"Milli birliyimiz və həmrəyliyimiz daim möhkəm olsun"

Dünya Azərbaycanlılarının Həmrəyliyi Günü milli kimliyin qorunması, diaspor fəaliyyətinin institusional inkişafı və azərbaycançılıq ideologiyasının qlobal miqyasda möhkəmləndirilməsi baxımından mühüm ictimai-siyasi əhəmiyyətə malikdir. Bu əlamətdar tarix dünyanın müxtəlif ölkələrində yaşayan azərbaycanlıları ortaq tarixi yaddaş, zəngin mədəni irs və milli maraqlar ətrafında birləşdirən mühüm ideoloji platforma kimi çıxış edir.

Avrasiya.net xəbər verir ki, bunu Özbəkistanda Azərbaycan diasporunun —
Respublika Azərbaycan Milli Mədəniyyət Mərkəzi
İdarə Heyətinin sədri Mobil Məmmədov deyib.

O, qeyd edib ki, həmrəyliyin dövlət səviyyəsində təsis edilməsi Ümummilli Lider Heydər Əliyevin uzaqgörən siyasi təşəbbüsünün nəticəsidir. Məhz onun təşəbbüsü ilə Dünya Azərbaycanlılarının Həmrəyliyi Günü rəsmi status alaraq diaspor hərəkatının formalaşmasında və milli birliyin möhkəmləndirilməsində fundamental mərhələ yaratmışdır. Bu gün həmrəyliyin ideoloji mahiyyəti yalnız simvolik xarakter daşımır, eyni zamanda diaspor siyasətinin əsas sütunlarından biri kimi öz aktuallığını qoruyub saxlayır.

O, deyib ki, hazırda Özbəkistanda 40 mindən artıq azərbaycanlı yaşayır və onlar bu qardaş ölkənin ictimai, mədəni və iqtisadi həyatında fəal iştirak edirlər. Qeyd olunmalıdır ki, Özbəkistanda formalaşdırılmış əlverişli ictimai-siyasi mühit və dövlətin ardıcıl şəkildə həyata keçirdiyi multikultural siyasət azərbaycanlı icmanın milli kimliyini qoruyaraq inkişaf etməsinə geniş imkanlar yaradır. Soydaşlarımız ana dilini, milli adət-ənənələrini, musiqisini və zəngin mədəni irsini sistemli şəkildə yaşadır və bu dəyərləri gələcək nəsillərə ötürürlər:

"Respublika Azərbaycan Milli Mədəniyyət Mərkəzinin fəaliyyəti məhz bu strateji məqsədlərə xidmət edir. Mərkəz Azərbaycan diasporunun təşkilatlanması, milli-mədəni dəyərlərin qorunması, mədəni diplomatiyanın gücləndirilməsi və Azərbaycan–Özbəkistan münasibətlərinin humanitar ölçüsünün inkişafı istiqamətində ardıcıl və məqsədyönlü fəaliyyət həyata keçirir.

Bu fəaliyyət həm milli kimliyin möhkəmləndirilməsinə, həm də iki qardaş xalq arasında qarşılıqlı anlaşma və etimad mühitinin dərinləşməsinə mühüm töhfə verir.

Respublika Azərbaycan Milli Mədəniyyət Mərkəzi fəaliyyətini Azərbaycan Respublikasının Diasporla İş üzrə Dövlət Komitəsi ilə sıx əməkdaşlıq şəraitində həyata keçirir. Bu əməkdaşlıq diaspor təşkilatlarının institusional gücləndirilməsi, milli-mənəvi dəyərlərin qorunması və Azərbaycan həqiqətlərinin beynəlxalq ictimaiyyətə çatdırılması baxımından mühüm əhəmiyyət kəsb edir. Eyni zamanda, Mərkəzin fəaliyyəti Özbəkistan Respublikasının Millətlərarası Münasibətlər və Xaricdə Yaşayan Vətəndaşlarla Əlaqələr üzrə Komitəsinin koordinasiyası çərçivəsində həyata keçirilir ki, bu da ölkədə millətlərarası harmoniyanın möhkəmləndirilməsinə və ictimai sabitliyin qorunmasına xidmət edir.

Azərbaycan ilə Özbəkistan arasında münasibətlər tarixi, mədəni və mənəvi yaxınlığa əsaslanan strateji tərəfdaşlıq xarakteri daşıyır. Bu münasibətlərin son illərdə daha da dərinləşməsi Azərbaycan Respublikasının Prezidenti cənab İlham Əliyev və Özbəkistan Respublikasının Prezidenti cənab Şavkat Mirziyoyev arasında formalaşmış yüksək səviyyəli siyasi dialoq, qarşılıqlı hörmət və qardaşlıq münasibətlərinin bariz nümunəsidir. Dövlət başçılarının siyasi iradəsi iki ölkə arasında əməkdaşlığın bütün sahələrdə ardıcıl və sistemli inkişafına möhkəm zəmin yaratmışdır.

Özbəkistanda Azərbaycan xalqına göstərilən yüksək ehtiramın simvolik nümunələrindən biri də Ümummilli Lider Heydər Əliyevin adını daşıyan parkın salınması və küçənin adlandırılmasıdır. Bu addımlar Azərbaycan–Özbəkistan dostluğunun, tarixi bağlılığının və qarşılıqlı ehtiramın real ifadəsi olmaqla yanaşı, soydaşlarımız üçün də böyük mənəvi əhəmiyyət daşıyır.

Nəticə etibarilə, Dünya Azərbaycanlılarının Həmrəyliyi Günü milli kimliyin qorunması, diaspor fəaliyyətinin gücləndirilməsi və Azərbaycan–Özbəkistan strateji qardaşlığının ictimai müstəvidə daha da möhkəmləndirilməsi baxımından xüsusi əhəmiyyətə malikdir.

Özbəkistanda yaşayan azərbaycanlı icma öz tarixi və mədəni dəyərlərinə sadiq qalaraq, həm Azərbaycan Respublikasının milli maraqlarının təşviqi, həm də qardaş Özbəkistan dövləti ilə dostluq və əməkdaşlıq münasibətlərinin inkişafı naminə fəaliyyətini ardıcıl şəkildə davam etdirir.

Bu xoş fürsətdən istifadə edərək, qarşıdan gələn Yeni il və Dünya Azərbaycanlılarının Həmrəyliyi Günü münasibətilə bütün soydaşlarımızı səmimi-qəlbdən təbrik edir, hər bir ailəyə möhkəm can sağlığı, rifah, əmin-amanlıq və uğurlar arzulayıram. Qoy milli birliyimiz və həmrəyliyimiz daim möhkəm olsun".