yaşayıram. İllərlə həsrətini çəkdiyim doğma Xanlıq kəndinə qayıtmaq hazırda mənim ən böyük arzumdur. İnşAllah bu arzum da tezliklə gerçəkləşəcək. Və o torpaqlara bundan sonra bir daha heç vaxt düşmən yağı dəyməyəcək.

Biz bundan sonra o torpaqlarda qalib xalq kimi yaşayacağıq. Qalib xalqın bir fərdi, qalib ölkənin vətəndaşı olmaq doğrudan da çox gözəl hissdir. Bu gün bu hissi bizə yaşadan hər kəsə - əsgər və zabitlərimizə də, qazilərimizə də, Ali Baş Komandanımıza da təşəkkür edirik. Vətən torpağının azadlığı üçün öz canlarını fəda edən hər bir şəhidimizə Allahdan rəhmət diləyir, onların ruhları qarşısında baş əyirik.
Yaşasın Azərbaycan! Qarabağ Azərbaycandır! Zəngəzur Azərbaycandır!

Əlisahib Hüseynov,
Milli Həmrəylik Partiyasının sədri
Rus kanalından Bakıya qarşı növbəti təxribat – VideoRusiyanın dövlət telekanalı “Rossiya 24” “Birinci” kanalının ardınca Bakıya qarşı növbəti təxribat dolu reportaj yayımlayıb.

Axar.az-ın məlumatına əsasən, telekanalın Ermənistanla bağlı reportajında Azərbaycana qarşı əsassız ittihamlar irəli sürülüb.

Süjetdə danışan erməni əsilli rusiyalı ekspertlər Semyon Baqdasarov və Ayk Xalatyan Azərbaycanın milli maraqlarına tam zidd olan absurd fikirlər səsləndirib.

Süjetdə həmçinin qeyd olunur ki, guya Azərbaycan tərəflər arasındakı bütün razılaşmaları pozur və hətta “Amerika ilə əlbir olaraq Rusiyaya qarşı çıxır”.

Rusiya kanalı reallığı bir kənara qoyaraq (əslində məhz İrəvan bütün dünyanın gözü önündə Rusiyanı Qərbin vədlərinə satıb. Məhz Ermənistanda bu günə qədər Soros fondu ən böyük fond olaraq fəaliyyət göstərir, məhz İrəvanda dünyanın ən böyük Amerika səfirliyi yerləşir, məhz Ermənistanda ABŞ-ın böyük biolabaratoriyaları dayanmadan çalışır. Məhz İrəvanın təkidi ilə Azərbaycan ilə sərhəddə AB missiyası və ATƏT hərbi müşahidəçiləri yerləşdirilib) Azərbaycanı günahlandırmaq istəyir.
[media=https://www.youtube.com/watch?v=7cdmWJabNKY&feature=emb_title]
Böyük Britaniyanın yeni Baş naziri vəzifəsinin icrasına başlayıbBöyük Britaniyanın yeni Baş naziri Rişi Sunak oktyabrın 25-də vəzifəsinin icrasına başlayıb.

Bu barədə BBC məlumat yayıb.

Bildirilib ki, o, oktyabrın 25-də Londonda Bukinqem sarayında Kral III Çarlzla görüşüb. Ənənəyə əsasən, monarx görüşdə Baş nazirə hökuməti qurmağı tapşırıb.

Qeyd edək ki, Kral III Çarlz Rişi Sunakla görüşdən əvvəl keçmiş Baş nazir Liz Trassın istefasını qəbul edib. Liz Trass sentyabrın 6-dan oktyabrın 20-dək hökumətə başçılıq edib.

42 yaşlı Rişi Sunak son 7 həftədə Böyük Britaniyanın 3-cü Baş naziridir. O, krallıqda hökumətə başçılıq edən ilk asiyalıdır.

R.Sunak oktyabrın 24-də Mühafizəkarlar Partiyasının sədri, eyni zamanda, hökumətin başçısı seçilib. O, ölkənin ciddi iqtisadi problemlərlə qarşılaşdığına dair xəbərdarlıq edib və vicdanla çalışacağına da boyun olub. Leyboristlər, Şotlandiya Milli, Liberal Demokrak və Yaşıllar partiyalarının çağırışlarına baxmayaraq, növbədənkənar parlament seçkilərinin keçiriləcəyini istisna edib.

