"Qərb İlham Əliyevin yürütdüyü siyasətin və siyasi qətiyyətin qarşısında məğlub oldu"
Ermənistan-Azərbaycan münaqişəsində beynəlxalq təşkilatların rolu, demək olar ki, bütün dönəmlərdə ikili standartlar və siyasi maraqlar üzərindən qurulmuş, amma, Azərbaycanın realist strategiyası qarşısında öz niyyətlərinə nail ola bilmədilər.
Bunu Avrasiya.net-ə politoloq Çingiz Şahbazi deyib.
"Azərbaycan Prezidenti İlham Əliyevin, münaqişə ilə bağlı səsləndirdiyi fikirlər, heç şübhəsiz ki 1990-2000-ci illərdə Qarabağ münaqişəsinin beynəlxalq müstəvidə necə idarə edildiyinə dair fundamental siyasi baxış olaraq, xüsusilə də ATƏT-in Minsk qrupunun fəaliyyətinə dair verilən qiymət olaraq dəyərləndirmək olar. ATƏT-in Minsk qrupu (ABŞ, Fransa, Rusiya) formal olaraq vasitəçi, praktikada isə status-kvonun qoruyucusu rolunu oynadı. Əslində ikili standartlar çərçivəsində həyata keçirilən bu siyasət, müasir dövrün paradoksu olaraq indi də tətbiq olunur. Ermənistanın həyata keçirdiyi işğal faktı beynəlxalq təşkilatlar tərəfindən, xüsusilə də BMT Təhlükəsizlik Şurası tərəfindən 4 qətnamə qəbul edilərək tanınmasına rəğmən, Ermənistanı qəbul edilmiş qətnamələrə əməl edilməsinə məcbur edən mexanizm, heç bir halda tətbiq edilmədi" - politoloq deyib.
Onun fikrincə, bütün hallarda və dövrlərdə Ermənistan qınanma əvəzinə, təzyiq mexanizmi tətbiq olunması lazım olduğu halda, əksinə himayə olunurdu və müdafiə edilirdi. Əslində baş verənləri beynəlxalq hüququn əsil siması və bariz nümunəsi olaraq qeyd etmək lazımdır.
Beynəlxalq aktyorlar üçün bu vəziyyət idarə olunan sabitlik olaraq qələmə verilsə də, əslində isə ədalətin ortadan qaldırılmasına təşəbbüs idi. Azərbaycan torpaqlarının işğalçı Ermənistan tərəfindən işğalda saxlanması, beynəlxalq aktyorlar tərəfindən problem olaraq dəyərləndirilir, amma, Azərbaycan öz torpaqlarını azad etmək üçün güc tətbiqindən istifadə edəcəyini bildirdiyi zaman, bunu təhlükə olaraq qiymətləndirən və yanaşan Qərb və həmsədr ölkələr, sonda Azərbaycan Prezidenti İlham Əliyevin yürütdüyü siyasətin və siyasi qətiyyətin qarşısında məğlub oldular.
Torpaqları işğalda qalan Azərbaycanı səbrli olmağı tövsiyə edən Avropa təfəkkürü, Azərbaycanı fakt qarşısında təslim olmağa min bir cəhdlə çalışır və Prezident İlham Əliyevin dediyi kimi, Azərbaycanı mövcud durumu qəbul etməyə məcbur etmək cəhdləri edirdi.
O, qeyd edib ki, işğalçı Ermənistan mütəmadi olaraq ABŞ və Avropa ölkələrindən yardımlar alır, ABŞ Konqresində isə 907-ci düzəliş uzun müddət Azərbaycana təzyiq mexanizmi olaraq saxlanıldı. Ermənistan mütəmadi silahlandırılır və Qərb bunu "regional balans" adı altında legitimləşdirməklə işğalçı və separatçı Ermənistana dəstək verməklə məşğul olurdu.
"Əlbəttə ki bütün bunlar ABŞ və Avropa İttifaqı ölkələrinin adına yaraşmayan addımlar olaraq tarixə keçdi və Azərbaycan öz ərazi bütövlüyünü bərpa edəcək gücü əldə edərək, 44 gün ərzində torpaqlarını erməni işğalından azad etməyə müyəssər oldu. Azərbaycan Prezidenti İlham Əliyevin xüsusi olaraq vurğuladığı, ATƏT-in Minsk qrupunun yarıtmaz və anti-Azərbaycan fəaliyyəti ilə bağlı və həmsədrlərin ölkəmizə qarşı çirkin məqsədləri, onların mövcud problemi həll etmək əvəzinə işğalı əbədi etmək istəkləri, Ermənistana haqq qazandırmaq, Azərbaycan xalqını və dövlətini işğalla barışdırmaq cəhdlərinə qarşı Azərbaycanın qəti mövqeyi, siyasi davranış modeli, bütün təzyiqlərə baxmayaraq haqlı mövqeyindən geri addım atmaması, əlbəttə ki, siyasi təcrübə və cəsarətli mövqe nümayiş etdirməklə yanaşı, həmçinin, ordu quruculuğu, daxili sabitliyin təmin olunması istiqamətində atılan addımlar və enerji diplomatiyası ilə iqtisadi inkişafa nail olmaq, nəticədə 2020- ci ildə işləməyən beynəlxalq hüquqa alternativ olaraq öz suveren hüququndan istifadə etmək məcburiyyətində qalaraq, işğalçı və separatçı Ermənistana qarşı yüksək göstəricilər nəticəsində o, böyük qələbəni əldə etdi".
Ç.Şahbazi onu da qeyd edib ki, Azərbaycan həmçinin beynəlxalq hüquqda yeni mərhələ açdı və bu, "uzanan münaqişə" anlayışını dağıtdı. Hüquq, yalnız güc və iradə ilə tamamlananda işlək olur və beynəlxalq hüquq o zaman sənin tərəfində olmağa məcbur qalır. Azərbaycan Prezidenti İlham Əliyev, bunun həyata keçirilməsi üçün nə lazımdırsa hamısını edə bildi və bu gün bütün dünya, hətta işğalçı Ermənistan belə bundan dolayı Azərbaycanı eşitmək məcburiyyətindədir:
"Bu bir reallıqdır və bu reallığı həyata keçirən Ali Baş Komandan cənab prezident İlham Əliyevin yürütdüyü siyasətin nəticəsidir ki, bu gün Azərbaycan dünyada qalib gələn ölkə kimi tanınır və regionda əsas söz sahibinə çevrilib".
