“"AzerGold” istehsalat proseslərini optimallaşdırıb“AzerGold” Qapalı Səhmdar Cəmiyyəti (QSC) mineral-xammal resurslarından istifadənin səmərəliliyinin yüksəldilməsi və istehsalat proseslərinin optimallaşdırılması istiqamətində fəaliyyətini uğurla davam etdirir.

Xatırladaq ki, Cəmiyyət 2017-ci ildə “Çovdar” yatağında istismar işlərinə başlayarkən mədənin oksidləşmiş filizlərinin iqtisadi cəhətdən səmərəli qızıl həcmi 212 min unsiya miqdarında təsdiqlənmiş, hasilat işlərinin 2020-ci ildə yekunlaşacağı hesablanmışdır. “AzerGold” QSC tərəfindən ötən dövr ərzində beynəlxalq məsləhətçi şirkətlərin cəlb edilməsi ilə müasir texnoloji yeniliklərin tətbiqi ilə aparılmış planlı geoloji kəşfiyyat və buruqqazma işləri nəticəsində sözügedən yatağın üst qatlarında yerləşən oksidləşmiş filiz həcmlərinin artırılması, üstəlik yerin daha dərin qatlarındakı tranzit və sulfid filizlərinin emalı satılabiləcək qızıl ehtiyatlarını artırmağa imkan yaratmışdır.

Bundan əlavə, “Çovdar” mədəninin yaxınlığında yerləşən və müstəqil şəkildə iqtisadi səmərəsizlik riski daşıyan nisbətən kiçik, cinah yataqların ardıcıl istismara cəlb edilməsi “Çovdar” mədəninin bazasında yaradılmış Çovdar İnteqrəedilmiş Regional Emal Sahəsinin (ÇİRES) ümumi ehtiyatlarını artırmışdır. Beləliklə, sahənin istismar müddəti 2020-ci ildən 2028-ci ilədək uzadılmaqla fəaliyyət dövrü 8 il, ümumi ehtiyatları isə ilkin hesablanan 212 min unsiyaya əlavə olaraq 519.9 min unsiya artırılmış, 731,9 min unsiyaya çatdırılmışdır. Hazırda müvafiq kəşfiyyat və tədqiqat işlərinin davam etdirildiyi nəzərə alınaraq sözügedən həcmlərin daha da artırılması istisna edilmir.

Sadalanan göstəricilərə nail olunması üçün ÇİRES-də mövcud qırıcı və konveyer xəttinin optimizasiyası nəticəsində keçirmə qabiliyyəti təkmilləşdirilmiş, xəttlərin mövcud istehsal imkanları 50%-dək artırılmışdır. Hazırda topa aşındırma üsulu ilə işləyən emal zavodu ilə yanaşı, tranzit və sulfid filizlərinin emalı üçün çən aşındırma (CİL) üsulu ilə fəaliyyət göstərəcək yeni emal zavodunun tikintisi də sürətlə davam etdirilir. Tikinti layihəsinin idarəedilməsi və keyfiyyətə nəzarət məqsədilə Cənubi Koreyanın “Heerim Architects & Planners Co” məsləhətçi şirkəti, zavodun və müvafiq infrastrukturun qurulması üzrə isə “Maqro Construction” beynəlxalq tikinti şirkəti tərəfindən müvafiq işlər görülür.

Sözügedən təkmilləşdirmə işləri çərçivəsində cari ilin birinci rübündə 10 592 unsiya qızıl istehsal edilmişdir. Bu göstəricinin ötən ilin müvafiq dövrü ilə müqayisədə nisbətən az olmasına baxmayaraq, dayanıqlı hasilatın təmin edilməsi məqsədi ilə aparılmış optimizasiya işləri hasilatın həm cari, həm də ötən illin illik planından daha artıq icra edilməsinə, sözügedən sahənin fəaliyyət dövrünün 8 il artırılması isə bölgədə davamlı məşğulluğun təmin olunmasına və yeni iş yerlərinin açılmasına səbəb olacaqdır.

