"Qarabağ"da aldığı 700 min manatın artırılmasını istədi - Klubu tərk etdi

Yay transfer pəncərəsində "Qarabağ"ı tərk edəcək ilk futbolçunun adına aydınlıq gəlib.

Avrasiya.net xəbər verir ki, Qol.az-ın məlumatına görə, Ağdam klubunun yarımmüdafiəçisi Yassin Benzia komandanı tərk edib. Əlcəzair millisinin üzvü olan 30 yaşlı yarımmüdafiəçi klubla maliyyə məsələlərində razılığa gələ bilmədiyinə görə "Qarabağ"dan ayrılıb.

Beləliklə, tərəflər bu yay başa çatan müqaviləni uzatmayacaqlar.

Məlumata görə, Benzia burada qalması üçün yüksək maaş tələb edib. Klub isə Benzianın şərti ilə razılaşmayıb. Benzianın bunadək "Qarabağ"da illik 700 min manat qazandığını bildirilir. Lakin o, komandadakı uğurlu oyundan sonra yeni müqavilədə maaşının xeyli artırılmasını istəyib.

Futbolçunun karyerasını Səudiyyə Ərəbistanının klublarından birində davam etdiricəyi gözlənilir. Həmin ölkə klublarından birinin onun maddi tələblərinə cavab verdiyi bildirilir.

Benzia 2023-c ilin yanvarından "Qarabağ"da oynayırdı. o, bu komandada 104 oyun keçirib, 28 qol vurub, 25 qolun isə ötürməsini edib. "Qarabağ"dakı çıxışlarından sonra Benzia yenidən Əlcəzair millisinı dəvət almışdı.