Prezidentin köməkçisi İranın səfiri ilə görüşübAzərbaycan Respublikası Prezidentinin köməkçisi, Prezident Administrasiyası xarici siyasət məsələləri şöbəsinin müdiri Hikmət Hacıyev İran İslam Respublikasının ölkəmizdəki səfiri Seyid Abbas Musəvi ilə görüşüb.

APA-nın məlumatına görə, Hikmət Hacıyev görüşlə bağlı tvitter səhifəsində paylaşım edib.

“Bizi ziyarət etdiyiniz üçün sizə təşəkkür edirəm. Həqiqətən də gündəlikdəki ikitərəfli məsələlər üzrə səmərəli müzakirələr apardıq və gələcək perspektivləri nəzərdən keçirdik”, deyə Prezidentin köməkçisi vurğulayıb.

Qeyd edək ki, İranın Azərbaycandakı səfiri Seyid Abbas Musəvi də görüşlə bağlı tvitter səhifəsində paylaşım edib: “Azərbaycan Respublikası Prezidentinin köməkçisi Hikmət Hacıyevlə görüşməkdən məmnunam. İkitərəfli əlaqələrimizin son inkişaflarını və ümumi maraq doğuran məsələləri müzakirə etdik”.
TƏBİB: “Vaksindən sonra yoluxmaqdan qorxmaq lazım deyil”Azərbaycanda yeni növ koronavirus infeksiyasına yoluxma sayları bir müddət artan xətt üzrə getdi, sonra eniş başladı. Hazırda yoluxma hallarında stabillik müşahidə olunur. Bundan əlavə, xəstəlikdən sağalanların sayı yoluxanların sayını ötür. Bu da müsbət haldır. Çünki rəqəmlər yüksəldiyi və uzun müddət proses belə davam etdiyi zaman aktiv xəstə sayı da çox olur. Bu zaman onlar arasında ağırlaşanlar və hospitalizasiyaya ehtiyacı yarananların da faizi artır. Nəticədə xəstəxanalar və həkimlər yüklənirlər. Hazırkı stabilləşmə və azalma müsbət halın göstəricisidir.

Avrasiya.net xəbər verir ki, bunu TƏBİB-in infeksion xəstəliklər üzrə işçi qrupunun həkim-infeksionisti Nəzrin Mustafayeva deyib.

Onun sözlərinə görə, xəstəliyin profilaktikası daha asandır, nəinki ona yoluxduqdan sonra müalicəsi. Həkim qeyd edib ki, xəstələnməməyə çalışmalıyıq:

“Peyvəndlər hər xəstəliyin profilaktikasında tətbiq olunmur. Əsasən infeksion xəstəliklərin profilaktikasında vaksinlərdən istifadə oluna bilir. Əsrlərdir həmin təcrübə davam edir və kifayət qədər müsbət nəticələr əldə olunub. Hətta bəzi xəstəliklərin kökü kəsilib”.

“Koronavirus infeksiyası ilə mübarizədə şanslı tərəfimiz ondan ibarətdir ki, qısa müddət ərzində kifayət qədər effektiv və təhlükəsizliyi sübuta yetirilmiş peyvəndlər hazırlanıb. Ölkə olaraq daha bir avantajımız bir neçə vaksin növündən istifadə edəbilmə imkanına malik olmaqdır. Doqquz aya yaxındır ki, ölkədə koronavirus əleyhinə kütləvi vaksinasiyaya başlanılıb. Burada ilkin məqsəd immunitet qazanaraq xəstəlikdən qorunmaqdır. Yoluxma sayının yüksəkliyi vətəndaşları çaşdıra bilir. Bildirmək istərdim ki, peyvənd olunan şəxslər də yoluxa bilərlər. Peyvənd bizi yoluxmadan qorumur. Vaksinin hər iki dozasını qəbul etdikdən sonra yoluxmaqdan qorxmaq lazım deyil. Çünki immunitet yaranır, xəstəliyi ağır keçirməkdən, xəstəxanaya, reanimasiyaya düşməkdən və ən başlıcası ölümdən qorunmuş oluruq. Digər bir məqam odur ki, kütləvi peyvəndləmə yoluxma zəncirinə də təsir göstərir. Bir çox ölkələr peyvənd yaşını minimuma qədər endirməyə çalışırlar. Bunun da başlıca səbəbi ümumi olaraq cəmiyyətdə yoluxma zəncirini qırmaqdır”, - deyə TƏBİB nümayəndəsi qeyd edib.


