İran Avropa İttifaqının nüvə təkliflərinə cavab verdi

İran hakimiyyəti Avropa İttifaqının nüvə sazişinin bərpası ilə bağlı təkliflərinə cavab verib.

Bu barədə "Al Jazeera" telekanalı iranlı rəsmilərə istinadən məlumat yayıb.

İran tərəfinin göndərdiyi cavabın mətni hələlik açıqlanmayıb.

Daha əvvəl İranın xarici işlər naziri Hüseyn Əmir Abdullahian bildirmişdi ki, Tehran yerli vaxtla gecə yarısına qədər Avropa İttifaqının nüvə sazişi üzrə müzakirəçisi Enrike Moreyə Avropa tərəfinin təkliflərinə yazılı cavab verəcək.

Qeyd edək ki, Avropa İttifaqı 2015-ci ilin nüvə sazişi ilə əlaqədar “yekun” təklif irəli sürüb və bir neçə həftə ərzində İrandan cavab gözləyirdi.

Xatırladaq ki, İranın nüvə proqramını məhdudlaşdıran saziş 2015-ci ildə imzalanıb. ABŞ-ın sabiq prezidenti Donald Tramp hakimiyyətə gəldikdən sonra müqavilədən çıxdığını elan edib. Bayden prezident seçildikdən sonra nüvə sazişinin bərpa ediləcəyini bildirib. Vyanada bir sıra danışıqlar aparılsa da, mart ayından etibarən müzakirələr dayandırılıb. Buna səbəb Tehranın Vaşinqtondan İslam İnqilabı Keşikçiləri Korpusunu ABŞ-ın terrorçu təşkilatlar siyahısından çıxarmaqda israr etməsi olub. Sazişin tərəfləri Almaniya, İngiltərə, Çin, Fransa və Rusiyadır.