Rusiyanın Volqoqrad şəhərində qətlə yetirilən Azərbaycan vətəndaşı Timur Qavrilovun qətlində şübhəli bilinən şəxslə bağlı yeni detallar üzə çıxıb.

Modern.az “Bloknot Volqoqrad”a saytına istinadən xəbər verir ki, Belarusa qaçmaq istəyərkən Smolensk şəhərində tutulan 22 yaşlı şübhəli Vitali Vasilyevin yaxalanmasında çevrəsindən olan şəxslərin önəmli köməyi olub

Belə ki, onlar polisə zəng edərək azərbaycanlı tələbəni Vladimir Vasilyevin törətdiyini deməklə onun şəxsiyyətinin müəyyənləşməsində yardımçı olublar.

“Vladimiri onun dostlarının yardımı ilə yaxalamaq mümkün oldu. Vladimir Vasilyev digər millətlərə nifrət təbliğ edən təşkilatın üzvü olub. Nəticədə, o, qeyri-rus millərindən olan biri öldürmək qərarına gəlib. O. Timuru seçərək onun arxasınca gedib, qaranlıq yerdə ona hücum edərək bıçaqlayıb”-deyə istintaqdakı mənbə jurnalistlərə məlumat verib.

22 yaşlı Vladimir Vasilyevin heç yerdə oxumadığı və işsiz olduğu, cinayət baş verənə qədər Timur Qavrilovu tanımadığı da söylənilir. Hazırda Volqoqrad məhkəməsi Timur Qavrilov barəsində avqustun 21-nə qədər həbs qəti imkan tədbiri seçərək barəsində "qəsdən adam öldürmə" maddəsi ilə iş açıb.

17 yaşlı Timur Qavrilov Volqorad Tibb Universitetinin 1-ci kurs tələbəsi olub. O, iyunun 13-də küçədə hücuma məruz qalaraq 20 bıçaq zərbəsi ilə öldürülüb. Ailənin yeganə övladı olan Qavrilov Gəncədə dəfn olunub.

Azərbaycan Respublikası Nazirlər Kabinetinin 2020-ci il 19 iyun tarixli “Bakı, Sumqayıt, Gəncə, Lənkəran, Yevlax, Masallı, Cəlilabad şəhərlərinin və Abşeron rayonunun ərazisində xüsusi karantin rejiminin sərtləşdirilməsi ilə bağlı əlavə tədbirlər barədə” Qərarının əlavəsində fəaliyyətinə icazə verilmiş sahələrin siyahısında kütləvi informasiya vasitələrinin (KİV) də adı qeyd edilib. Bu məqam sərtləşdirilmiş xüsusi karantin rejimində KİV-lərin fəaliyyətinin hüquqi təminatıdır və onu göstərir ki, KİV-lərin fəaliyyəti ilə bağlı heç bir hüquqi məhdudiyyət yoxdur.

Bu barədə Nazirlər Kabineti yanında Operativ Qərargahdan Avrasiya.net-ə verilən məlumatda bildirilib.

Qeyd edilib ki, sərtləşdirilmiş xüsusi karantin rejimi dövründə bu hüquqdan istifadənin texniki tərəfi icazə.e-gov.az portalında qeydiyyatdan keçməklə həll olunur.

Azərbaycanda akkreditasiyadan keçmiş xarici KİV-lərin təmsilçiləri haqda məlumatlar Azərbaycan Respublikasının Xarici İşlər Nazirliyi tərəfindən icazə.e-gov.az portalına daxil edilib.

Yerli KİV-lərin nümayəndələri isə, Qərarda qeyd olunduğu kimi, fəaliyyət göstərdikləri KİV-in rəhbərliyi tərəfindən icazə.e-gov.az portalında qeydiyyatdan keçirilməlidir.

Mülki hüquqi müqavilə əsasında fəaliyyət göstərən şəxslər barədə məlumatlar işəgötürən tərəfindən, hər hansı hüquqi şəxslə müqavilə bağlamadan VÖEN əsasında fərdi fəaliyyət göstərən şəxslər barədə məlumatlar onların özləri tərəfindən gücləndirilmiş elektron imzadan istifadə etməklə icazə.e-gov.az portalına daxil edildikdən sonra onların hərəkətinə yol verilir.

Qeydiyyatla əlaqədar yaranan problemlərlə bağlı Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin (ASAN Xidmətin) 9108 Çağrı Mərkəzinə və Azərbaycan Respublikası Nazirlər Kabinetinin mətbuat xidmətinə müraciət oluna bilər.

