İranda qatar qəzasında ölənlərin sayı 21-ə çatıb

İranda sərnişin qatarının Tebes şəhəri yaxınlığında qəzaya uğraması nəticəsində ölənlərin sayı 21-ə çatıb.

Bu barədə Tebes şəhərinin fərmandarı Əli Əkbər Rəhimi jurnalistlərə bildirib.

O qeyd edib ki, hadisə yaşayış məntəqəsindən uzaqda baş verdiyi üçün yaralılar təcili yardım helikopteri ilə xəstəxanaya çatdırılıb.

İran Dövlət Dəmir Yolları İdarəsinin açıqlamasına görə, qəzanın səbəbini aydınlaşdırmaq üçün 6 nəfər mütəxəssisdən ibarət komissiya yaradılıb. Hazırda komissiya üzvləri hadisə yerində araşdırma aparırlar. İlkin məlumata görə, qatar ekskavator ilə toqquşub. Qatarın hərəkəti vaxtı ekskavatorun dəmir yolunda olması təəccüb doğurur. Bu məsələlərlə hüquq-mühafizə orqanları məşğul olur. Artıq İranın Baş Prokurorluğu hadisə ilə bağlı cinayət işi açıldığını bəyan edib.

İstintaq təqsirkarları müəyyən etməyə çalışır.