"50 gün çox uzun müddətdir"
Avropa diplomatiyasının rəhbəri Kaja Kallas Brüsseldə jurnalistlərə açıqlamasında ABŞ prezidenti Donald Trampın Ukraynadakı münaqişə ilə bağlı razılığın əldə olunması üçün son tarix təyin etməsi ilə bağlı bəyanatını alqışlayıb.
"Amerikalıların addımlar atması yaxşı haldır və mən ümid edirəm ki, onlar da avropalılar kimi Ukraynaya hərbi yardım göstərəcəklər”, - Avropa Komissiyasının saytında dərc olunmuş stenoqramda deyilir.
Eyni zamanda Kallas qeyd edib ki, ABŞ prezidentinin Ukrayna ilə bağlı razılığın əldə olunması üçün müəyyən etdiyi 50 günlük müddət çox uzundur.
"Bir tərəfdən Trampın Rusiyaya qarşı sərt mövqeyi müsbət haldır. Digər tərəfdən, 50 gün çox uzun müddətdir”, - deyə Avropa diplomatiyasının rəhbəri əlavə edib.
Xatırladaq ki, bir gün əvvəl Tramp yaxın 50 gün ərzində Ukrayna ilə bağlı razılaşmalar əldə olunmayacağı təqdirdə Rusiyanı onun mallarına yüksək rüsumlar tətbiq etməklə hədələmişdi. Amerika lideri tariflərin hansı mal kateqoriyalarına şamil ediləcəyini açıqlamayıb.