Bu ilin 7 yanvar tarixində Azərbaycan Kinematoqrafçılar İttifaqı A. M. Qorçakov adına İctimai Diplomatiyaya Dəstək Fondu ilə birgə “Rusiyanın görkəmli azərbaycanlıları”adlı ssenari müsabiqəsi elan edib. Müsabiqənin əsas məqsədi
Rusiyada yaşayıb-yaradan görkəmli azərbaycanlıların həyat yolunun salnaməsini ekran dilinə çevirməklə yanaşı, həmçinin gənc nəslə onların nailiyyətlərini çatdırmaq, eyni zamanda sənədli kino sahəsində aktivliyi artırmaqdan ibarətdir.

Qeyd edək ki, müsabiqəyə 20-yə yaxın ssenari təqdim olunub. Müsabiqəyə buraxılan ssenarilərin siyahısını (əlifba sırası ilə) təqdim edirik:

“Aşur evi” (Əkbər N. Nəcəf, İdris Heydərli, Seyran Mahmudoğlu)

“Bir ailənin əsri” (Toğrul Cuvarlı, Ziya Şıxlinski)

“Qacarlar” (Nicat Dadaşov, Reyhan İsayeva)

“Xatirələrim məndə yaşayır” (Nadir Maçanov)

“Mamed” (Seymur Elsəvər )

“Next” (Çingiz Rəsulzadə)

“Sadəcə Emin…” (Günel Mehri)

“Şərqdə doğan günəş” (Ülviyyə Əhmədova)

“Tənha” (Ruslan Mollayev)

“Üç nəfərdən artıq yığışmaq olmaz” (Çingiz Rəsulzadə)

Yeri gəlmişkən, Azərbaycan Kinematoqrafçılar İttifaqının İdarə Heyətinin 12 iyun tarixli iclasında müsabiqənin münsiflər heyətinin tərkibi də təsdiq olunub:
Rüstəm İbrahimbəyov (sədr), Vaqif Azəryar, Cəmil Fərəcov, Oleq Səfərəliyev, Əli İsa Cabbarov.
Müsabiqə qaliblərinin adının 2 avqust - Milli Kino Günündə təşkilat komitəsi tərəfindən elan edilməsi planlaşdırılır.

Azərbaycanda 478 yeni koronavirus infeksiyasına yoluxma faktı qeydə alınıb, 369 nəfər müalicə olunaraq sağalıb və evə buraxılıb.

Bu barədə Avrasiya.net-ə Nazirlər Kabineti yanında Operativ Qərargahdan bildirilib.

Qeyd olunub ki, COVİD-19 üçün götürülən analiz nümunələri müsbət çıxmış 7 nəfər vəfat edib.

Xəbər verdiyimiz kimi, Kütləvi İnformasiya Vasitələrinin İnkişafına Dövlət Dəstəyi Fondunda (KİVDF) yol verilən qanunsuz əməllərlə bağlı cinayət işi başlanıb. KİVDF ətrafında ən çox diqqətçəkən və xüsusi maraq doğuran məsələlərdən biri də jurnalistlər üçün 2013 və 2017-ci ildə tikilən binalara çəkilən xərclərdir.

Belə ki, 2013-cü ildə tikilən 17 mərtəbəli 156 mənzillik bina üçün 22 milyon, 2017-ci ildə tikilən 255 mənzillik bina üçün isə 16 milyon manat xərclənməsi, yəni 255 mənzillik binanın 156 mənzillik binadan 6 milyon ucuz tikilməsi birmənalı qarşılanmayıb.

Məsələ ilə bağlı Axar.az-a açıqlama verən əmlak eksperti Ramil Osmanlı bildirib ki, bunun özü Baş Prokurorluğun ayrıca araşdırmasına çevrilə bilər.

“Bütün sənədlər incələnməlidir. Mənzillər təmirlidir və təmir xərclərində müəyyən fərqlər ola bilər. Bu səbəbdən tikinti xərcləri və s. məsələlərə diqqət yetirmək lazımdır. 2013-cu ildə tikinti materiallarına çəkilən xərclər 2017-ci ildən daha aşağı idi. Çünki 2013-cü ildə 1 dollar 78 qəpik, 2017-ci ildə isə 1.7 manat idi. Burada neqativ təsirlər olub. Çünki 255 mənzillik çoxmərtəbəli binanın inşasına çəkilən xərc 156 mənzillik binanın xərcindən az ola bilməz. Hesab edirəm ki, qiymətlər şişirdilib”.

