Gürcüstan demoqrafik problemlə üzləşib
"Əgər demoqrafik problem həll olunmazsa, hər şey ikinci plana keçəcək".
Gürcüstan mətbuatı xəbər verir ki, bunu statistik Soso Arçvadze "Business Press News"a müsahibəsində deyib.
Onun sözlərinə görə, müharibə dövrlərini nəzərə almasaq, Gürcüstanda doğulanların sayı indiyədək 40 min həddindən aşağı düşməyib. Üstəlik, təbii artım göstəricisi mənfi olduğu halda, bu, ciddi təhlükə siqnalıdır və tezliklə gürcülər öz ölkələrində etnik azlığa çevrilə bilərlər.
O, qeyd edib ki, Gürcüstandakı vəziyyəti daha da çətinləşdirən amillərdən biri də yüksək miqyaslı emiqrasiyadır. Gürcüstandan çıxan vətəndaşların sayı ölkəyə qayıdanlardan daha çoxdur. Bunun əksinə, xarici ölkə vətəndaşları Gürcüstana daha çox gəlir, nəinki buradan gedir. Beləliklə, ölkənin vətəndaşları ilə qeyri-vətəndaşlar arasındakı tarazlıq tədricən pisləşir.
O da qeyd edilib ki, 2024-cü ildə Gürcüstanda doğulanlardan çox insan dünyasını dəyişib. Gürcüstan Statistika Xidmətinin məlumatına görə, ötən il ölkədə 39 min 483 uşaq doğulub, 43 min 971 insan isə vəfat edib. Beləliklə, mənfi təbii artım 4 min 488 nəfər təşkil edib.