Xatırladaq ki, növbəti parlament seçkiləri 2024-cü ildə keçiriləcək.

Mütəxəssislərin fikrincə, yeni Baş nazirin qarşısında Britaniyanın son 40 ildə üzləşdiyi ən yüksək inflyasiyaya qarşı mübarizə aparmaq və Mühafizəkarlar Partiyası daxilində birliyə nail olmaq kimi mühüm vəzifələr durur.
Kiyevdə həyəcan - Belarusdan İran PUA-ları ilə hücum edildiOktyabrın 25-də Kiyev və regionda hava həyəcanı siqnalı verilib.

UNİAN xəbər verir ki, bu barədə Ukrayna Hərbi Hava Qüvvələrinin ictimaiyyətlə əlaqələr xidmətinin rəhbəri, polkovnik Yuri İqnat məlumat verib.

O bildirib ki, ruslar Belarus ərazisindən “Şahed” kamikadze pilotsuz təyyarələrini havaya buraxıblar.

Polkovnikin sözlərinə görə, işğalçılar İranın 10 pilotsuz təyyarəsini havaya buraxıblar: "Bu, onların Kiyevə Belarusdan ilk hücumu deyil”.

O, həmçinin əlavə edib ki, gün ərzində Ukrayna müdafiəçiləri üçün pilotsuz təyyarələri vurmaq daha asandır, çünki hədəf vizual olaraq daha yaxşı görünür.
Zatulinin Ermənistana girişi qadağan edildiRusiya Dövlət Dumasının MDB İşləri üzrə komitə sədrinin birinci müavini, illərdir ermənipərəst mövqeyi ilə gündəmə gələn rusiyalı siyasətçi Konstantin Zatulin Ermənistanda "persona non qrata" elan edilib.

Axar.az xəbər verir ki, bu barədə Ermənistanın "Aykakan Jamanak" qəzeti yazır.

"Bizim məlumatlara görə, Konstantin Zatulinin Ermənistana girişi qadağan edilib. Bu gündən etibarən o, Ermənistanda arzuolunmaz şəxs hesab olunur", - deyə nəşr bildirib.

Qeyd edək ki, bir müddət öncə rusiyalı deputat Zatulin öz müsahibələrində birində 44 günlük müharibədəki məğlubiyyətdə Ermənistan hakimiyyətini ittiham edib.
Bakıda yaşayış binasında partlayış: xəsarət alan varBakıda yaşayış binasında partlayış baş verib.

Daxili İşlər Nazirliyinin (DİN) Mətbuat xidmətindən verilən məlumata görə, hadisə Yasamal rayonunda qeydə alınıb.

Belə ki, rayon ərazisində yerləşən yaşayış binalarının birinin 4-cü mərtəbəsində qaz sızmasından partlayış olub. Nəticədə mənzilin sahibi müxtəlif dərəcəli bədən xəsarətləri alıb.

Hadisə yerinə dərhal müvafiq dövlət qurumlarının əməkdaşkarı cəlb olunub. Polis əməkdaşlarının köməyi ilə ev sahibi dərhal xəstəxanaya çatdırılıb və digər zəruri təhlükəsizlik tədbirləri həyata keçirilib.

Faktla bağlı araşdırma aparılır.
İsa Həbibbəyli deputat mandatından imtina edəcək?Azərbaycan Milli Elmlər Akademiyasının (AMEA) yeni prezidenti İsa Həbibbəyli qurumun vitse-prezident postundakı vəzifəsindən və deputat mandatından imtina edib-etməyəcəyi məsələsinə münasibət bildirib.

Avrasiya.net Report-a istinadən xəbər verir ki, İ.Həbibbəyli jurnalistlərə açıqlamasında bu məsələnin hələ ki, müzakirə mövzusu olmadığını qeyd edib.

Qeyd edək ki, AMEA-nın bu gün keçirilən Ümumi yığıncağında İsa Həbibbəyli qurumun yeni prezidenti seçilib. İ.Həbibbəyli 1949-cu ildə dünyaya gəlib, oktyabrın 16-da onun 73 yaşı tamam olub.

Xatırladaq ki, bu ilin fevral ayında AMEA-nın prezidenti Ramiz Mehdiyev vəzifəsindən istafa verib. Elə həmin aydan etibarən AMEA prezidentinin səlahiyyətlərinin icrası akademiyanın birinci vitse-prezidenti, akademik Arif Həşimova həvalə olunmuşdu.