İran HƏMAS-a kömək edəcək

İran hakimiyyəti Qəzza zolağına nəzarət edən HƏMAS hərəkatına fəal dəstək verməkdə davam edəcək.

Publika.az TASS-a istinadla bildirir ki, bunu cümə günü İslam İnqilabı Keşikçiləri Korpusunun (İİKK) komandiri Hüseyin Səlami HƏMAS Siyasi Bürosunun rəhbəri İsmayıl Haniya ilə telefon danışığı zamanı deyib.

"İslam Respublikası Fələstin xalqına və HƏMAS-ın cəsarətli hərəkatına hərtərəfli dəstək verməyə hazırdır. ...İran bu məsələdə öz rolundan imtina etməyəcək", - deyə Fələstin radiosu Dunya Al Watan Səlamidən sitat gətirib.

Haniya isə öz növbəsində "İrana Fələstin xalqına və HƏMAS-a göstərdiyi köməyə görə dərin minnətdarlığını" bildirib.

Radiostansiya qeyd edir ki, söhbət İran tərəfinin təşəbbüsü ilə keçirilib.

Bundan əvvəl isə İsraillə Fələstin radikal qruplaşmaları arasında atəşkəs rejiminin yaradılması ilə bağlı çıxış edən Haniya İran hakimiyyətinə maliyyə dəstəyinə və HƏMAS-a silah göndərdiyinə görə təşəkkür etmişdi.

Yeri gəlmişkən, bir az əvvəl Ağ Ev bəyan etmişdi ki, Birləşmiş Ştatlar Yaxın Şərqdəki münaqişənin hazırkı durumu üzündən İsrailə hərbi yardım etmək planlarını dəyişmək niyyətində deyil.