İranda etirazlar tamamilə yatırıldı
İranda son həftələrdə baş verən kütləvi etirazların təhlükəsizlik qüvvələrinin sərt müdaxiləsindən sonra səngidiyi bildirilir.
Modern.az xəbər verir ki, "Reuters" agentliyinin yerli sakinlər və hüquq-müdafiə təşkilatlarına istinadən yaydığı məlumata görə, hazırda ölkənin bir sıra şəhərlərində vəziyyət nisbətən sakitləşsə də, təhlükəsizlik tədbirləri yüksək səviyyədə saxlanılır.
Bəzi mənbələr mitinqlərin tamamilə dayandığını bildirib.
Məlumata əsasən, ABŞ Prezidenti Donald Trumpın son açıqlamalarından sonra Vaşinqtonun İrana birbaşa hərbi müdaxilə ehtimalı azalıb. Ağ Ev rəsmiləri Trampın Tehrana əlavə qan töküləcəyi təqdirdə “ağır nəticələr” olacağı barədə xəbərdarlıq etdiyini bildiriblər. Eyni zamanda, Trampın sözlərinə görə, İranda planlaşdırılan yüzlərlə edam hökmünün icrası dayandırılıb.
Etirazlar dekabrın 28-də yüksək inflyasiya və ağır iqtisadi vəziyyət fonunda başlayıb. Sanksiyalar səbəbilə zəifləyən iqtisadiyyat fonunda baş qaldıran narazılıqlar qısa müddətdə İran İslam Respublikasının 1979-cu ildən bəri üzləşdiyi ən ciddi daxili çağırışlardan birinə çevrilib. Hüquq müdafiəçilərinin məlumatına görə, aksiyalar zamanı minlərlə insan həlak olub və on minlərlə şəxs saxlanılıb.
Norveçdə yerləşən "Hengaw" təşkilatı son günlər açıq kütləvi etirazların keçirilmədiyini, lakin etirazların baş verdiyi bölgələrdə ağır hərbi və təhlükəsizlik nəzarətinin davam etdiyini açıqlayıb. Tehran sakinləri də paytaxtda pilotsuz uçuş aparatlarının uçuşlarının müşahidə olunduğunu və küçələrdə təhlükəsizlik qüvvələrinin sayının artdığını bildiriblər.
ABŞ-da yerləşən HRANA təşkilatının yaydığı məlumata görə, indiyədək ölənlərin sayı 2 600-dən çoxdur, lakin bu rəqəmlər rəsmi Tehran tərəfindən təsdiqlənmir. İran hakimiyyəti isə etirazların xarici qüvvələr tərəfindən təşkil edildiyini iddia edir və ölkədə sabitliyin bərpa olunduğunu bildirir.
Bu fonda Rusiya Prezidenti Vladimir Putin vəziyyətlə bağlı İsrailin baş naziri Benjamin Netanyahu və İran Prezidenti Məsud Pezeşkian ilə telefon danışığı aparıb. Kremlin məlumatına görə, Moskva regionda gərginliyin azaldılması üçün vasitəçilik etməyə hazır olduğunu bildirib.
