Rusiyadan Telman İsmayılova görə monteneqrolu dövlət katibinə QADAĞA
Monteneqronun əslən Azərbaycandan olan rusiyalı iş adamı Telman İsmayılova siyasi sığınacaq verməsinə cavab olaraq bu ölkənin Daxili İşlər Nazirliyinin dövlət katibi Zoran Milyaniçin Rusiya Federasiyasına girişi qadağa olunub.
Bu barədə Rusiya Xarici İşlər Nazirliyi məlumat yayıb.
XİN-in məlumatında bildirlib ki, fevralın 2-də Zoran Milyaniçin Rusiya Federasiyasına girişini qadağan nota Monteneqronun Moskvadakı səfirliyinə göndərilib.
“Bu tədbir Monteneqro hakimiyyətinin 2021-ci ilin oktyabrında atdığı qeyri-dost addıma - Rusiya Federasiyasının ərazisində xüsusilə ağır cinayətlər törətdiyinə görə İnterpol xətti ilə beynəlxalq axtarışa verilmiş Rusiya Federasiyası vətəndaşı Telman İsmayılova siyasi sığınacaq verilməsinə cavabdır”,- deyə Rusiya XİN-in məlumatında deyilir.
Xatırladaq ki, Moskvadakı “Çerkizovski” bazarının keçmiş sahibi, əslən azərbaycanlı iş adamı T.İsmayılov Monteneqrodan siyasi sığınacaq alıb. Rusiya Baş Prokurorluğu Monteneqronun Daxili İşlər Nazirliyi və Ədliyyə Nazirliyinə iş adamına sığınacaq verilməsi qərarının ləğvi üçün müraciət göndərib. Ancaq qarşı tərəf buna məhəl qoymayıb.
Rusiya T.İsmayılovu iş adamları Vladimir Savkin və Yuri Brılyovun qətlini sifariş verməkdə ittiham edir.