Azərbaycan xalqı hər zaman Prezident İlham Əliyevi dəstəkləyir
Prezident, Ali Baş Komandan, sərkərdə, siyasətçi kimi İlham Əliyevin şah əsəri azad Qarabağ, ərazi bütövlüyü təmin olunmuş Azərbaycandır. O, atası Ulu Öndər Heydər Əliyevin yarımçıq qalan işlərini davam etdirməklə yanaşı, onun vəsiyyətinə əməl edən ən xoşbəxt varisdir.
Azərbaycanın müstəqillik tarixində 15 oktyabr 2003-cü il mühüm tarixi bir gündür. Azərbaycan xalqının taleyində mühüm əhəmiyyət kəsb edən elə tarixi günlər var ki, həmin günlərdə onun gələcək həyatını müəyyən edən önəmli başlanğıcların əsası qoyulub. Belə mühüm günlərdən biri də oktyabr ayının 15-nə təsadüf edir. 2003-cü il oktyabrın 15-də Ulu Öndər Heydər Əliyevin siyasi kursunun layiqli davamçısı cənab İlham Əliyev xalqımızın etimadını qazanaraq Azərbaycan Respublikasının Prezidenti seçildi və bununla da ölkəmizin inkişafında yeni bir mərhələ başlandı.
Azərbaycan xalqı 2003-cü ildə cənab İlham Əliyevi dövlətimizin başçısı seçməklə öncə Ümummilli Lider Heydər Əliyevin siyasi kursuna səs verdi. O kursa sadiqliyini nümayiş etdirən xalqımız Ulu Öndərə sevgisini və inamını bir daha sübut etdi. Azərbaycan xalqı sülhün, əmin-amanlığın, tərəqqinin, inkişafın, quruculuğun və sabitliyin tərəfində olduğunu nümayiş etdirdi, ölkədə bu siyasətə alternativin olmadığını göstərdi. Zəngin və qüdrətli Azərbaycan uğrunda çağırışı ilə milyonları öz ətrafında toplayan cənab İlham Əliyevin yürütdüyü siyasət nəticəsində tezliklə Azərbaycanda demokratik, hüquqi dövlət quruculuğu prosesi uğurla həyata keçirilməyə başladı. “Bizim uğurlarımızın əsas mənbəyi Azərbaycan xalqının fəaliyyətidir, Azərbaycan xalqının iradəsidir”, - deyən Möhtərəm cənab Prezident İlham Əliyevin fəaliyyəti, əslində, müasir Azərbaycanın inkişafına, tərəqqisinə yönələn fəaliyyətin konsepsiyasına çevrildi. Cənab Prezidentin xalqdan aldığı dəstəyin təməlində isə onun Ulu öndər Heydər Əliyev siyasətinə sadiqliyi dayanırdı.
Cənab İlham Əliyevin Azərbaycana rəhbərlik etdiyi 22 il ərzində ölkəmizdə bütün istiqamətlərdə uğurlar əldə edildi və ölkəmizin bölgədə və dünyada mövqeləri xeyli dərəcədə möhkəmləndi. Müstəqilliyimizin və ideoloji dayaqlarımızın daha da möhkəmləndirilməsinin, vətəndaş həmrəyliyinin bərqərar olmasının təməlində isə Azərbaycan dövlətinin milli maraqlarının qorunması dayandı. Cənab Prezident İlham Əliyevin yürütdüyü müdrik və milli maraqlara söykənən xarici siyasət Azərbaycanın müttəfiqlərinin və dostlarının sayını artırdı. Azərbaycan beynəlxalq müstəvidə layiqli yerini möhkəmləndirdi.
Möhtərəm cənab Prezidentin fəaliyyətinin ən böyük zirvəsini isə torpaqlarımızın işğaldan azad edilməsi ilə nəticələnən 44 günlük Vətən müharibəsi və 2023-cü ilin sentyabr ayının 19-da başlanan və cəmi 24 saat ərzində düşmənin darmadağın edilməsi nəticəsində milli suverenliyimizin bərpa edildiyi lokal xarakterli antiterror əməliyyatı təşkil edir. Hazırda Müzəffər Ali Baş Komandan İlham Əliyevin böyük dövlət xadimi və Azərbaycan xalqının lideri kimi əsas missiyası dövlətin və xalqın gücü ilə düşmənin viran qoyduğu işğaldan azad edilən şəhər və kəndlərimizin yenidən qurulması, öz yurd-yuvalarından qaçqın vəziyyətinə düşən soydaşlarımızın evlərinə qaytarılmasıdır.
Samir Baxşiyev
YAP Siyəzən rayon təşkilatının sədri
