Paşinyan müharibə anonsu verdi...

Ermənistanın keçmiş prezidenti Serj Sərkisyan Baş nazir səlahiyyətlərini icra edən Nikol Paşinyanı ölkəni vətəndaş müharibəsinə sürükləməkdə ittiham edib.

Axar.az xəbər verir ki, öz tərəfdarları qarşısında çıxışında Sərkisyan Paşinyanı provokasiyada günahlandırıb.

“Bu adam (Nikol Paşinyan – red.) açıq şəkildə deyir ki, əgər 60 faiz səs toplamasam, problem yaranacaq. O, nə istəyir, onu da edir. Siz görürsünüz onun əlində nə var”, - Sərkisyan Paşinyanın əlində çəkiclə çıxış etməsinə işarə edərək deyib.

Sərkisyanın sözlərinə görə, bu çəkicin kim üçün olduğunu müəyyən etmək lazımdır:

“Hər şeyi gördük – müharibədə məğlubiyyəti, minlərlə gəncin ölümünü. Nə qaldı? Yalnız vətəndaş müharibəsi. Qoy bunu da göstərsin”.

Qeyd edək ki, Ermənistanda 20 iyuna təyin edilən seçkilərlə bağlı təbliğat qarşıdurmalar, təhqirlər və ağır ittihamlarla müşayiət olunur.