Saxta təltiflərə görə saxlanılan QHT sədri Berdiməhəmmədova da orden veribmiş

Xəbər verdiyimiz kimi, ötən gün saxta orden və medallar, habelə müxtəlif təyinatlı vəsiqələr hazırlayıb satan QHT sədrləri saxlanılıblar.

"Unikal"ın məlumatına görə, saxlanılan şəxslərdən biri "Dədə Qorqud" Xeyriyyə Fondunun rəhbəri Eldar İsmayılovdur.

Maraqlısı budur ki, E.İsmayılov 12 may 2022-ci ildə Türkmənistanın sabiq prezidenti, hazırda Türkmənistan Xalq Məsləhətinin sədri olan Qurbanqulu Berdiməhəmmədova da orden təqdim edib. Belə ki, qeyd edilən tarixdə Ağsaqqallar Şurasının sədri, Milli Məclisin deputatı Eldar Quliyevin başçılığı ilə təşkilatın rəhbər şəxslərindən ibarət nümayəndə heyəti Qurbanqulu Berdiməhəmmədovun dəvəti ilə Türkmənistana səfərə gedib. Səfər iştirakçıları arasında Eldar İsmayılov da olub.

Berdiməhəmmədov Türkmənistan Milli Şurasının Xalq Məsləhətinin binasında Azərbaycan nümayəndə heyətini qəbul edib. Eldar İsmayılov tərəfindən Berdiməhəmmədova orden təqdim edilib.

Qeyd edək ki, Eldar İsmayılovun qanunsuz əməlləri ilə bağlı Cinayət Məcəlləsinin rəsmi sənədləri, dövlət təltiflərini, möhürləri, ştampları, blankları saxtalaşdırma, əlavə hazırlama, satma və ya saxta sənədlərdən istifadə etmə maddəsi ilə cinayət işi başlanılıb. O, istintaqa cəlb edilib.