Rusiya Niderlandın 14 diplomatını ölkədən çıxarırRusiya Niderlandın Moskvadakı səfirliyinin və Sankt-Peterburqdakı Baş Konsulluğunun 14 əməkdaşını “arzuedilməz şəxs” elan edib.

“RİA Novosti” xəbər verir ki, bu barədə məlumatı Rusiya Xarici İşlər Nazirliyi yayıb.

Bildirilib ki, aprelin 19-da Niderlandın Rusiyadakı səfiri Xilles Arno Besxoor Plux Xarici İşlər Nazirliyinə çağırılıb və ona rusiyalı diplomatların Niderlanddan çıxarılması ilə bağlı etiraz notası təqdim olunub.

Məlumata görə, niderlandlı dilomatlar 14 gün ərzində Rusiya ərazisini tərk etməlidir.

Xatırladaq ki, bundan əvvəl Niderland Rusiyanın 17 diplomatını “persona non qrata” elan edib.
Moskvadan idarə olunan revanşist qüvvələrin məqsədi...Nikol Paşinyanın Moskvaya səfəri ərəfəsində erməni parlamentinin müxalif “Ermənistan” və “Şərəfim var” fraksiyalarının aksiyalara start verməsi heç də təsadüf deyil. Moskvadan idarə olunan bu revanşist qüvvələrin məqsədi N.Paşinyana psixoloji təzyiq göstərmək və onun bu gün Rusiya prezidenti Vladimir Putinlə Moskvada keçirəcəyi görüşdə mövqelərini zəiflətmək, onu Putinin diktə edəcəyi şərtlərlə razılaşmağa məcbur etməkdir.

“Qarabağ klanı”nın liderlərinin də (Robert Köçəryan və Serj Sərkisyanın) təmsil olunduğu hazırkı Ermənistan müxalifəti hər vasitə ilə Ermənistanın Azərbaycanla sülh danışıqlarına, Ermənistan-Türkiyə münasibətlərinin normallaşmasına mane olmaq, sərhədlərin delimitasiyana və sülh sazişinin bağlanmasına dair işçi qrupların yaradılmasını əngəlləmək və Nikol Paşinyanı Azərbaycanın ərazi bötüvlüyünü tanımaqdan çəkindirməkdir. Bir sözlə, erməni müxalifətinin bütün fəaliyyəti Brüssel görüşünün nəticələrini heçə endirməyə yönəlib.

“Ermənistan” və “Şərəfim var” fraksiyalarının liderləri hesab edir ki, aprelin 6-da Brüsseldə Avropa İttifaqı Şurasının prezidenti Şarl Mişelin vasitəçiliyi ilə baş tutan Əliyev-Paşinyan görüşündə əldə edilmiş razılaşmalar və Paşinyanın Azərbaycanın 5 bənddən ibarət sülh təkliflərini qəbul etməsi ““Artsax”ın həmişəlik itirilməsi” deməkdir. Ancaq müşahidələr onu göstərir ki, hələ də qondarma “Artsax” xəyalı ilə yaşayan müxalifətin son günlər başlatdığı etiraz aksiyaları Paşinyanı ciddi şəkildə narahat eləmir. Çünki Paşinyan müxalifətin revanşist çağırışlarının ümumən erməni xalqı tərəfindən dəstəklənmədiyini görür. “Ermənistan” və “Şərəfim var” fraksiyalarının mitinqləri həddindən artıq sönük keçir. Odur ki, Paşinyanın əsas narahatlığı Ermənistan müxalifəti tərəfindən yox, Kremldən qaynaqlanır.

Bu gün Moskvada baş tutacaq Paşinyan-Putin görüşündə Ermənistan-Azərbaycan münasibətləri, sərhədlərin delimitasiya və demarkasiyası, Azərbaycanın Qarabağ ərazisində müvəqqəti yerləşdirilmiş Rusiya sülhməramlılarının gələcəyi, Brüssel görüşünün nəticələri və Ermənistan ilə Azərbaycan arasında yekun sülh müqaviləsinin imzalanması istiqamətində görüləcək işlər barədə geniş müzakirələr aparılacağı gözlənilir. Putin həm Azərbaycana, həm də Ermənistana ənənəvi təzyiq rıçaqlarının əldə saxlanılması üçün şübhəsiz ki, bu günkü müzakirələrin istiqamətini Rusiyanın geosiyasi və geoiqtisadi maraqları çərçivəsində yönəltməyə çalışacaq. Bu maraqlar Rusiyanın bölgədə varlığının qorunub saxlanılmasına xidmət edir.

