Fazil Mustafa hüquq müdafiəçiləri ilə görüşüb - FOTOLAR
Böyük Quruluş Partiyasından prezidentliyə namizəd Fazil Mustafa hüquq müdafiəçiləri Novella Cəfəroğlu, Səadət Bənənyarlı və Əhməd Qəşəmoğlu ilə görüşüb.
Avrasiya.net xəbər verir ki, görüşdə 7 fevralda keçiriləcək Prezident seçkilərinə hazırlıq prosesi, namizədlərin təbliğat və təşviqat kampaniyaları, seçici aktivliyi və seçki prosesinə aid digər məsələlər müzakirə olunub. F.Mustafa əvvəlcə qonaqları seçki platrorması və proqramı ilə tanış edib. Qeyd edib ki, o, seçkiyə “Dayağımız: yeniləşən, çalışqan insan! Hədəfimiz: rifah dövləti Azərbaycan!” şüarı ilə qoşulub: "1 həyati + 50 vacib məsələ” adlı seçki platformamız hazırdır. Həyati məsələ kimi təhsil problemi qabardılıb. Vacib məsələlərdə isə ölkə həyatının bütün sahələrini əks etdirən, beynəlxalq siyasətdən tutmuş, sosial məsələlər, daxili siyasət, idarəetmə islahatlarına qədər hər bir məsələ öz əksini tapıb. Ayrı-ayrı bəndləri təbliğat-təşviqat üçün nəzərdə tutulmuş qəzetlərdə, eyni zamanda sosial şəbəkə vasitəsilə yayacağıq. Bu kampaniyada hər bir məsələyə fərqli baxışımızı ortaya qoymağa çalışmışıq". 
Artıq bir neçə yerdə izdihamlı görüşlər keçirildiyini deyən F.Mustafa seçicilərin bu görüşlərdən məmnun qaldıqlarını və gələn həftədən yeni görüşlərin keçiriləcəyini hüquq müdafiəçilərinin nəzərinə çatdırıb.
Hüquq müdafiəçiləri də öz mövbələrində F.Mustafamın təbliğat və təşviqat kampaniyası çərçivəsində görüşlərini, eyni zamanda İTV-də çıxışlarını izlədiklərini, orada söylədiyi fikir, gündəmə gətirdiyi problemlər və onların çıxış yolları ilə bağlı arqumentlərlə razılaşdıqlarını bildiriblər.
Sonda F.Mustafa hüquq müdafiəçilərinin suallarını cavablandırıb.