"İran Azərbaycandan üzr istəməlidir!"Əlisahib Hüseynov
Milli Həmrəylik Partiyasının sədri

İrana məxsus yük maşınlarının yenidən Rusiya sülhməramlılarının müvəqqəti nəzarətində olan Azərbaycan ərazilərinə qanunsuz keçməsi və Xankəndidəki erməni separatçılarına dəstək məqsədli yüklərin daşınması ilə bağlı yeni faktların aşkarlanması bir daha onu göstərir ki, əslində bu ölkənin bizimlə əsla səmimi dostluq etmək, mehriban qonşuluq siyasəti yürütmək niyyəti, istəyi yoxdur. Bizim bütün ciddi-cəhdlərimizə baxmayaraq İran bizə qarşı “ikili standartlar” siyasətindən çıxış etməyinə davam edir, üzdə Azərbaycana “dost” mövqeyi nümayiş etdirsə də, ancaq altdan-altdan isə quldur və terrorçu, təcavüzkar Ermənistanı bəsləməyə üstünlük verir.

Təəssüf ki, İranın gerçək üzü üzsüzlükdən, riyakarlıqdan ibarətdir. Cənub qonşumuz Azərbaycan Respublikasının bütün səmimi niyyətlərinə və əsl qonşuluq davranışlarına baxmayaraq daim ölkəmizin varlığından xoflanır. Mollalar Azərbaycan Respublikasının varlığına güney azərbaycanlıların milli oyanışı üçün təkan rolunu oynaya biləcək əsas faktor kimi baxdıqları üçün daim narahatlıq hissi yaşayırlar. Onların Azərbaycan Respublikasına və İranda yaşayan 40 milyona yaxın Azərbaycan türkünə soyuq münasibətlərinin heç vaxt dəyişməməsi də məhz bu amildən irəli gəlir. Necə deyərlər, “xain həmişə xoflu olar”.

Ancaq İranın bu xofu ilk növbədə bu ölkənin özünə zərər verir və eyni zamanda Azərbaycan-İran münasibətlərinin daha sağlam müstəviyə keçməsinə bir qayda olaraq mane olur. Odur ki, rəsmi Tehran Azərbaycana münasibətdə bu ənənəvi stereotiplərindən əl çəkməli, yeni qonşuluq fəlsəfəsindən çıxış etməlidir. Yeni qonşuluğun ilk və əsas prinsiplərindən biri isə bu ölkənin Azərbaycanın ərazi bütövlüyünə hörmətlə yanaşması olmalıdır. İran Qubadlıdan öz yük maşınlarının Ermənistana keçidinə və eləcə də Xankəndinə qeyri-qanuni yüklərin daşınmasına son qoymalıdır. İran bu hərəkətlərinə görə Azərbaycandan üzr istəməlidir!

"İranı başa salmalıyıq ki..."Rəfail Becanov

İrandan Ermənistana, oradan da Azərbaycana, yəni Xankəndinə Azərbaycandan icazə alınmadan humanitar yardım adı altında yük maşınlarının hərəkəti Azərbaycanda haqlı etiraz doğurur.

İranın bu şəkildə davranması Azərbaycanın suverenliyinə, onun müstəqilliyinə, sərhədlərinin toxunulmazlığına müdaxilə cəhdi kimi qiymətləndirilməlidir.

İran höküməti buna görə məsuliyyət daşıyır və cavab verməlidir. Azərbaycan ordusu haqlı olaraq indi həmin yolda nəzarəti tam bərpa edib və bütün gəlib gedənləri yoxlayır. Biz bilmirik ki, İran humanitar yardım adı altında o maşınlarda, orada yaşayan ermənilərə nə göndərir. Bəlkə də humanitar yardım adı altında oraya silah-sursat göndərilir? Bu, ciddi araşdırılmalıdır. Azərbaycanın müvafiq qurumları bununla bağlı ciddi ölçü götürməli və İrana nota verilməlidir.

