Ermənistanda güllələnən gənc hərbi qulluqçudur – İnsidentin təfərrüatı

Ermənistanın Araqatsotn bölgəsində baş vermiş silahlı insidentin təfərrüatı açıqlanıb.

Ermənistan KİV xəbər verir ki, silahlı insident zamanı 7 nəfər yaralanıb. Onlardan biri xəstəxanada ölüb.

Polis əməkdaşları hadisənin Niqavan kənd inzibati ərazisində baş verdiyini bildiriblər.

Son məlumata görə, insident zamanı ölən şəxs - Hmayak Mikaelyan Müdafiə Nazirliyinin hərbi hissələrindən birinin hərbi qulluqçusu olub.

Xatırladaq ki, ötən gün saat 20:30 radələrində Aparan tibb məntəqəsindən yerli polis şöbəsinə 7 vətəndaşın onlara güllə yarası ilə daxil olması barədə məlumat verilib. Həkimlər hüquq-mühafizə orqanlarının əməkdaşlarına bildiriblər ki, yaralılardan biri özünə gəlmədən dünyasını dəyişib.
 Bir sıra Ermənistan KİV-lərinin məlumatına görə, hakim “Mülki müqavilə” partiyasından olan deputat Matevos Asatryanın qohumları və Araqatsotn vilayətinin hökumətyönlü qubernator müavininin əmisi oğlu Edqar Pırvanyanın qohumları bir qrup gənclə əlbəyaxa dava ediblər.

Nəticədə yuxarıda adı çəkilən şəxslər (Matevos və Edqarın qohumları və dostları) Kalaşnikov avtomatından gənclərə atəş açmağa başlayıblar. Dava iştirakçılarından biri yerindəcə ölüb, bir neçə nəfər müxtəlif dərəcəli bədən xəsarətləri alıb. Hadisə rayonun Niqavan kəndi yaxınlığında baş verib.

Mətbuatın yazdığına görə, hakim partiya üzvlərinin yaxınları gəncləri Ermənistanın hazırkı baş naziri Nikol Paşinyanı söydüyünə görə güllələyiblər.