Ancaq bütün hallarda Rusiya da artıq Azərbaycan-Ermənistan, Türkiyə-Ermənistan münasibətlərinin normallaşmasının qaçılmaz olduğu faktını qəbul etməyə məcburdur. Bu baxımdan Kremlin Azərbaycan və Ermənistanın Brüssel görüşündən sonra bir-birinə yaxınlaşmağa başlamasını əngəlləməsi mümkünsüzdür. Bəzi ekspertlər bu görüşü Paşinyan üçün “sonuncu çətin imtahan” kimi dəyərləndirsələr də, hesab edirəm ki, Putin bu prosesi dayandırmağın mümkünsüzlüyünü anladığına görə, mövcud prosesi dayandırmağa yox, bunun tam əksinə, prosesdən Rusiyanın maraqları üçün maksimum yararlanmağa çalışacaq.

Əlisahib Hüseynov,
Milli Həmrəylik Partiyasının sədri
YAP-ın Yasamal təşkilatı “Azərsu” ASC-ni məhkəməyə veribYeni Azərbaycan Partiyası (YAP) Yasamal rayon təşkilatı “Azərsu” ASC-ni məhkəməyə verib.

“Report”un əldə etdiyi məlumata görə, Bakı Kommersiya Məhkəməsinə müraciət edən YAP-ın rayon təşkilatı su təchizatı ilə bağlı tələb irəli sürüb.

İddia hakim Fərrux Qasımovun sədrliyi ilə araşdırılacaq.

Məhkəmə iclasının vaxtı hələlik məlum deyil.
Biz sülh sazişi ilə bağlı danışıqlara başlamalıyıq - ƏliyevŞadam ki, Brüsseldəki görüşümüzdən sonra bizi ziyarət edirsiniz. Çox konstruktiv, yaxşı nəticələri və nailiyyətləri olan üçtərəfli görüşdən sonra artıq iki həftə keçib. Səylərinə, bizə çox mühüm məsələləri müzakirə etmək və normallaşma prosesinin başlanğıcı ilə bağlı razılığa gəlmək imkanı verən ab-hava yaratdığına görə Prezident Şarl Mişelə minnətdarlığımı çatdırmağı sizdən xahiş edirəm.

Avrasiya.net xəbər verir ki, bunu Azərbaycan Respublikasının Prezidenti İlham Əliyev aprelin 19-da Avropa İttifaqının Cənubi Qafqaz üzrə xüsusi nümayəndəsi Toivo Klaarın başçılıq etdiyi nümayəndə heyətini qəbul edərkən deyib.

"Düşünürəm ki, bu, başlanğıc nöqtəsi idi. Çünki biz sərhəd üzrə komissiyaların və eyni zamanda, sülh sazişi üzrə işçi qruplarının yaradılması barədə razılığa gəldik. Biz bununla bağlı əvvəllər də danışırdıq və bildiyniz kimi, İkinci Qarabağ müharibəsinin bitməsindən sonra Azərbaycanın mövqeyi həmişə ondan ibarət idi ki, biz sülh sazişi ilə bağlı danlışıqlara başlamalıyıq. Hesab edirəm ki, rəsmi başlanğıc nöqtəsi aprelin 6-da Brüsseldə baş tutdu. O vaxtan bəri biz işləyirdik, Xarici İşlər Nazirliyi çalışırdı və mənim administrasiyam sizin komandanızla təmasda idi və biz razılaşdığımız kimi, başlamağa hazırıq. Hesab edirəm ki, bu irəliyəşi davam etdirməyimiz və hər iki tərəfin razılaşmalara riayət etməsi mühüm əhəmiyyət kəsb edir", - o vurğulayıb.
İradə Əlilinin yeni uğuruNərimanov Rayon Mərkəzləşdirilmiş Kitabxana Sisteminin Mərkəzi Kitabxanasında “Peşəyönümlü Təhsilin İnkişafına Dəstək” İctimai Birliyinin sədri, Azərbaycan Yazıçılar Birliyinin üzvü, Prezident təqaüdçüsü İradə Əlilinin ( Əliyeva) müəllifi olduğu “Zəfər yolu”, “Bir damla göz yaşında torpaq həsrəti”, “Laçın həsrətim” və “Xocalı Şahidlər danışır” adlı kitablarının təqdimat mərasimi baş tutub.

