YAP müstəqil dövlətçilik strategiyasına xidmət edir

Akademik İbrahim Cəfərov,
Bitki Mühafizə və Texniki Bitkilər Elmi-Tədqiqat İnstitunun direktoru

Bu gün Yeni Azərbaycan Partiyasının yaranmasının 33 ili tamam olur. 1992-ci ilin çətin, qarşıdurmalarla müşayiət olunan siyasi mühitində formalaşan YAP təkcə bir siyasi təşkilat kimi deyil, Azərbaycan dövlətçiliyinə strateji istiqamət verən milli ideoloji platforma kimi tarixə daxil oldu. Ümummilli Lider Heydər Əliyevin çağırışı və rəhbərliyi ilə təsis edilən partiya müstəqilliyin qorunması, vətəndaş həmrəyliyinin bərpası və dövlətçilik ənənələrinin möhkəmləndirilməsi kimi həlledici missiyanı öz üzərinə götürdü.

1990-cı illərin əvvəlləri Azərbaycan üçün taleyüklü dövr idi: siyasi parçalanma, idarəçilik böhranı, xarici təhdidlər və Qarabağ müharibəsinin ağır nəticələri ölkəni dərin sınaqlarla üz-üzə qoymuşdu. Məhz belə bir şəraitdə — 1992-ci il noyabrın 21-də — Yeni Azərbaycan Partiyasının təsis edilməsi ölkənin siyasi həyatında dönüş nöqtəsi oldu. Qısa müddətdə geniş ictimai dəstək qazanan YAP dövlət idarəçiliyində sabitliyin bərqərar olunmasına mühüm töhfə verdi.

YAP-ın dövlətçilik fəlsəfəsinin təməlində Ulu Öndər Heydər Əliyevin müəyyənləşdirdiyi milli inkişaf modeli dayanır. Bu model güclü dövlət, güclü ordu, sosial rifah və dayanıqlı iqtisadiyyat prinsiplərinə əsaslanan müasir Azərbaycan konsepsiyasını formalaşdırdı. Partiya bu ideoloji xətti ardıcıl şəkildə davam etdirərək ölkənin uzunmüddətli inkişaf strategiyasını qoruyub və yeniləyib.

2003-cü ildən etibarən Prezident İlham Əliyevin rəhbərliyi ilə YAP-ın siyasi xətti yeni məzmun, müasirlik və dinamik inkişaf mərhələsinə keçib. Son 20 ildə Azərbaycan regionun ən güclü iqtisadiyyatlarından birinə çevrilib, ordu quruculuğunda fundamental islahatlar aparılıb, müstəqil və balanslı xarici siyasət xətti formalaşdırılıb. Bu dövrün ən ali nəticəsi isə 44 günlük Vətən müharibəsində tarixi Zəfərin qazanılmasıdır.

Hazırda işğaldan azad olunmuş ərazilərdə aparılan genişmiqyaslı bərpa və yenidənqurma işləri YAP-ın dövlətçilik strategiyasının davamlılığını və praktik nəticələrini göstərən mühüm nümunələrdəndir.

Son illərdə partiyanın struktur və fəaliyyət mexanizmlərində aparılan modernləşmə isə YAP-ın zamanın çağırışlarına adekvat addımlar atdığını göstərir. Gənclərin fəal iştirakı, qərar qəbulu prosesində çeviklik, institusional möhkəmlənmə və şəffaflıq partiyanın yeni dövrün siyasi idarəetmə standartlarına uyğunlaşdığını nümayiş etdirir.

Yeni Azərbaycan Partiyasının 33 illik fəaliyyəti bir daha təsdiqləyir ki, bu siyasi təşkilat milli iradənin ifadəçisi, dövlətçilik strategiyasının davamlı memarı və Azərbaycanın gələcək inkişaf vizionunun aparıcı qüvvəsidir.