İranı başa salmalıyıq ki, Azərbaycanın suverenliyinə və müstəqilliyinə, sərhədlərinin toxunulmazlığına, ərazi bütövlüyünə qarşı separatçı mövqeyindən imtina etsin.
44 günlük müharibə zamanı da İran tərəfindən təxribatların ardı-arası kəsilməyib. Sosial şəbəkələrdə, mediada İrandan Ermənistana silah-sursat daşınması ilə bğlı müxtəlif informasiyalar, videolar yayılırdı. Bu onu göstərir ki, İran müsəlman dövləti olmasına baxmayaraq, Azərbaycana yox, Ermənistana bir simpatiyası, sevgisi olub və özünün müsəlman, məzhəb qardaşları ilə deyil, Ermənistanla müttəfiq olub.

İranın Ermənistanla olan müttəfiqliyi bizim torpaqlarımız işğal altında olanda da bilinirdi. 30 illik işğal zamanı Ermənistan Azərbaycan torpaqlarını işğal edib, onun dini dəyərlərini tapdalayanda, məscidlərimiz dağıdılanda, o məscidlərdə donuz saxlanılanda özünü islam dövləti adlandıran İrandn heç zaman təpki və ya etiraz eşidilmədi. Bu, İranın Azərbaycana olan münasibətinin nəticəsi idi.

44 günlük müharibədə biz torpaqlarımızı azad, sərhədlərimizə nəzarəti bərpa etdik. 44 günlük müharibədə təkcə Ermənistan deyil, sanki İran da məğlub olub. Ona görə bu qədər təlaşlıdır və Azərbaycanın suveren hüquqlarına müdaxilə etməklə beynəlxalq hüququ pozur.

Azərbaycan sərhədlərini keçən və dövlətin icazəsi olmadan onun ərazisində, yollarında hərəkət edən maşınların hərəkəti dayandırılmalı, maşınlar, yüklər müsadirə olunmalı, sürücülərə cinayət işi açılmalı və onlar həbs edilməlidir. Əgər bu hal təkrarlanarsa, onda o maşınlar dərhal vurulmalıdır ki, bu, başqalarına da dərs olsun. Hər kəs bilsin ki, Azərbaycan torpaqlarını, sərhədləri pozmaq, Azərbaycan ərazilərində icazəsiz və qanunsuz hərəkət edən bütün subyektlər bu şəkildə məhv ediləcək.

İran hakimiyyəti bu əməlləri ilə bağlı ciddi düşünməli və ölçü götürməlidir. Nəzərə almalıdır ki, Azərbaycanın, eyni zamanda azərbaycanlıların səbrini daşdırmaq olmaz. Ona görə ki, İranda 40 milyon azərbaycanlı yaşayır və onların səbri daşanda İranın bu günki siyasətinə bir dəfəlik nöqtə qoyulacaq və İranın bu günki hakimiyyəti, indiki rejimi hakimiyyətdən birdəfəlik tarixin arxivinə gedəcək.
Göyçay sakini itkin düşdü - FotoGöyçay rayonunun Qaraman kənd sakini, 2001-ci il təvəllüdlü Fuad Məzahir oğlu Mustafayev ötən gün yaşadığı evdən çıxaraq geri qayıtmayıb.

Fuadın ailə üzvləri bununla bağlı Göyçay rayon Polis Şöbəsinə müraciət ediblər. Polis əməkdaşları onu itkin kimi qeydiyyata alaraq tapılması üçün tədbirlər görürlər. Məlumata görə, Fuad Mustafayev evdən çıxarkən onun əynində göy rəngli gödəkcə, cins şalvar, ayağında göy rəngli çəkələk olub.

Onu görüb tanıyan şəxslərdən 050 - 853-65-21 (Valeh, əmisi oğlu) telefon nömrəsinə zəng edərək məlumat vermələri xahiş olunur.
Fuad Muradov saxlanıldı“Fədailər” hərəkatının rəhbəri Fuad Muradov saxlanılıb.

Avrasiya.net xəbər verir ki, bu barədə hüquqşünas Aslan İsmayılov məlumat verib.

