Ukrayna İranın Rusiyaya verdiyi daha 10 PUA-nı məhv edib
Ukrayna hava hücumundan müdafiə qüvvələri Rusiyanın kütləvi zərbəsi zamanı 90-dan çox qanadlı raketdən 73-nü, eləcə də İrandan işğalçılara verilmiş 10 pilotsuz təyyarəni vurub.
Avrasiya.net xəbər verir ki, bu barədə Ukrayna Hərbi Hava Qüvvələri Komandanlığının Teleqramda yaydığı məlumatda bildirilib.
Qeyd edilib ki, rusiyalı işğalçılar Ukraynanı havadan və dənizdən qanadlı raketlərlə vurublar.
Kütləvi raket buraxılışı üçün Rusiya 14 Tu-95 strateji raketdaşıyıcısı, Rusiya Qara Dəniz Donanmasının gəmiləri və İranın "Şahed-136/131" kamikadze-hücum pilotsuz təyyarələrini cəlb edib.
“Ümumilikdə 90-dan çox qanadlı raket atılıb: 70-i Xəzər dənizinin şimalından və Volqodonskdan (Rostov vilayəti), 20-si Qara dənizdən və 10 kamikadze pilotsuz uçan aparatdan istifadə olunub”, - deyə məlumatda bildirilir.
İlkin məlumatlara görə, hava hücumundan müdafiə qüvvələri düşmənin 73 qanadlı raketini və 10 kamikadze pilotsuz təyyarəsinin hamısını məhv edib.
Hərbçilər vurğulayırlar ki, düşmən Ukraynanın mühüm infrastrukturuna qarşı yüksək dəqiqlikli silahlardan istifadə etməkdə davam edir. Həmçinin raket zərbələri nəticəsində yaşayış binalarına da ziyan dəyib.