Həmrəylikdən güclü dövlətə aparan yol

Akademik İbrahim Cəfərov,
Bitki Mühafizə və Texniki Bitkilər Elmi-Tədqiqat İnstitunun direktoru

31 Dekabr – Dünya Azərbaycanlılarının Həmrəyliyi Günü Azərbaycan xalqının milli şüur tarixində mühüm mərhələ olmaqla yanaşı, dövlətçilik fəlsəfəsinin ideoloji dayaqlarını formalaşdıran əsas sütunlardan biridir. Bu tarix təkcə dünyanın müxtəlif guşələrində yaşayan azərbaycanlıların mənəvi birliyini ifadə etmir, eyni zamanda müasir Azərbaycan dövlətinin siyasi baxış sistemini, milli maraqlar üzərində qurulan strateji xəttini və gələcəyə yönəlmiş inkişaf konsepsiyasını özündə ehtiva edir.

Bu mühüm ideyanın sistemli və dövlət səviyyəsində reallaşdırılması məhz Ulu Öndər Heydər Əliyevin adı ilə bağlıdır. Ümummilli Lider azərbaycançılıq məfkurəsini yalnız mədəni-mənəvi kateqoriya kimi deyil, siyasi və institusional mexanizmlərə söykənən dövlət ideologiyası səviyyəsinə yüksəltmişdir. Dünya Azərbaycanlılarının Həmrəyliyi Günü də bu ideoloji xəttin mühüm tərkib hissəsi olaraq, diaspor siyasətinin və milli birliyin simvoluna çevrilmişdir.

Heydər Əliyev üçün həmrəylik anlayışı yalnız etnik və emosional bağlılıq deyildi. O, bu anlayışı müstəqil dövlətin möhkəmləndirilməsi, milli maraqların qorunması və Azərbaycanın beynəlxalq mövqelərinin gücləndirilməsi üçün strateji alət kimi qiymətləndirirdi. Məhz bu baxımdan diaspor təşkilatlanması, soydaşlarımızla sistemli əlaqələrin qurulması və azərbaycançılıq ideyasının dünyaya təqdim edilməsi Ulu Öndərin siyasi kursunun əsas istiqamətlərindən biri olmuşdur.

Bu gün qürurla qeyd etmək olar ki, həmin strateji xətt Prezident İlham Əliyev tərəfindən yeni dövrün çağırışlarına uyğun şəkildə uğurla davam etdirilir. Prezident İlham Əliyevin rəhbərliyi altında həmrəylik ideyası artıq yalnız mənəvi çağırış deyil, real siyasi nəticələr doğuran qlobal Azərbaycan modelinə çevrilmişdir. Müasir mərhələdə Azərbaycan diasporu vahid mövqedən çıxış edən, milli maraqları beynəlxalq platformalarda qətiyyətlə müdafiə edən güclü aktora çevrilib.

Xüsusilə Vətən müharibəsi dövründə və postmüharibə mərhələsində dünya azərbaycanlılarının nümayiş etdirdiyi birlik, informasiya cəbhəsində aparılan mübarizə və beynəlxalq ictimai rəyin formalaşdırılmasında əldə olunan uğurlar Prezident İlham Əliyevin uzaqgörən diaspor siyasətinin məntiqi nəticəsi kimi qiymətləndirilməlidir. Bu, Ulu Öndərin müəyyən etdiyi ideoloji xəttin müasir siyasi reallıqlar fonunda daha da təkmilləşdirildiyini açıq şəkildə nümayiş etdirir.

Prezident İlham Əliyev azərbaycançılıq ideyasını yalnız tarixi miras kimi qorumaqla kifayətlənmir, onu dinamik, müasir və qlobal proseslərə uyğun ideoloji platformaya çevirir. Azərbaycanın artan beynəlxalq nüfuzu, müstəqil və prinsipial xarici siyasəti, milli maraqlara əsaslanan diplomatik xətti də məhz bu ideoloji ardıcıllığın göstəricisidir.

31 Dekabr – Dünya Azərbaycanlılarının Həmrəyliyi Günü bu baxımdan yalnız bir bayram deyil, milli məsuliyyət çağırışıdır. Bu gün bizə xatırladır ki, dövlətin gücü təkcə coğrafi sərhədlərlə deyil, milli şüurun, ortaq ideyanın və vahid siyasi iradənin gücü ilə ölçülür. Ulu Öndər Heydər Əliyevin müəyyən etdiyi bu strateji baxış Prezident İlham Əliyevin rəhbərliyi ilə real nəticələr verən dövlət siyasətinə çevrilmişdir.

Bu gün müstəqil, qalib və söz sahibi olan Azərbaycan həm də dünya azərbaycanlılarının vahid ideya ətrafında birləşdiyi güclü milli dövlət modelini təcəssüm etdirir. Həmrəylik ideyasının siyasi reallığa çevrilməsi isə bir daha sübut edir ki, Ulu öndər Heydər Əliyev yolu tarixi zərurət deyil, müasir və gələcəyə yönəlmiş inkişaf strategiyasıdır. Prezident İlham Əliyev isə bu yolun layiqli davamçısı kimi Azərbaycanı yeni zirvələrə doğru inamla aparır.