Dünyanın ən yaşlı edam məhbusu azadlığa çıxıb
Yaponiyada 57 ildir edam hökmünün icrasını gözləyən 88 yaşlı İvao Hakamada məhkəmənin ona qarşı sübutların uydurma olduğuna qərar verməsindən sonra bəraət alıb.
Bununla da dünyanın ən yaşlı edam məhbusu azadlığa çıxıb.
Hakamada 1968-ci ildən müdirini, həyat yoldaşını və iki uşağını öldürməkdə ittiham olunurdu. Uzunmüddətli həbs və edam olunacağını gözləmək onun psixi sağlamlığına təsir edib. Bu səbəbdən bəraət qərarının elan olunduğu iclasda iştirak edə bilməyib. O, 2014-cü ildən bacısının himayəsindədir.
Qətldə ittiham olunan Hakamadanın vəkilləri ittihamda istifadə edilən qanlı paltarın DNT-sinin müvəkkillərinə aid olmadığını iddia ediblər. Məhkəmə araşdırmalardan sonra paltardakı qırmızı ləkələrin qan olmadığı qənaətinə gəlib.
BBC-nin məlumatına görə, Hakamadanın işi Yaponiyanın ən uzun və ən məşhur hüquqi mübarizələrindən birinə çevrilib. Məhkəmə zalında yer almaq üçün 500-dən çox insan növbəyə düzülüb. Qərar alqışlarla qarşılanıb.
Qeyd edək ki, Yaponiyada ölüm cəzası hələ də tətbiq olunur. Bu ölkə ABŞ-la birlikdə G7 ölkələri arasında hələ də ölüm cəzasını tətbiq edən iki dövlətdən biridir.
Hakamadanın 91 yaşlı bacısı Hideko uzun illər qardaşının azadlığa buraxılması üçün mübarizə aparıb: "Nəhayət, ağırlıq çiyinlərimdən götürüldü".