Təqdimat mərasimini giriş sözü ilə açan Nərimanov rayon MKS-nin direktoru Vəfa Quliyeva qonaqları salamlayaraq onların hər birinə iştirak üçün öz təşəkkürünü bildirib.

Daha sonra çıxış edən tədbirin aparıcısı və kitabxananın əməkdaşı Ülkər Zeynalova şairənin yaradıcılığı və təqdim olunan kitablar haqqında ətraflı məlumat verdi

Təqdimatda çıxış edən “Zəfər yolu” kitabının “Ön söz” müəllifi, Milli Məclisin İctimai birliklər və dini qurumlar, Elm və Təhsil komitələrinin üzvü, ilahiyyat üzrə fəlsəfə doktoru Ceyhun Məmmədov bildirib ki, Müzəffər Ali Baş Komandan İlham Əliyevin rəhbərliyi ilə qəhrəman hərbçilərimiz canları bahasına Vətən torpaqlarını işğaldan azad etdi. Bu amal uğrunda şəhadətə yüksələn qəhrəmanlar hər zaman xalqımızın qəlbində yaşayacaq: “Vətən müharibəsindən sonrakı dövrdə qarşımızda duran mühüm vəzifələrdən biri Qələbəmizi daha da möhkəmləndirmək, eləcə də tarixi Zəfərimizi dünya ictimaiyyətinə çatdırmaqdır. Biz bu gün çalışırıq ki, Azərbaycan həqiqətlərini dünyaya çatdıraraq erməni vəhşiliyini ifşa edək. Bu baxımdan, belə əsərlərin ərsəyə gəlməsi çox önəmlidir. Diqqətçəkən mühüm amil ondan ibarətdir ki, bu kitab təkcə Azərbaycan dilində deyil, həm də ingilis dilindədir. Yəni, bu gün ən mühüm məsələlərdən biri də odur ki, ingilis, fransız, ərəb və digər dillərdə də belə kitablar nəşr olunsun. Hesab edirəm ki, bu, bizim haqq işimizin təbliğinə dünya ictimaiyyətinə çatdırılması növbəti mühüm töhfə olacaq.”

Milli Məclisin Əmək və sosial siyasət komitələrinin üzvü, millət vəkili Vüqar Bayramov qeyd edib ki, bu kitablar Ali Baş Komandan İlham Əliyevin rəhbərliyi ilə rəşadətli Azərbaycan Ordusunun gücü və xalqımızın birliyi sayəsində 44 günlük Vətən müharibəsində qazanılan Qələbəmizdən bəhs edir: “Kitabları oxuyan hər kəs Zəfər tariximizi daha yaxından öyrənəcək, həmçinin onlarda tariximizə, tarixi şəxsiyyətlərimizə, milli-mənəvi dəyərlərimizə və müasir Azərbaycanın inkişaf yoluna diqqət və marağın artırılmasına düzgün yanaşma tərzi formalaşacaq. Bu kitablar gələcək nəslin ölkənin keşməkeşli tarixi keçmişini öyrənməsi, onlarda Vətənə sevgi və vətənpərvərlik tərbiyəsinin möhkəmləndirilməsi istiqamətində böyük rol oynayacaq.”