“Uzun müddətdir ki, sosial şəbəkələrdə ictimai aktiv şəxsləri küçə söyüşləri ilə təhqir edib əxlaqsızlıqda bütün əndazələri aşan saxta "fədai" Fuad Muradov haqqında qanuni tədbirlərin görülməsi üçün 10 sentyarda Azərbaycan Respublikasının Daxili İşlər Nazirliyinə müraciət etmişdim. Bu gün ərizə ilə bağlı DİN-nin Baş Mütəşəkkil Cinayətkarlıqla Mübarizə İdarəsinə dəvət edildim və sübutlarımı təqdim etdim. Ərizə üzrə araşdırma davam edir. F.Muradov şübhəli şəxs kimi saxlanılıb və hal-hazırda adıçəkilən idarədədir. Ona görə də mənə F.Muradovun qanunsuzluqları ilə bağlı müraciət edən şəxslərdən xahiş edirəm ki, həmin idarəyə müraciət edib sübutlarını təqdim etsinlər” – A.İsmayılov qeyd edib.

Daxili İşlər Nazirliyinin mətbuat xidmətindən bildirilib ki, hüquqşünas Aslan İsmayılovun müraciəti əsasında Fuad Muradov polisə dəvət olunub: “Onun izahatı alınıb və sərbəst buraxılıb. Hazırda həmin müraciət əsasında araşdırmalar davam etdirilir”.

Qeyd edək ki, özünü “fədai” kimi təqdim edən F.Muradov "Qazaxlı Alik" kimi tanınan Alik Muradovun oğludur.
Paytaxtdan Paytaxta Zəfərin izi ilə – Cəsarət HüseynzadəZəfər yolu dövlətimizin siyasi mərkəzi Bakı şəhərindən, ölkəlimizin mədəniyyət beşiyi Şuşa şəhərinə qədər sözün bütün mənalarında bir yoldur. Bu yol məfkurəmizin, düşüncəmizin yoludur. Bu yol Azərbaycan Əsgərinin, Ali Baş Komandanın yoludur. İllərdir hər birimiz, gücümüz çatdığı qədərində, bütün varlığımız ilə bu yolun yolçularıyıq. Bəli, biz bu yoldayıq, amma hər yolun, hər bir məfkurənin bir rəhbəri var. Zəfər yolu məhz Ali Baş Komandan İlham Əliyevin rəhbərliyi ilə Azərbaycan Ordusunun öz canları və qanları ilə çəkdiyi şərəf və qeyrət yoludur. Bu yol uğrunda qəhrəmancasına həlak olmuş şəhidlərimizin əziz xatirəsi önündə baş əyir, Azərbaycan Ordusu və Cənab Ali Baş Komandana sonsuz təşəkkürümüzü bildiririk.

Gözlənilən yolçuluq!

Var gücümüzlə babalarımızın yaşadığı torpaqlarda daha tez məskunlaşmalıyıq. Dövlət tərəfindən məhz bu istiqamətdə paralel işlər həyata keçirlməkdədir. Mina təmizləmə, tikinti-quruculuq və s. işlərlə paralel olaraq, işğaldan azad olunmuş ərazilərə səfərlər təşkil olunur. İslahatlar dalğasından sonra hökumətin müsbət addımlarından biri də, həyata keçirilən tədbirlərə kompleks yanşama sərgiləməsidir. Ötən dövrdə müxtəlif xarici və yerli siyasətçilərin, deputatların, yerli və xarici jurnalistlərin müxtəlif təşkilatların nümayəndələrinin və Şuşa sakinlərinin bu mədəniyyət ocağına səfərləri təşkil edilmişdir.Bu çərçivədə sentyabrın 11 və 12-də Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin təşəbbüsü ilə 300-ə yaxın QHT nümayəndəsinin də Şuşa şəhərinə səfəri təşkil olundu.Əslində Ağdam səfərində bu haqda məlumatımız var idi və yaxın müddətdə Şuşaya gedəcəyimizi bilirdik. Amma vaxt və zaman keçmək bilmirdi. Vətəndaş cəmiyyəti təşkilatlarının nümayəndələrinin də səbirsizliklə və sevinclə gözlədiyi gün gəldi. İnsafən təşkilatçılar maksimum çalışmışdılar ki, daha çox QHT bu səfərdə təmsil olunsun. Bu səfərləri təşkil etmək (Xüsusən hazırda QHT Agentliyin indi-indi formalaşdığı dövrdə) kifayət qədər çətindir. Hamı getmək istəyir və hər bir şəxsinin mövqeyinə də dözümlü yanaşmaq vacibdir. Yol uzundur, ona görə yox ki, məsafə uzaqdır, sadəcə daha tez çatmaq arzusu var hər bir şəxsin ürəyində. Hamı sakitdir, çünki vacib bir yerə, bir görüşə tələsir. QHT varsa, ictimai siyasi məsələlər də müzakirə olunur heç şübhəsiz. Amma sakit, ən çox 2-3 həmkarla.

