"Fransa senatının və Milli Assambleyanın qəbul etdiyi qətnamələrin heç bir hüquqi qüvvəsi yoxdur"
«Fransız yazıçısı Aleksandr Düma ermənilərin kim olduğunu çox aydın şəkildə ifadə etmişdi: "Ermənilər xəstə millətdir... erməni xəstəliyi erməni toplumunun varlığı qədər əbədidir"... Nə yazıq ki, dahinin müasirləri terroru, separatizmi, işğalçılığı dövlət siyasətinin əsası hesab edən ermənilərin əsl simasını görməzlikdən gəlirlər. Noyabrın 15-də Fransa Senatının və noyabrın 30-da Milli Assambleyasının Azərbaycana qarşı qəbul etdiyi qərəzli qətnamə bu ölkənin ədalətsiz mövqeyini bir daha nümayiş etdirdi. Bununla da, Fransanın ATƏT-in Minsk qrupunun həmsədr dövləti kimi otuz illik vasitəçilik fəaliyyətinin iç üzü bir daha bəlli oldu. »
Bu fikirləri Milli Məclisin deputatı Kamran Bayramov mətbuata açıqlamasında bildirib.
K.Bayramov qeyd edib ki, Senatın və Milli Assambleyanın qəbul etdiyi qətnamə Fransanın Azərbaycanın 44 günlük müharibədə əldə etdiyi qələbə ilə barışa bilmədiyini bir daha sübut edir. Vətən müharibəsi dövründə və müharibədən sonra Fransa dövləti rəhbərliyinin təcavüzkar Ermənistanı müdafiə etmək üçün verdiyi açıqlamaları hər birimiz yaxşı xatırlayırıq. Sözügedən qətnamələr son iki ildə Fransa parlamentinin Azərbaycana qarşı qəbul etdiyi sayca dördüncü sənəddir. Bu da o deməkdir ki, Fransanın ölkəmizə qarşı bu cür addımları məqsədli xarakter daşıyır, onun xarici siyasətinin tərkib hissəsinə çevrilib. Bütün bunlar Azərbaycana qarşı aparılan nifrət kampaniyasının davamlı olduğunu açıq-aşkar göstərir. Fransanın bu mövqeyi isə Azərbaycan və Ermənistan arasında sülh müqaviləsinin imzalanmasına əngəl törədir, xalqların rifahına və təhlükəsizliyinə xidmət etmir. Ermənistan oyuncaq bir dövlət olduğundan, hər bir dövlət müxtəlif vasitələrlə işğalçı ölkəni istədikləri səmtə yönəldə və istədikləri maraqları onlara diqtə edə bilir.
Deputat əlavə edib ki, Fransa senatının və Milli Assambleyanın qəbul etdiyi bu qətnamələrin heç bir hüquqi qüvvəsi yoxdur. Makronun və erməni lobbisinin təsiri ilə qəbul edilən qətnamə, icra mexanizmi belə mümkün olmayan oyuncaq bir sənəddir. Qəbul edilmiş hər iki qətnamə tövsiyə xarakteri daşıyır, hüquqi qüvvə daşımır. Əvvəlki qətnamələrdə olduğu kimi, orada yer almış tövsiyələrin heç biri nəzərə alınmayacaq və unudulacaq. Dövlət başçımızın qeyd etdiyi kimi, Qarabağın erməni əhalisinin hüquqları Azərbaycanın daxili məsələsidir. Tarixi qara ləkələrlə dolu olan bir ölkənin Azərbaycanla bağlı belə absurd ittihamlar irəli sürməsi də çox gülüncdür.
