DTX-nin saxladığı şöbə müdiri həbs olunduMədəniyyət Nazirliyinin Təchizat və əmlak şöbəsinin müdiri İlkin Nəsibovun barəsində həbs qətimkan tədbirinin seçilməsi ilə bağlı istintaq orqanının vəsatətinə baxılıb.

Avrasiya.net xəbər verir ki, Səbail rayon Məhkəməsində keçirilən prosesdə vəsatət təmin edilib.

İlkin Nəsibov barəsində 4 aylıq həbs qətimkan tədbiri seçilib.

Qeyd edək ki, ötən gün Dövlət Təhlükəsizliyi Xidməti (DTX) Mədəniyyət Nazirliyində əməliyyat keçirib. Əməliyyat zamanı saxlanılanlar arasında nazirliyin Təchizat və əmlak şöbəsinin müdiri İlkin Nəsibov da var.
"Azərbaycan İran üçün Suriya, İraq və ya Livan deyil"İran səfirliyi doğrudan da təxribatla məşğuldur. Əvvəllər özünü bizə formal da olsa dost kimi göstərən İran İslam Respublikası artıq hal-hazırda hətta üzdə dost gimi davranmağa da ehtiyac duymur. Bu ölkə Azərbaycana qarşı açıq-aşkar düşmənçilik siyasəti yürüdür. Dövlət Təhlükəsizliyi Xidmətinin (DTX) İranın xüsusi xidmət orqanlarına işləyən Azərbaycan vətəndaşları ilə bağlı əməliyyat keçirərək İran xüsusi xidmət orqanının nəzarəti altında yaradılmış qanunsuz silahlı birləşməni ifşa etməsi də İranın bizə qarşı düşmənçiliyinin miqyasını göstərir.

DTX-nin yaydığı rəsmi məlumatda İranın Azərbaycandakı səfirliyinin adının keçməsi isə İranın iç üzünü açıb ortaya qoyur. Səfirlik hara, təxribatla məşğul olmaq hara? Səfirlik maşını nə vaxtdan iki ölkənin sərhəddindən qanunsuz yüklərin daşınması üçün vasitə olub? İran səfirliyinə məxsus avtomaşınla bizim ölkəmizə bizim milli maraqlarımıza zidd olan təbliğat-təşviqat vasitələrinin daşınması fars-molla rejiminin xalqımıza qarşı, ölkəmizə qarşı necə dərin nifrət bəsləməsinin göstəricisidir.

Bu rejim artıq hətta diplomatik qalmaqal yaşanacağından da çəkinmir. İranın hakim rejimi Ermənistanı himayə etmək və Azərbaycanın mövqelərinin zəiflədilməsi üçün hər cürə məkrli vasitələrə əl atır. DTX-nin son əməliyyatı İranın istər dini-mənəvi sahədə, istərsə də digər istiqamətlər üzrə həmişə ölkəmizə qarşı təxribat işləri apardığını bir daha təsdiqləyir. Lakin İranın bu cür məsuliyyətsiz, destruktiv davranışlarına son verməyin vaxtı artıq gəlib çatıb. Biz təhlükəsizlik orqanlarımızın bu istiqamətdə fəaliyyətlərini təqdir edirik. İranın ölkəmizdə pozuculuq-təxribat işləri ilə məşğul olan əlaltılarına qarşı mübarizə bundan sonra daha da genişlənəcək.

Azərbaycan İran üçün Suriya, İraq və ya Livan deyil. Cənub qonşumuzun Azərbaycana qarşı təxribatçı siyasəti sonda bumeranq kimi İranın özünə qarşı qayıda bilər. İşğalçı Ermənistanın baş nazirini "bismillah"la qarşılayan mollalar yaxşı olar ki, odla oynamasınlar!

Əlisahib Hüseynov,
Milli Həmrəylik Partiyasının sədri
“Yeni klinika”da "Zəfərin fatehləri" adlı tədbir keçirildiBu gün "Yeni klinika" tibb müəssisəsində Zəfər Gününə həsr edilmiş "Zəfərin fatehləri" adlı tədbir baş tutub.

Vətən Müharibəsinin ildönümünə həsr olunmuş tədbirin məqsədi İkinci Qarabağ müharibəsində qəhrəmancasına şəhid olmuş hərbçilərimizi, mülki vətəndaşlarımızı, həkimlərimizi anmaq, işğaldan azad edilmiş torpaqlarımızın qayıdışını və böyük qələbəmizi qeyd etməkdir.

