Kreml separatçı respublikaları bu sərhədlər daxilində TANIYIB
Rusiya Ukrayna ərazisindəki separatçı “Donetsk və Luqansk xalq respublikaları”nın hansı sərhədlər daxilində tanıdığını açıqlayıb.
Rusiya prezidentinin mətbuat katibi Dmitri Peskov bildirib ki, Kreml “Donetsk və Luqansk xalq respublikaları”nı özlərini elan etdikləri sərhədlər daxilində tanıyır.
Eyni zamanda, o qeyd edib ki, Rusiya Federasiyasının onları tanımasına baxmayaraq, DXR və LXR-də vəziyyət hələ də təlatümlüdür.
Peskov jurnalistlərə deyib:
“Bir çox vətəndaşlar təhlükə hiss edir, ona görə də müvəqqəti olaraq Rusiyaya gəlməyə qərar verirlər”.
Xatırladaq ki, fevralın 21-də Rusiya prezidenti Təhlükəsizlik Şurasının fövqəladə iclasından sonra Rusiya Federasiyası vətəndaşlarına müraciəti zamanı LXR və DXR-n suverenliyinin tanınması barədə qərar qəbul etməyi zəruri hesab etdiyini bildirib. Müraciətdən dərhal sonra Putin Kremldə LXR və DXR-i tanıyan fərmanlar imzalayıb.
