Minifutbol üzrə Şabran rayon çempionatının final oyunu keçirilib

08 may 2025-ci il tarixdə Şabran şəhər "Bayraq Meydanı"nda yerləşən süni örtüklü mini meydançada Şabran Rayon İcra Hakimiyyəti, Yeni Azərbaycan Partiyası Şabran rayon Təşkilatı və Quba-Xaçmaz Regional Gənclər və İdman İdarəsinin Şabran rayonu üzrə gənclər və idman sektorunun birgə təşkilatçılığı ilə Ümummilli Lider Heydər Əliyevin anadan olmasının 102-ci ildönümünə həsr olunmuş idarə, müəssisə və təşkilatlar arasında minifutbol idman növü üzrə Şabran rayon çempionatının final oyunu keçirilmişdir.

Tədbirdən əvvəl Azərbaycan Respublikasının Dövlət Himni səsləndirilmiş, respublikamızın ərazi bütövlüyünün qorunması, bərpası və torpaqlarımızın işğaldan azad edilməsi uğrunda döyüşlərdə şəhidlik zirvəsinə ucalan Vətən övladlarının əziz xatirəsi bir dəqiqəlik sükutla yad edilmişdir.

Final oyununda Şabran Rayon İcra Hakimiyyətinin başçısı Asif Hüseynov, Yeni Azərbaycan Partiyası (YAP) Şabran rayon Təşkilatının sədri Mehdi Balabəyov, Quba-Xaçmaz Regional Gənclər və İdman İdarəsinin rəisi Qumru Məmmədova, Şabran şəhər bələdiyyəsinin sədri Fidan Fərzəliyeva, hüquq mühafizə orqanlarının rəhbərləri, idarə, müəssisə və təşkilat rəhbərləri, Partiya fəalları iştirak etmişdir.

Rayon çempionatında ümumilikdə 15 idarə, müəssisə və təşkilat komandaları olmaqla 165 nəfər iştirak etmişlər.

Gərgin və maraqlı keçən final oyununda “Şabran Yaradıcılıq-İstirahət Kompleksi” və “İcra Hakimiyyəti” komandaları arasındakı oyun 1-1 hesabı ilə başa çatmış, penallaşmada “Şabran Yaradıcılıq-İstirahət Kompleksi” komandası 2:0 hesabı ilə qalib gəlmişdir.
Qalib komandalar Şabran Rayon İcra Hakimiyyəti, YAP Şabran rayon Təşkilatı, Şabran şəhər Bələdiyyəsi və Quba-Xaçmaz Regional Gənclər və İdman İdarəsi tərəfindən kubok, medal və fəxri fərmanlarla təltif olunmuşlar.