Tədbirdə “Tibbi Ərazi Bölmələrini İdarəetmə Birliyi”nin (TƏBİB) İcraçı direktoru Vüqar Qurbanov, millət vəkili İlham Məmmədov, Nizami Rayon İcra Hakimiyyəti başçısının müavini İldırım Mehdiyev, “YAŞAT” Fondunun rəhbəri Elvin Hüseynov, Xüsusi Təyinatlı Qüvvələrin mayoru, Vətən Müharibəsi qəhrəmanı Zaur Hüseynov, Hərbi Dəniz Qüvvələrinin "Sualtı Hücum" Dəniz Xüsusi Təyinatlılarının zabiti, 3-cü dərəcəli kapitan Babək Şirinov, şəhid ailələri, Vətən Müharibəsi qaziləri və klinika əməkdaşları iştirak ediblər.

Azərbaycan Respublikasının Dövlət Himni ilə başlayan tədbirdə əvvəlcə şəhidlərimizin xatirəsi 1 dəqiqəlik sükutla yad edilib.

Açılış nitqi ilə çıxış edən “Yeni klinika” tibb müəssisəsinin direktoru vəzifəsini icra edən baş həkim Cavid Paşayev Vətən Müharibəsində qazanılan zəfərin 2-ci ildönümü münasibətilə hər kəsi təbrik edib.
Cavid Paşayev şəhidlərimizə rəhmət, bütün qazilərə, eləcə də "Yeni klinika" tibb müəssisəsində fəaliyyət göstərən müharibə veteranlarına can sağlığı diləyib.

TƏBİB-in İcraçı direktoru Vüqar Qurbanov isə çıxışında Böyük Vətən müharibəsi dönəmində 43 tibb müəssisəsini, 720 tibb işçisini əhatə edən 118 briqadanın cəbhə bölgəsində xidmət etdiyini bildirib.

“Azərbaycan ordusunun yerləşmə mövqeyinə uyğun olaraq, Şəmkir, Bərdə və Beyləqan istiqaməti üzrə qurulan tibbi təxliyə planına əsasən yaralılara ümumi olaraq 6 050 çarpayı ayrılıb və 24 saat ərzində tibbi xidmət təmin edilib. Həmin dövrdə “Yeni klinika” tibb müəssisəsində çalışan dəyərli məsləkdaşlarımız da böyük fədakarlıqlarla yadda qalıb. Yüzlərlə yaralı hərbçimizin sağlamlıqlarına qovuşması üçün klinikada tibb personalı tərəfindən ciddi əməliyyatlar icra edilib”.

V.Qurbanov Vətən müharibəsindən sonrakı dövrdə də qazi və şəhid ailələrinə xidmət göstərildiyini, Vətən Müharibəsi qazilərinin reabilitasiyası üçün ümumilikdə, TƏBİB-in tabeli tibb müəssisələrdən 180 tibbi personalın təhkim olunduğunu vurğulayıb.
“Düşünürəm ki, son 2 il ərzində tabeli tibb müəssisələrində qazilərin reabilitasiyası uğurla həyata keçirilib. Ötən dövrdən bu günə qədər 100-dən çox qaziyə xidmət göstərilib. Bununla yanaşı, “Yaşat” Fondu ilə əməkdaşlıq çərçivəsində ağır yaralanmış 38-ə yaxın qazinin əməliyyatı uğurla icra edilib”.

Digər çıxışçılar Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi ilə 44 gün sürən hərbi əməliyyatlar nəticəsində rəşadətli ordumuzun erməni əsarətində olan torpaqlarımızın azad olunması istiqamətində göstərdiyi şücaətdən, tibb personalının fədakarlığından bəhs edib.

Tədbirin bədii hissəsində "Zəfər Günü" ilə bağlı tanıtım filmi, musiqi ifaları və gənc rəssamların rəsm əsərləri təqdim olunub.



#yeniklinika #tebibailesi #Zəfər #zefergunu
İşlək dialoq 31 oktyabr 2022-ci ildə bütün gözlər Ermənistan-Azərbaycan münasibətlərinin normallaşdırılması üçün Rusiyanın vasitəçiliyi ilə Soçidə keçirilən növbəti görüşdə idi. Postmüharibə dövründə Azərbaycan-Ermənistan münasibətlərinin normallaşdırılması, bölgədə sülh və təhlükəsizliyin təmin edilməsi istiqamətində bu görüş xüsusi əhəmiyyət kəsb edirdi. Paşinyan başda olmaqla Ermənistan tərəfi görüşə hazırlıqlı gələrək sözügedən görüşdən konkret nəticələrlə geri dönəcəklərini düşünürdülər. Lakin cənab Prezident İlham Əliyev iradəsini və mövqeyini ortaya qoymaqla növbəti dəfə təmkin göstərərək qalib ölkəni uğurla təmsil etdi. Görüşün nəticəsi olaraq qəbul edilmiş yekun bəyanatdan da açıq görünür ki, bu görüş Azərbaycan diplomatiyasının növbəti uğuru və qələbəsidir.

