“Şahin” hərbi-idman oyunu üzrə rayon birinciliyinə yekun vurulub
Aprelin 13-də şəhər stadionunda Siyəzən Rayon Gənclər və İdman İdarəsi, Səfərbərlik və Hərbi Xidmətə Çağırış üzrə Dövlət Xidmətinin Siyəzən rayon bölməsi və Təhsil şöbəsinin birgə təşkilatçılığı ilə rayon tam orta məktəblərinin VIII və X sinif şagirdləri arasında “Şahin” hərbi-idman oyunu üzrə rayon birinciliyi keçirilib.
Gənc nəslə vətənpərvərlik hisslərinin aşılanması, hərbi vətənpərvərlik tərbiyəsi işinə diqqətin artırılması, gənclərin hərbi və fiziki hazırlığının yüksəldilməsi, hərbi-idman oyunları vastəsilə gənclərin hərbi xidmətə hazırlıq səviyyəsinin yüksəldilməsi, həmçinin yarışın zona mərhələsində iştirak edəcək komandanın müəyyənləşdirilməsi məqsədi daşıyan yarışda qalib adı uğrunda şəhər və kənd tam orta məktəblərin komandaları mübarizə aparıb.
Tədbirin açılış mərasimində Vətən müharibəsi şəhidlərinin xatirəsi bir dəqiqəlik sükutla yad olunub, şagirdlərə yarışın məqsədləri haqqında məlumat verilib. Daha sonra iştirakçı komandalar təntənəli keçid, mahnı ilə keçid, sıra hazırlığı, fiziki hazırlıq, turnikdə dartınma, 100 metr məsafəyə qaçış, mülki müdafiə hazırlığı, əleyhqazdan istifadə, zəhərli zonanın dəf olunması və digər mərhələlər üzrə qüvvələrini sınayıblar. Ən yüksək nəticə göstərən şəhər 1 saylı tam orta məktəbin komandası I yeri tutaraq yarışın rayon mərhələsinin qalibi olub. Şəhər 3 saylı tam orta məktəbin komandası II, Böyük Həmyə kənd tam orta məktəbin komandası isə III yeri tutub.
Yarışda yer tutan komandalar Gənclər və İdman İdarəsi tərəfindən fəxri fərmanlarla təltif olunublar. I yeri tutan şəhər 1 saylı tam orta məktəbin komandası eyni zamanda “Şahin” hərbi-idman oyununun aprel ayının sonunda Sumqayıt şəhərində keçiriləcək zona mərhələsində rayonu təmsil etmək hüququ qazanıb.
#Şahin #SiyəzənGİİ #AZEyouth #AZEgənc #Gənclərİdman