Eyni mənzərə, eyni ağrı, eyni dərd və düşmənə qarşı artan nifrət

Yol boyu işğaldan azad olunmuş ərazilərdən keçirik. Eyni mənzərə, eyni ağrı, eyni dərd və düşmənə qarşı artan nifrət. Erməni deyərkən vəhşilik, qəddarlıq gəlir illərdir ağlımıza, düşüncəmizə. Amma illərdir ermənin bu vəhşiliyi, qəddarlığı insana, bir türkə qarşı etdiyin düşünmüşük. Sən demə düşündüyümüzdən də daha qəddar, daha vəhşi imiş bunlar. Təbiəti, torpağı, binanı, körpünü gözlə görünən hər şey alt-üst etməyə hazır imiş bu cəlladlar. Bütün bu ərazilərdə bu vəhşilikləri amansızcasına edib alçaqlar.

Arzuların və ümidlərin yeni müjdəsi

Füzulidən keçirik. Bu yaxınlarda açılışı olan möhtəşəm hava limanını görürük. Tikilən, ucaldılan hər bir bina, hər mərkəz, hava limanı arzuların və ümidlərin yeni müjdəçisidir. Biz bildiyimiz qədər çox vacibdir. Amma bilmədiyimiz qədər daha vacibdir. Atılan hər addımda ölkəmizin təhlükəsizliyinin qorunması üçün o qədər məqamlar var ki, onu bilmək üçün 44 günlük müharibənin necə ustalıqla aparılmasın bilmək lazımdır və yaxud inanmaq lazımdır.

Paytaxt Şuşa

Cənab Prezident Şuşanı Azərbaycanın mədəniyyət paytaxtı elan etdi. Artıq Şuşa təkcə ölkəmizin deyil, bütün Azərbaycanın, dünyada yaşayan 50 milyondan çox azərbaycanlının paytaxtıdır.Şuşa ötən dövrlərdə də paytaxt olub. Şuşa ürəklərin, elə Qarabağımızın da paytaxtı olub.Şuşada olmaq çox qürurvericidir, amma insan çox qarışıq hisslər keçirir. Sevinc və kədər, qürur və məyusluq, sevgi və nifrət… Onlarca bu tip qarışıq hisslər insanı rahat buraxmır. Şəhəri gəzdikcə Azərbaycan ordusunun gücü ilə qürurlanıb, öz şəhərimiz hansı cəsarətlə qaytardığına sevinib, sevgi ilə bu hissləri və hətta sevinc göz yaşlarını paylaşırsan. Eyni zamanda mədəniyyət ocağına vurulan zərbələri görüb kədərlənirsən, Şuşada və digər ərazilərdə ermənilərin törətdiyi bu vəhşiliklərə görə dünyanın laqeydliyinə təəssüflənirsən və bütün bu sadaladığım, sadalamağa zamanın yetməyəcəyi faktlara görə, erməniyə və onun timsalında haqsızlığa qarşı kin və nifrətin püskürürsən. Ali Baş Komandan İlham Əliyevin rəhbərliyi ilə Ordumuzun çox böyük qəhrəmanlığı nəticəsində Şuşa işğaldan azad edilib. Şuşanın hər yerində bu qəhrəmanlığı və qüruru hiss edirsən.Hesab edirəm bu qələbə bütün təmtərağı ilə Şuşanın hər tərəfini bəzəməlidir. Zaman keçdikcə Şuşa sakinləri ilə yanaşı şəhərə gələn qonaqlar bu əziməti və qələbəni görməli və dünyaya ötürməlidirlər. Səfər zamanı hər addımda Şuşada aparılan abadlıq və quruculuq işlərini hiss etdik. Şuşa artıq öz sakinlərinin və sahiblərinin nəfəsi ilə yaşayır, tarixi görkəmini saxlamaqla qurulur və yaxın zamanda ölkəmizin ən inkişaf guşəsinə çeviriləcək.

Müqəddəs torpaq, hava və çörək.