Soçi görüşündə imzalanan növbəti üçtərəfli bəyanata diqqət yetirsək görərik ki, bu bəyanat bundan öncə Rusiyanın vasitəçiliyi ilə imzalanmış sənədlərə istinad olunub. Bəyanatın mühüm məqamlarından biri isə Azərbaycan və Ermənistanın ərazi bütövlüyünün, suverenliyinin tanınmasıdır. Soçi görüşündə həmçinin Azərbaycan ərazisi olan Qarabağda yerləşən Rusiya sülhməramlılarının iki illik fəaliyyətinə qiymət verilmiş və ümumilikdə tərəflər sülhməramlıların fəaliyyətini qənaətbəxş hesab etmişlər. Görüşdə Azərbaycan diplomatiyasının digər uğurlarından biri də məhz Rusiya sülhməramlıların fəaliyyət müddətləri ilə bağlı Ermənistan tərəfinin təklifinin rədd edilməsi oldu. Belə ki, Ermənistanın Baş nazirinin Qarabağda yerləşən sülhməramlıların mandatının uzadılması ilə bağlı təklifi qəbul edilməmiş oldu.

Bundan əlavə Ermənistan tərəfinin danışıqlarda Qarabağın statusu ilə bağlı məsələlərin gündəliyə gətirilməsi cəhdlərinin qarşısı da alınmış oldu. Cənab Prezident bu məsələyə toxunaraq bir daha qeyd etmişdir ki, Qarabağ münaqişəsi bizim üçün iki ilə yaxındır ki, bitib. Məhz bunun nəticəsidir ki, Ermənistan tərəfi istəsə də sənəddə Qarabağın statusu barədə məsələ ümumiyyətlə öz əksini tapmayıb. Yekun sənədə əsasən, tərəflər arasındakı münasibətlərin normallaşdırılmasından söhbət gedir, sülhün əldə olunmasının vacibliyi vurğulanır. Bəyanatda yenilik olaraq xalq diplomatiyasına üstünlük verilməsi öz əksini tapıb və ictimaiyyət nümayəndələrinin, din xadimlərinin, həmçinin parlamentlərarası əlaqələrin, dialoqun vacibliyi, kommunikasiyaların açılması xüsusi qeyd edilib".

Soçi görüşü Azərbaycan diplomatiyasının yeni uğuru oldu. Cənubi Qafqazda sülhün əldə edilməsinə dair vahid yanaşma bir daha təsdiq edildi, istənilən anlaşma ölkələrin ərazi bütövlüyü və suverenliyi çərçivəsində mümkündür. Həmçinin Soçi görüşü bir daha təsdiq etdi ki, Azərbaycan bütün platformalarda öz haqlı mövqeyini təqdim edib prosesdəki mövqeyini qoruyub saxlaya bilir. Bu isə öz növbəsində Azərbaycan Respublikasının Prezidenti İlham Əliyev cənablarının yürütdüyü diplomatiyanın gücüdür. Azərbaycan daha bir uğura imza atdı. Bu uğurlar isə bizi ərazi bütövlüyümüz çərçivəsində imzalanacaq sülh anlaşmasına yaxınlaşdırır.

Rəşad Rəhmanov
Siyəzən şəhər 2 saylı tam orta məktəbin direktoru
"Prezident İlham Əliyev Əlcazairdə Fransa və Ermənistanı ifşa etdi" - RƏYAzərbaycan Prezidenti İlham Əliyev Əlcazairdə Ərəb Dövlətləri Liqasının 31-ci Zirvə toplantısında çıxışı ilə növbəti dəfə Fransa və Ermənistanı ifşa etdi".

Bunu "Report"a açıqlamasında Milli Məclisin deputatı Ceyhun Məmmədov deyib.

Onun sözlərinə görə, dövlət başçısının ötən gün Əlcəzairə səfər etməsi və Ərəb Dövlətləri Liqasının 31-ci Zirvə toplantısında iştirakı bir çox aspektdən xüsusi önəm daşıyır: "Çünki Ermənistan son illər ərəb ölkələri ilə əlaqələrin gücləndirilməsi üçün səylə çalışır. Bir sıra ərəb ölkələrində güclü erməni diasporu fəaliyyət göstərir".