“Kaspi” qəzetinin baş redaktoru İlham Quliyev də koronavirusa yoluxduğunu bəyan edib.

Avrasiya.net xəbər verir ki, jurnalist həm də ailə üzvlərinin COVID-19-a yoluxduğunu deyib.

“Koronavirus infeksiyası ilə mübarizə aparan xəstələrin sırasına mən və ailə üzvlərim də qoşuldu. Kompüter tomoqrafiyası ilə aparılan müayinələr ağciyərlərimin hər iki payında "buzlu şüşə" aşkarladı. Müalicə "Neftçilər" xəstəxanasında davam etdirilir.
Çətinliklərə və ağrılara baxmayaraq, nikbinlik. Tezliklə virusla mübarizəni qazanıb, normal həyata qayıdacağımıza inanırıq. Özünüzü qoruyun!”,-deyə İlham Quliyev vurğulayıb.

Xətai rayon İcra Hakimiyyəti Gəncə prospekti 2942 A məhəllədə vaxtilə aparılan tikinti işləri ilə bağlı yayılan məlumatlara aydınlıq gətirib.

İcra Hakimiyyətindən Axar.az-a daxil olan məlumatda bildirilir:

“Media orqanlarında və sosial şəbəkələrdə qaldırılan məsələ ilə bağlı bildiririk ki, Xətai rayonu, Gəncə prospekti 2942 A ünvanındakı məhəllədə yerləşən torpaq sahəsi Bakı Şəhər İcra Hakimiyyətinin 125 saylı, 19.03.2015-ci il tarixli sərəncamı ilə yaşayış binalarının layihələndirilməsi üçün “Qaya-İnşaat” MMC-yə icarəyə verilmişdir. Hazırda Azərbaycan Respublikası Əmlak Məsələləri Dövlət Komitəsinin yanında Daşınmaz Əmlakın Dövlət Reyestri Xidmətinin 16.11.2018-ci il tarixli 1118092941 qeydiyat nömrəli çıxarışına əsasən yaşayış məntəqələrinin torpaqlar kateqoriyasına aid olan 0,32 ha torpaq sahəsi həmin müəssisənin istifadəsindədir. Azərbaycan Respublikasının Dövlət Şəhərsalma və Arxitektura Komitəsinin 24.10.2019-cu il tarixli 33 saylı sərəncamı ilə “Qaya-İnşaat” MMC-nin istifadəsində olan həmin torpaq sahəsində layihələndirilən çoxmərtəbəli yaşayış binasının şəhərsalma normalarına və qanunvericiliyin tələblərinə uyğun tikintiyə icazə verilməsi üçün komitə tərəfindən qanunvericilikdə müəyyən edilmiş qaydada rəy bildirmələri məqsədi ilə aidiyyəti qurumlara sorğular göndərilib. Hazırda həmin ərazidə heç bir tikinti işləri getmir və nəzarətimizdədir”.

Qeyd edək ki, ötən gün Gəncə prospekti 2942A ünvanında yaşayan sakinlər ərazidə növbəti hündürmərtəbəli binanın tikintisinə hazırlıqdan ciddi narahatlıqlarını bildirmiş və Xətai rayonunun millət vəkili, BAXCP sədri Qüdrət Həsənquliyevdən yardım istəmişdilər. Sakinlər bildirmişdi ki, 269 saylı məktəbin düz girişi önündə nəzərdə tutulan və prospektə birbaşa çıxışı olmayan, qapalı yerdə yeni yaşayış binasının tikintisi gerçəkləşərsə, ərazidə yaşamaq mümkün olmayacaq.

Sakinlər seçildiyi ərazi olmamasına baxmayaraq, Xətai rayonunu təmsil edən faktiki yeganə millət vəkili kimi Qüdrət Həsənquliyevin prosesə müdaxiləsini xahiş etmişdilər.

Q.Həsənquliyev müraciəti dərhal cavablandırmış, Xətai RİH-nin rəhbərliyi ilə əlaqə saxlamış və hazırda tikintinin dayandırıldığı haqda sakinlərə məlumat vermişdi.

Q.Həsənquliyev qeyd etmişdi ki, Dövlət Arxitektura və Şəhərsalma Komitəsinin cavabına uyğun olaraq, İcra Hakimiyyəti də ərazidə kiçik parkın salınmasını məqsədəuyğun hesab edir.

Millət vəkili sakinlərin ciddi narahatlığını nəzərə alaraq, Komitəyə özünün də rəsmi müraciət edəcəyini və prosesi sona qədər izləyəcəyini bildirib.