Şəhərə gələn sakinlər və qonaqlar hər biri o müqəddəs torpaqdan bir ovuc götürür. İllərlə Şuşa həsrəti ilə yaşayan, lakın ömrün vəfa etmədiyi, dünyasını dəyişdiyi şuşalılar üçün torpaqdan müqəddəs nə ola bilər? Şuşaya səfər edən şəxslərdən ən çox istənilən rica – Şuşa torpağıdır. Bir övlad borcu, bir dost borcudur Şuşa torpağı. Həmin borcu geniş anlamda Ali baş komadan İlham Əliyevin rəhbərliyi Azərbaycan Ordusu tariximizə qaytardı. Şuşada olarkən gözəl Qarabağ havasını hiss edirsən. Şuşalılar heç şübhəsiz gözü bağlı bu hava ilə öz vətənlərini tanıyarlar.Şuşaya səfər edib, evə qayıdarkən müqəddəs nemətdən – bərəkətdən yaxınlarına, dostlarına gətirmək istəyirsən. Tam səmimiyyətlə deyirəm ki, Şuşa çörəyi fərqli bir nemət idi. O, sahibkara çox təşəkkür edirəm ki, dedikləri kimi doğrudan da fərqli keyfiyyətdə çörək istehsal edirlər. Şəhər nə qədər dağılsa da, laqeydliyə məruz qalsa, hər küçəsi ilə, hər döngəsi ilə tarixin canlı əfsanəsi olduğunu büruzə verir. Çox təəssüf ki, hər addımda da, işğal altında olduğu, baxımsız qaldığı acı bir xatirə kimi gözümüzün önündən getmir. 30 il bundan öncəsi görkəmindən də əsər-əlamət qalmayıb. Amma dövlətimiz saatbasaat, günbəgün gözəlliyini, tarixini və müasirliyi bərpa etmək, qurmaq və yaratmaq üçün çalışır. Zəfər yolu ilə gedərkən, Şuşaya daxil olarkən bu bərpanın və quruculuğun sürətlə getdiyinə və qısa müddətdə yekunlaşacağına heç kimin şübhəsi qalmır.

Cıdır düzü

Cıdır düzü – adından da məlum olduğu kimi, tarixən Qarabağ xanlarının və bəylərinin cıdır yarışlarını keçirdiyi yer olmuşdur. Bundan başqa, Cıdır düzü şuşalılar üçün həm də, toplaşma, müxtəlif bayram və mərasimlərin keçirilmə yeri funksiyasını daşıyıb.İndi Cıdır düzü həm də Xankəndində yaşayan ermənilər üçün ürəklərinə xəncər kimi sancılacaq üçrəngli bayrağın dalğalandığı bir yerdir.

Cəsarət Hüseynzadə
“İnformasiya Təşəbbüslərinə Dəstək” İctimai birliyinin sədri, QHT.az saytının rəhbəri


İşığı böyük, ruhu möhtəşəm Şuşa – ZAUR İBRAHİMLİ YAZIRAzərbaycan Respublikasının QHT-lərə Dövlət Dəstəyi Agentliyinin təşkilatçılığı ilə Şuşaya səfər etmək mənə də qismət oldu. Daosizm təlimində deyilir ki, sözlər fikirlər mütləq həqiqəti və məzmunu ifadə etməkdə gücsüzdür.

Məsələn, anadan kor doğulmuş bir insana işıq barədə hər şeyi öyrədə bilərsən, hətta o işıq haqqında nəzəriyyəni mükəmməl öyrənə bilər. Amma yenə onun təəssüratı nisbi olacaq. Çünki, o, işığı görməyib, onu hiss edə bilmir.

Şuşanı da anlatmaq üçün gərək özün bu hissləri yaşayasan, günlərlə vaxt keçirib küçə-küçə, çığır-cığır gəzəsən, dolaşasan… Daşlara, divarlara, ağaclara, otlara, güllərə sığal çəkəsən, saf havasını ciyərlərinə çəkəsən, doya-doya nəfəs alasan, şuşalılara kirimişcə qulaq asasan, axan suların zümzüməsinə qulaq verəsən… Bu baxımdan Şuşa haqqında nə qədər yazsaq sözlərimiz aciz qalacaq. Ancaq ürəyimin səsinə qulaq asaraq, qəlbimdən gələni qələmə almağa çalışdım…

Azərbaycan vətəndaşları vətən daşlarına sahib çıxdı

Tamamilə yerlə yeksan edilmiş Füzuli rayonunu, dağıdılmış kəndləri, yaşayış məskənlərini görəndə özümdən asılı olmadan gözümün qarşısında II Dünya Müharibəsinin kinoxronikası canlandı. Sanki, torpağın hər qarışı, uçurulan evlər, tikililər, divarlardan düşmüş daşlar erməni vəhşiliyi, vandallığı barədə danışır. Bir vaxtlar güllü-gülstan olan həyətlər, bağ-bağçalar viranəyə çevirilib, hiss edirdim ki, erməni vəhşiliyi təbiəti də diksindirib.

