BAK xeyriyyəçilik kampaniyasını davam etdirir
Bayram günləri ərəfəsində xeyirxahlıq, həmrəylik və milli-mənəvi dəyərlərimizin təntənəsi bir daha özünü göstərdi. Niderland Krallığında fəaliyyət göstərən Benilüks Azərbaycanlıları Konqresinin (BAK) dəstəyi ilə həyata keçirilən növbəti sosial aksiya çərçivəsində şəhid ailələri, əlillər və cəmiyyətimizin ən həssas təbəqəsinə aid olan ehtiyacı olan insanlar ziyarət olunub.
Bu təşəbbüsün əsas məqsədi təkcə maddi yardım göstərmək deyil, eyni zamanda həmin ailələrə mənəvi dayaq olmaq, onların yanında olduğumuzu hiss etdirmək idi. Ziyarətlər zamanı ailələrlə səmimi söhbətlər aparıldı, onların qayğı və ehtiyacları dinlənildi, bayram sevincini bölüşmək üçün müxtəlif sovqatlar təqdim olundu.
Bu sovqatlar ərzaq məhsulları, gündəlik tələbat vasitələri və digər zəruri yardımlardan ibarət olmaqla yanaşı, həm də diqqət və qayğının bir nümunəsi kimi qiymətləndirildi.
Benilüks Azərbaycanlıları Konqresinin dəstəyi ilə həyata keçirilən bu təşəbbüs bir daha göstərdi ki, harada yaşamağımızdan asılı olmayaraq, milli dəyərlərimizə sadiqliyimiz və sosial məsuliyyət hissimiz dəyişməz olaraq qalır.
Diaspor təşkilatlarımızın bu istiqamətdə gördüyü işlər həm ölkə daxilində, həm də xaricdə yaşayan azərbaycanlılar arasında birlik və həmrəyliyin möhkəmlənməsinə mühüm töhfə verir.
