"Ərdoğanla görüşü çox mühüm nailiyyət hesab edirəm" - Paşinyan

"Ən çox baxış və bəyənmə Türkiyə prezidenti ilə görüşümdə oldu".

Bunu Ermənistanın baş naziri Nikol Paşinyan Türkiyə mətbuatına müsahibəsində deyib.

"İndi mən bunu çox mühüm nailiyyət hesab edirəm, ilk baxışdan sadə görünə bilən, amma simvolik olan çox sadə bir şeyi qeyd edim: məsələn, mən Nyu-Yorkda müxtəlif ölkələrin liderləri ilə görüşlərimlə bağlı kiçik materialları “Facebook” səhifəmdə yerləşdirdim, Türkiyə prezidenti ilə görüşüm sosial şəbəkələrimizin istifadəçiləri arasında ən çox paylaşılan şey oldu. Amma bizim ilk görüşümüz belə deyildi, əksinə, hətta görüş faktı da əsasən neqativ fonda idi, niyə Ermənistan Respublikasının baş naziri belə bir görüş keçirməlidir və s. Düzünü desəm, bunu nailiyyət hesab edirəm və bunu pessimistlərə deməyimin səbəbi də budur ki, bu istiqamətin və bu siyasətin uğursuzluğunu qeyd etmək hələ tezdir", - deyə baş nazir bildirib.

Paşinyan onu da qeyd edib ki, Ermənistan-Türkiyə münasibətlərinin normallaşması zaman məsələsidir: "Əgər biz bu prosesə çox konkret qəsdən ziyan vurmasaq, fikrimcə, Ermənistan-Türkiyə münasibətlərinin normallaşması indi zaman məsələsidir".