Almaniya Rusiyaya qarşı Polşaya qırıcılar yerləşdirib
Almaniya NATO-nun şərq cinahını gücləndirmək üçün bölgəyə yeni qırıcı təyyarələr və hərbçilər yerləşdirib.
APA xəbər verir ki, Almaniyanın Müdafiə Nazirliyi, pilotlar, texniki işçilə, təhlükəsizlik qrupları və hərbi polis daxil olmaqla, Almaniya Hərbi Hava Qüvvələrindən təxminən 150 nəfərlik bir qrupun Polşaya göndərildiyini açıqlayıb.
Açıqlamada həmçinin bölgəyə əlavə olaraq, Almaniyanın Şimali Reyn-Vestfaliya əyalətindəki Nörveniç HHQ bazasından bir neçə “Eurofighter” qırıcı təyyarəsinin də Polşadakı Malbork hərbi hava limanına yerləşdirildiyi bildirilir.
Almaniyanın sözügedən qüvvələri bölgəyə yerləşdirməsinin səbəbi olaraq Rusiya qırıcı təyyarələrinin Baltik dənizi bölgəsində hava məkanını pozmasının və pilotsuz uçuş aparatlarının (PUA) NATO ərazisinə daxil olmasının qarşısını almaq göstərilib.
Almaniya tərəfindən Polşada yerləşdirilən yeni bölmə və döyüş təyyarələrinin gələn ilin mart ayına qədər xidmətdə qalması planlaşdırılır.