Deputat vurğulayıb ki, Prezident İlham Əliyev çıxışında bir çox vacib məqamlara toxunub: "Dövlət başçısının xüsusilə Fransa ilə bağlı dedikləri diqqətçəkicidir. Prezident İlham Əliyev növbəti dəfə Fransanı ifşa etdi. O qeyd etdi ki, “Fransanın Əlcəzair xalqına qarşı törətdiyi qətliam dünyanın heç vaxt unutmamalı olduğu bir hadisədir. Fransa Əlcəzair xalqına qarşı çox dəhşətli bir müharibə aparıb. Bu dəhşətli qətliam 1,5 milyon insanın ölümü ilə nəticələnib”.

C.Məmmədov bildirib ki, Azərbaycan Prezidenti Ərəb Dövlətləri Liqasının 31-ci Zirvə toplantısında çıxşında Ermənistanı da ifşa edib: "Dövlət başçısı Ermənistanın 30 il Azərbaycan torpaqlarını işğal altında saxladığını, 67 məscidi barbarcasına dağıtdığını, 1 milyona yaxın mina basdırdığını, Azərbaycanın ədaləti bərpa etdiyini qeyd etdi. Hesab edirəm ki, dövlət başçımızın Əlcəzairə səfəri ərəb ölkələri ilə Azərbyacan arasında əlaqələrin inkişafına da ciddi təsir göstərəcək".
Ərdoğan bu gün Zelenski ilə danışacaqTürkiyə prezidenti Rəcəb Tayyib Ərdoğan Ukrayna lideri Volodimir Zelenski ilə telefon danışığı aparacaq.

Ərdoğanın sözlərinə görə, söhbət bu gün, noyabrın 2-də baş tutmalıdır.

“Dünən mənim Rusiya Federasiyasının Prezidenti Vladimir Putinlə telefon danışığım olub, bu gün də Zelenski ilə danışıqlar gözlənilir”.

Türkiyə lideri qarşıdakı danışıqların mövzusunu açıqlamayıb.

Bundan əvvəl Ərdoğan Türkiyənin müdafiə naziri Hulusi Akarla rusiyalı həmkarı Sergey Şoyqu arasında apardığı danışıqlardan sonra "taxıl dəhlizi"nin bərpa olunacağını açıqlamışdı.

"Çərşənbə günü saat 12:00-dan etibarən taxıl tədarükü bərpa olunacaq", - prezident nazirlərin danışıqlarının nəticələrinə toxunaraq demişdi.
İrəvanda erməni deputat “türk agenti” adlandırıldıTürkiyə parlameninin erməni əsilli deputatı Karo Paylanın Ermənistana bir neçə günlük səfəri bu ölkədə birmənalı qarşılanmayıb.

Modern.az xəbər verir ki, müxalifətdən olan bəzi tanınmış şəxslər Karo Paylanı “türk agenti” adlandıraraq, onun “persona non qrata” elan olunmasına çağırış ediblər.

Xüsusilə keçmiş deputat Nairi Zoqrabyan daha çox canfəşanlıq edib. O, Karo Paylanı Türkiyənin hakimiyyət dairələrinin öyrətdiyi emissar adlandırıb. Zoqrabyan sosial şəbəkələrdə Paylana qarşı kampaniya da başladıb.

Xatırladaq ki, bir neçə gündür İrəvanda olan Türkiyənin erməni əsilli deputatı Karo Paylan prezident Vaaqn Xaçatryan, eks-prezident Levon Ter-Petrosyan, parlamentin sədri Alen Simonyan və digər rəsmi şəxslərlə görüşüb. O, görüşlərdə Türkiyə-Ermənistan münasibətlərinin normallaşdırılması məsələsini müzakirə edib, bu işə töhfə verə biləcəyini qeyd edib.

Karo Paylan Türkiyə parlamentinə Xalqların Demokratik Partiyasından deputat seçilib.
İrandakı aksiyalarda ölənlərin sayı AÇIQLANDIİranda öldürülən və həbs edlən etirazçıların sayı açıqlanıb.

Avrasiya.net xarici KİV-ə istinadən xəbər verir ki, bu barədə İran İnsan Haqları Təşkilatı məlumat yayıb.

Məlumata görə, 17 sentyabrdan 1 noyabr axşam saatlarına kimi İranda davam edən etiraz nümayişlərində 47-i uşaq olmaqla 288 nəfər hökumət məmurları tərəfindən öldürülüb.