Abşeron Rayon İcra Hakimiyyəti qurumun binasında əməliyyat keçirilməsi və müavinlərin həbs olunması barədə yayılan məlumatlara münasibət bildirib.

Avrasiya.net xəbər verir ki, məlumatda deyilir:

"Bir neçə kütləvi informasiya vasitəsində Abşeron Rayon İcra Hakimiyyətinin binasında əməliyyat axtarış tədbirləri həayta keçirilməsi və müavinlərin həbs olunması barədə məlumatlar dərc edilib. Abşeron Rayon İcra Hakimiyyətinin Mətbuat ximəti olaraq bildiririk ki, yayılan məlumatlar həqiqəti əks etdirmir. Rayon İcra Hakimiyyətinin binasında əməliyyat həyata keçirilməyib və müavinlər həbs olunmayıb. Hazıra müavinlərin hər biri iş başındadır.

Məsələ ilə bağlı Baş Prokurorluğun Mətbuat Xidməti də məlumat yayaraq bilirir ki, bəzi kütləvi informasiya vasitələrində Baş prokuror yanında Korrupsiyaya qarşı Mübarizə Baş İdarəsi tərəfindən keçirilmiş əməliyyat-axtarış tədbirləri nəticəsində Abşeron rayon İcra Hakimiyyətinin bir sıra vəzifəli şəxslərinin saxlanılması barədə dəqiqləşdirilməmiş informasiyalar yayılmışdır: “Cəmiyyətdə çaşqınlığa səbəb ola biləcək informasiyaların yayılmasının qarşısının alınması məqsədilə bu qəbildən olan məlumatların Baş Prokurorluğun Mətbuat xidməti ilə dəqiqləşdirilməsi xahiş olunur".

Sosial şəbəkələrdə kimliyi bəlli olmayan bir şəxsin “Azercell” abonentlərini aldatması ilə bağlı məlumat yayılıb.

Avrasiya.net xəbər verir ki, sözügedən şəxs əvvəlcə abonentlərin nömrələrinə “Hörmətli abonent! 0505129024 nömrəli abonent sizin balansınıza 5 AZN yükləmişdir” məzmunlu SMS göndərir. Daha sonra isə həmin abonentə zəng edərək, səhvən 5 AZN göndərdiyini və vəsaiti geri qaytarmasını xahiş edir.

Abonentlərin bəzisi isə yuxarıda qeyd edilən mesajın həqiqətən “Azercell”dən gəldiyini düşünərək, bu dələduzların nömrəsinə 5 AZN məbləğində vəsait göndərirlər.

Sosial şəbəkə istifadəçiləri “Azercell”i bununla bağlı tədbir görməyə çağırıblar.

“Bəhram Bağırzadənin analizlərinin cavabı qənaətbəxşdir. Düşünürəm ki, vaxtın uzanması bu vəziyyətdə bizim üçün əlavə qazancdır”.

Bunu Modern.az-a açıqlamasında “COVID-19” infeksiyasına yoluxmuş Əməkdar artist Bəhram Bağırzadənin müalicə olunduğu Mərkəzi Gömrük Hospitalının “Elmi Təcrübi və Tədris Mərkəzi”nin rəisi, deputat Rəşad Mahmudov bildirib.

Həkimin sözlərinə görə, xəstənin vəziyyətində dəyişiklik yoxdur:

“Bəhram Bağırzadənin vəziyyəti ağır-stabil olaraq davam edir. Hamı kimi biz də ən qısa zamanda sevinmək və hamını sevindirək arzusundayıq. Əfsuslar olsun ki, buna nail ola bilməmişik”.

Qeyd edək ki, Azərbaycanın Əməkdar artisti Bəhram Bağırzadə koronavirus infeksiyasına yoluxub. O, vəziyyətinin kəskin pisləşməsi səbəbindən əvvəl müalicə olunduğu xəstəxanadan iyunun 13-də Mərkəzi Gömrük Hospitalının reanimasiya şöbəsinə köçürülüb.

Əməkdar artistin ağciyərinin 90%-dən çox toxuması zədələndiyindən onu ECMO cihazına qoşublar.

Xatırladaq ki, ECMO ekstrakorporal membran oksigenlənmə cihazı olub, ağciyər və ürək yerinə 2-3 həftə funksiya göstərərək, mövcud olan problemin həlli üçün həkimlərə vaxt qazandıran bir müalicə üsuludur.