Erməni vandalizmi

44 günlük Vətən müharibəsində əldə edilmiş zəfər nəticəsində erməni tapdağı altında olan torpaqlarımız işğaldan azad edildikdən sonra mənfur düşmənin törətdiyi vandalizmin canlı şahidi olduq. Belə ki, işğalçılar tərəfindən 30 ilə yaxın müddət ərzində tarix və mədəniyyət abidələrimizin erməni terroruna məruz qaldığı ortaya çıxdı. Bundan əlavə binalar, evlər, dini abidələrimiz dağıdılmış, yerlə-yeksan edilmişdir. Xüsusilə Ağdam, Füzuli, Cəbrayıl və Zəngilan şəhərləri tamamilə dağıdılmış, daş üstə-daş saxlanılmamışdır. Erməni vandalizminin heç bir sərhəd tanımaması qədim tarixə malik abidələrimizin və mədəniyyət nümunələrimizin dağıdılması ilə sübuta yetirildi.

Qarabağ bölgəsində və ətraf rayonlarda Azərbaycanın milli mədəniyyət ocaqlarına erməni təcavüzkarlarının vurduqları ziyanı dəqiq hesablamaq mümkün deyildir, çünki talan və məhv edilmiş sərvətlər nəinki Azərbaycanın, həm də bütün dünya sivilizasiyasının misilsiz mədəniyyət nümunələridir.

Xüsusi əhəmiyyətə malik abidələrimizə bu formada barbarcasına münasibət təkcə xalqımızın milli dəyərlərinə qarşı deyil, ümumilikdə dünya mirasına və dəyərlərinə qarşı edilmiş təcavüz kimi dəyərləndirilməlidir.

Əsrlər boyu dünya ictimaiyyətinə “məzlum xalq” kimi görünməyə çalışan ermənilərin işğal altındakı ərazilərimizdə törətdikləri talan və dağıntılarla əsl simaları ortaya çıxmışdır. Lakin təssüf hissi ilə qeyd etməliyik ki, real faktlar ortada olduğu halda dünya ictimaiyyəti hələ də susur və haqqı görməzdən gəlirlər. Oktyabrın 14-də Astanada Müstəqil Dövlətlər Birliyi Dövlət Başçıları Şurasının iclasında çıxışı zamanı Azərbaycan Respublikasının Prezidenti İlham Əliyev cənabları Ermənistanın təcavüzkar siyasətindən və işğal altında olan ərazilərimizdə erməni vandalizminin miqyasından geniş şəkildə bəhs etmiş və dünya ictimaiyyətini bu reallığı görməyə dəvət etmişdir. Qeyd etməliyik ki, ərazilərimizdə törədilmiş bu vəhşiliklərlə Ermənistan özünün əsl simasını bütün dünyaya nümayiş etdirmiş oldu.

Bundan əlavə işğal altındakı ərazilərimizdə yeraltı və yerüstü sərvətlərimiz uzun illər boyu vəhşicəsinə talan edilmiş və Ermənistana daşınmışdır. Yalnız Müzəffər Ali Baş Komandanımız İlham Əliyevin rəhbərliyi ilə rəşadətli ordumuzun qələbəsi nəticəsində işğal altındakı bu proseslərə birdəfəlik son qoyulmuş oldu və beynəlxalq hüquq, beynəlxalq ədalət bərpa edildi.

Hazırda işğaldan azad edilmiş ərazilərimizdə erməni vandalizminin izləri silinməkdədir. Dağıdılmış tarixi və dini abidələrimiz bərpa edilir, xüsusi hazırlanmış planlar əsasında şəhər və kəndlərimiz yenidən qurulur. İnanırıq ki, aparılan genişmiqyaslı bərpa və quruculuq işləri nəticəsində işğaldan azad edilmiş ərazilərimizə yenidən həyat qayıdacaq və Böyük Qayıdış reallığa çevriləcəkdir.

Rəşad Rəhmanov
Siyəzən şəhər 2 saylı tam orta məktəbin direktoru