Kolumbiya “Bir kəmər, bir yol” təşəbbüsünə qoşulur
Kolumbiya prezidenti Qustavo Petro ölkəsinin Çinin “Bir kəmər, bir yol” təşəbbüsünə qoşulması üçün saziş imzalamaq niyyətində olduğunu açıqlayıb.
Avrasiya.net xəbər verir ki, Kolumbiya lideri bu barədə bazar ertəsi Pekində olarkən açıqlama verib.
"Biz "İpək Yolu"nu ("Bir kəmər, bir yol" təşəbbüsünün ikinci adı) imzalamağa hazırlaşırıq. Həm Latın Amerikası, həm də Kolumbiya azad, suveren və müstəqildir. Dünyanın istənilən xalqı ilə qurduğumuz əlaqələr isə azadlıq və bərabərlik şərtlərinə əsaslanmalıdır. Biz Çin və Latın Amerikası arasında irəliyə doğru böyük bir addım atmağa qərar verdik”, - deyə Petro bildirib.
Kolumbiya prezidenti Çinlə ticarət ittifaqına qoşulmaq planlarından da danışıb. Petro əmindir ki, Pekinlə yaxınlaşma Boqotaya infrastruktur və yeni texnologiyaların inkişafına kömək edəcək.