Füzuli rayonunun işğal altında olmayan ərazisindən azad edilmiş hissəsinə keçid mənə rəngli kadrlardan ağ-qara kadrlara keçidi xatırlatdı. Daha çox isə yarıuçuq divarlarda, bəlkə də sarmaşıqlara, tikanlara söykənməkdən güc alan və hər şeyə inad edərək divarda qalmağı bacaran daşlar gözümün önündən getmir. Bu daşlar 30 il dözdülər, divardan düşmədilər, onları bu divara minbir arzu, diləklə hörən ev sahiblərinə sadiq qaldılar. Azərbaycan xalqı da 30 il bütün fitnə-fəsadlara sinə gərərək bu daşalar kimi mübarizə ruhundan, dirənişindən əl çəkmədi və sonra daşına-torpağına, bu torpağı, daşı, bağ-bağçanı, yurdu murdarlamağa çalışan düşməni qovdu. Azərbaycan vətəndaşları, vətən daşlarına sahib çıxdı.

Zəfər yolu rəşadət yoludur, fədakarlıq, qətiyyət yoludur

Zəfər yolu ilə Şuşaya yol almaq, yolçu olmaq mistik bir hissdir. Özümdən asılı olmadan “Cəngi” sədalarını, dəniz kimi dalğalanan meşələrdə, dağ yamaclarında, cığırlarda igid hərbçilərimizin, kəşfiyyatçılarımızın pıçıltısını eşidirsən, qaçan düşmənin qorxusunu duyursan. Zəfər yolu həm də, bir dövlət kimi Azərbaycanın gücünü, potensialını göstərir, bu cür mürəkkəb relyefdə, qısa müddət ərzində yol çəkmək, Şuşaya yol açmaq gerçəkdən hünər işidir. Zəfər yolu həm də bir rəşadət yoludur, fədakarlıq, qətiyyət yoludur. Bu yolun, hər santimetri, metri Azərbaycan Ordusu, onun Ali Baş Komandanının qətiyyətini, dəyanətini sərgiləyir. Aşırımlar, dağlar, dərələr, çaylar, meşələr Azərbaycanın Şuşanın, Qarabağımızın azadlığının necə çətinliklə başa gəldiyini göstərir. Zəfər yolu həm də yüksəliş, həm ucalığa, yeni başlanğıca gedən yoldur. Üzyuxarı, Şuşaya doğru yüksəldikcə mənən də ucalırsan, məğrurlaşırsan…

Xankəndi Şuşanın təsəllisini eşidir: “Az qaldı…”

Nəhayət Şuşa…Qürurumuzun, Zəfərimizin, Mədəniyyətimizin, Rəşadətimizin rəmzi şəhər. Şəhərə yaxınlaşan və onu əhatə edən sıldırım qayaları görən kimi dahi Məmməd Arazın unudulmaz misraları beynimdə şimşək kimi çaxır: “Mamır olub qayasında bitərdim…”. Şuşa-bu dörd hərfdə Azərbaycanın 30 illik həsrəti, göz yaşları, əzabları, iztirabları, ucalığı, mərdliyi, dözümü, rəşadəti ifadə olunub. Mənə elə gəldi ki, Şuşa bizi məğrur, qürrələnə-qürrələnə qarşıladı…Dostum, tanınmış jurnalist Anar Yusifoğlu demişkən, Şuşa erməni məkri, daha sonra işğalı ilə mübarizə apardı, bütün fitnələrə baxmayaraq hər qarışı, daşı, çınqılı, küçəsi, divarı ilə türk şəhəri olaraq qaldı. Ermənilər nə qədər çalışa da Şuşa təslim olmadı, iliyinə qədər milli tariximizi, ruhumuzu ana bətninində olduğu kimi qorudu, bizə əmanət saxladı. Xarı bülbül vətən nəğməsini qorudu, Cıdır düzü Qarabağ atlarının məğrurluğunu, şuşalıların mətinliyini, Göhvər Ağa məscidi inancı, İsa bulağı bərəkəti, diriliyi, Şuşa qalası mübarizliyini mühafizə etdi.

