“Ukraynada xüsusi əməliyyat tezliklə başa çatacaq” - Rusiyalı senator

“Rusiyanın Ukrayna və Donbasdakı xüsusi əməliyyatı tezliklə başa çatacaq”.

Modern.az RİA Novosti-yə istinadən xəbər verir ki, bunu Rusiya Federasiya Şurasının üzvü Andrey Klimov deyib.

Onun sözlərinə görə, Rusiya "xüsusi əməliyyat"ın keçirilməsini qəsdən “uzatmaq” niyyətində deyil.

Andrey Klimov bildirib ki, “hərbi mərhələnin” başa çatması üçün şərt Ukraynanın Rusiya və dünya üçün təhlükəsiz dövlətə çevrilməsi idi.

Klimov əlavə edib ki, bunun üçün Rusiya nüvə obyektlərinin təhlükəsizliyini təmin etməli və Ukrayna bioloji laboratoriyalarının işini öyrənməlidir.

Bundan əvvəl Rusiya Müdafiə Nazirliyi Ukraynanın 14 yaşayış məntəqəsində 30 bioloji laboratoriyanın göstərildiyi xəritəni nümayiş etdirib. İddia edilib ki, həmin laboratoriyalar "tam miqyaslı hərbi bioloji fəaliyyətlərdə iştirak edir".

Rusiya Ukraynada “xüsusi əməliyyat” adlandırdığı müharibəni fevralın 24-də başlayıb.