Bununla yanaşı, 14 161 nəfər həbs edilib.
"Nazirlik əməkdaşı" saxlanıldı - VideoÖzünü sosial şəbəkələrdə Əmək və Əhalinin Sosial Müdafiəsi Nazirliyinin əməkdaşı kimi təqdim edərək vətəndaşlara qarşı dələduzluq törədən şəxs saxlanılıb.

Bu barədə Avrasiya.net-ə Daxili İşlər Nazirliyinin (DİN) Mətbuat Xidmətindən məlumat verilib.

Bildirilib ki, DİN-ə Əmək və Əhalinin Sosial Müdafiəsi Nazirliyinin rəsmi feysbuk səhifəsində paylaşılan məlumatların şərh bölməsinə müraciəti daxil olan vətəndaşlarla sonradan əlaqə yaradaraq özünü qeyd edilən qurumun əməkdaşı kimi təqdim edən naməlum şəxsin insanlara qarşı dələduzluq etdiyi barədə müraciət daxil olub.

Nazirliyin Baş Mütəşəkkil Cinayətkarlıqla Mübarizə İdarəsinin əməkdaşları tərəfindən həyata keçirilən əməliyyat-texniki tədbirlər nəticəsində qeyd edilən qanunsuz əməli törətməkdə şübhəli bilinən paytaxt sakini əvvəllər məhkum olunmuş Vüqar Əhmədov tutulub.

Araşdırma zamanı müəyyən edilib ki, Vüqar Əhmədov feysbuk sosial şəbəkəsində “Həsən Ağayev” və digər saxta profillər yaradaq orada qeyd edilən dövlət qurumunun əməkdaşı olduğu barədə informasiyalar yerləşdirib.

Daha sonra Əmək və Əhalinin Sosial Müdafiəsi Nazirliyinin rəsmi səhifəsinin şərh bölməsinə yazan vətəndaşlarla əlaqə yaradaraq onların müraciətlərini qısa zamanda həll edəcəyi barədə yalan vədlər verib. Vüqar Əhmədov bunun müqabilində zərərçəkənlərdən onun kartına müxtəlif məbləğlərdə maddi vəsaitin köçürülməsini tələb edib. Həmin vəsaitləri əldə edəndən sonra isə zərərçəkənlərin onunla bir daha əlaqə yaratmaması üçün mobil telefonlarını və sosial şəbəkə hesablarını bloklayıb.

Faktla bağlı Cinayət Məcəlləsinin dələduzluq maddəsi ilə cinayət işi başlanılıb. Vüqar Əhmədov təqsirləndirilən şəxs qismində cəlb edilməklə barəsində məhkəmənin qərarı ilə həbs qətimkan tədbiri seçilib.

"Bu şəxsin qanunsuz əməllərindən zərərçəkən digər vətəndaşlar varsa Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinə müraciət edə bilərlər", - məlumatda qeyd edilib.
XİN İran səfirini persona non qrata elan edəcək? – RəsmiÖtən gün Azərbaycan Dövlət Təhlükəsizliyi Xidməti İran xüsusi xidmət orqanının nəzarəti altında yaradılmış qanunsuz silahlı birləşməni ifşa etməsi ilə bağlı məlumat yaydı. Məlumatda ən çox diqqət çəkən və müzakirə olunan isə İranın Azərbaycandakı səfirliyinin bu silahlı birləşmə ilə əlbir olmasıdır. Belə ki, Fəqan Sədrəddin oğlu Məmmədovun İranın Azərbaycandakı səfirliyinə məxsus avtomaşınla Azərbaycana çatdırılan, üzərində dini məzmunlu şüarlar yazılmış köynəklərin respublikanın bəzi rayonlarında keçirilməsi planlaşdırılan aksiyaların iştirakçılarına paylanmasını təşkil etməsi faktı üzə çıxıb. Bu daşınma dövlət təhlükəsizliyimizə birbaşa təhdid olduğundan Xarici İşlər Naziriliyinin İranın Bakıdakı səfiri Seyid Abbas Musəviyə qarşı hansı addımı atacağı diqqət mərkəzindədir.

Bununla bağlı Axar.az-ın sorğusuna cavab verən XİN-in mətbuat xidmətinin rəhbəri Ayxan Hacızadə bildirib ki, qurumun hansısa addım atıb-atmayacağı barədə onda heç bir məlumat yoxdur.

“Hər hansı bir tədbir görülsə, açıqlama veriləcək”, - o qeyd edib.