Şuşa küçələrində sanki Azərbaycan, Türkiyə bayraqları daha qürurla dalğalanır, divarlar, hətta dağıdılmış evlər canlı təsir bağışlayır. Divarlardakı əsəgərlərimizin nişanəsi olan yazılar isə mənə Orxon-Yenisey əlifbası, Göytürk əlifbası qədər möhtəşəm təsir bağışladı. Bu yazıları yeni tariximizin, başlanğıcımızın müqəddəs sətirləri kimi oxudum.

Şuşa sıldırımları hərb tarixində silinməz iz qoyan Azərbaycan əsgərinin hünərini, vətən sevgisini başa düşmək üçün əyani vəsaitdir. Allah Birinci və İkinci Qarabağ müharibəsi şəhidlərinə rəhmət eləsin, qazilərimizə can sağlığı nəsib etsin! Bizlərə Qələbə, Zəfər, yeni tarix bəxş etdilər və yazdılar. Şuşada Üzeyr bəyin müsiqisini, Bülbülün səsini, Vaqifin, Xan qızı Natəvanın poeziyasını, Xan Şuşinskinin muğamını daha yaxşı dərk edirsən, mədəniyət beşiyi Şuşanın sirri-sehrindən lap kiçicik də olsa biz də pay aldıq…

Şuşanın ərazisi kiçik, işığı böyük, qüdrəti sonsuz, ruhu möhtəşəmdir…

Şuşa sürətlə öz əvvəlki görkəminə qovuşacaq, şəhərdə sürətli və geniş miqyasda tikinti və bərpa işləri gedir, hətta tikintidə çalışanlarda, infrastukturu bərpa edən işçilərdə belə böyük həvəs, çoşqu var. “Şuşanı yenidən qurmaq, yaratmaq hər adama nəsib olmur” – deyirlər.

Şuşadan ayrılanda Cıdır düzündən seyr etdiyim Xankəndi gözümün önündən getmir. Xankəndi artıq hər səhər-axşam Azan səsi eşidir, Şuşanın təsəllisini duyur : “Az qaldı…”

Zaur İBRAHİMLİ

QHT-lərə Dövlət Dəstəyi Agentliyinin Müşahidə Şurasının üzvü
Qazaxıstan parlamentinin nümayəndə heyəti Milli Məclisdə olubSentyabrın 10-da ölkəmizdə səfərdə olan Qazaxıstan Parlamenti Məclisinin Beynəlxalq əlaqələr, müdafiə və təhlükəsizlik komitəsinin sədri Aygul Kuspanın başçılıq etdiyi parlament nümayəndə heyəti 44 günlük möhtəşəm qələbəmizi təbrik etmək üçün Milli Məclisdə olublar.

Avrasiya.net xəbər verir ki, bununla bağlı Milli Məclisin Təbii ehtiyatlar, energetika və ekologiya komitəsinin sədri Sadiq Qurbanov sosial səhifəsində yazıb: "Bildiyimiz kimi Azərbaycan və Qazaxıstan arasında çoxəsrlik tarixə malik dostluq əlaqələri var. Təqdirəlayiq haldır ki, bu gün ölkələrimizin ənənəvi dostluq və qardaşlıq münasibətləri, müxtəlif sahələri əhatə edən çoxşaxəli əməkdaşlıq əlaqələri uğurla inkişaf edir. Dövlət başçıları səviyyəsində münasibətlərin inkişafına xüsusi əhəmiyyət verilməsi, yüksək səviyyəli rəsmi və işgüzar səfərlərin həyata keçirilməsi müxtəlif sahələrdə mühüm addımların atılmasını və müsbət nəticələrin əldə olunmasını şərtləndirir. Ölkələrimizin qlobal arenada, beynəlxalq təşkilatlar səviyyəsində milli maraqlara dair bütün məsələlərdə bir-birini dəstəkləməsi də pozitiv hal kimi xüsusi önəm daşıyır".