İran nüvə proqramını gizli inkişaf etdirir - KİV
Ölkənin nüvə proqramını inkişaf etdirmək üçün çalışan İranın Müdafiə Tədqiqatları və İnnovasiyalar Təşkilatı Tehranın kosmik proqram obyektlərinin pərdəsi altında fəaliyyət göstərir.
Bu barədə mənbələrə istinadən "Fox News" telekanalı məlumat yayıb.
“Bir neçə ay ərzində toplanmış sübutlar göstərir ki, İranın əsas nüvə agentliyi olan Müdafiə İnnovasiyaları və Tədqiqat Təşkilatı əvvəllər kosmik proqramların işlənib hazırlanması məntəqələri kimi tanınan iki sahədə fəaliyyət göstərir”, - deyə telekanalın bəyanatında deyilir.
Qeyd olunur ki, söhbət Şahrud kosmik mərkəzindən, həmçinin Semnan şəhərindəki kosmodromdan gedir.
ABŞ-nin İran İslam İnqilabı Keşikçiləri Korpusu (SEPAH) tərəfindən orta mənzilli ballistik raketlər hazırlamaq üçün istifadə etdiyindən şübhələndiyi Şahrud kosmik mərkəzində hazırda Müdafiə İnnovasiyaları və Tədqiqat Təşkilatının "böyük qüvvələri" yerləşir.