Çıxış edən İraq Respublikasının Azərbaycandakı səfirliyinin Mədəniyyət şöbəsinin rəisi Hudayfa Ziyad Mahmud tədbirdə iştirakından məmnunluğunu dilə gətirərək, ölkələrimiz arasındakı qardaşlıq münasibətlərindən söz açdı. Vurğuladı ki, Azərbaycan Ordusunun əldə etdiyi tarixi Zəfər dövlət və xalqın mənafeyi baxımından xüsusi əhəmiyyətə malikdir: “Uzun illərdən bəri düşmən tapdağı altında qalmış torpaqların işğaldan azad edilməsi ilk növbədə Azərbaycan xalqının özünə inamını qaytardı, xalqın öz liderinə, onun gücünə etibarını daha da möhkəmləndirdi. Zəfər Günü ilə bağlı yazılan tarixi kitabın ictimaiyyətə təqdim olunması qürurvericidir. Bu kitablar vətənpərvərlik ruhunda yazılmış əsərlərin təcəssümüdür. Belə nəşrlərin olması gələcək üçün də parlaq bir töhfədir. Bu kitabın nəşrə hazırlanmasında əməyi olan hər kəsə təşəkkür edirəm.”

Tədbir zamanı 25 saylı tam orta məktəbin 5 b sinif şagirdi Şəfiqə Kərimli İradə xanımın şeirlərindən səsləndirdi, Milli konservatoriyanın tələbəsi Primov Asim tarda “Alagözlüm” mahnısını ifa etdi və təqdim edilən kitablar haqqında videoçarx nümayiş etdirildi.

Kitabların müəllifi “Peşəyönümlü Təhsilin İnkişafına Dəstək” İctimai Birliyinin sədri, AMEA-nın dissertantı, Azərbaycan Yazıçılar Birliyinin üzvü, Prezident təqaüdçüsü İradə Əlili bildirdi ki, Azərbaycan həqiqətlərinin dünya ictimaiyyətinə çatdırmaq hər birimizin vətəndaşlıq borcudur: “Təbii ki, indi informasiya silahından daha çox istifadə etmək lazımdır. Biz də Azərbaycan vətəndaşı, ziyalı olaraq tarixi gerçəklikləri dünya ictimaiyyətinə tanıtmalı və bu yönümdə zəruri tədbirlər həyata keçirməliyik. Müəllifi olduğum 14 kitabdan 8-i Qarabağla bağlıdır. Fikrimcə, mənim kitablarım az da olsa Azərbaycan həqiqətlərinin dünyaya çatdırılmasına öz töhfəsini verəcək. Kitablarım bir neçə xarici dildə tərcümə olunub. Bu, o deməkdir ki, xarici dövlətlərin vətəndaşları da tariximizin gerçəkliklərini müxtəlif dildə oxuyacaq və biləcəklər.”

Tədbir zamanı 25 saylı tam orta məktəbin 5 b sinif şagirdi Şəfiqə Kərimli İradə xanımın şeirlərindən bir parça səsləndirib, Milli konservatoriyanın tələbəsi Primov Asim tarda “Alagözlüm” mahnısını ifa etdi və təqdim edilən kitablar haqqında videoçarx nümayiş etdirilib.

İ.Əlili tədbirin təşkilinə görə Nərimanov rayon MKS-nin rəhbərliyinə öz minnətdarlığını bildirib və kitabların çapında əməyi keçən hər bir şəxsə təşəkkürünü çatdırıb.

“Laçın Həsrətim” kitabının həmmüəllifi yazıçı Sevinc İbrahimova qeyd edib ki, İradə xanım Qarabağa və qarabağlılara xüsusi dəyər verir. Heç bir maddi-mənəvi dəstək olmadan Qarabağ həqiqətlərindən bəhs edən kitabları öz hesabına kitab nəşr etdirib: “Bütün qarabağlılar, xüsusilə də laçınlılar adından İradə xanıma dərin minnətdarlığımı bildirirəm. İnşallah ki, bundan sonra yazılan bütün kitablarımız Zəfər soraqlı olar. Allah şəhidlərimizə rəhmət eləsin, qazilərimizə cansağlığı versin.”

“Zəfər Yolu” kitabının həmmüəllifi, “Baku News” internet televiziyasının aparıcısı, jurnalist Vüqar Şahinoğlu bildirib ki, kitabın yazılmasında məqsəd 44 günlük Vətən müharibəsindəki qalibiyyətimizi müxtəlif dillərdə bütün dünyaya çatdırmaqdır. Bu kitab Azərbaycan və ingilis dillərinə tərcümə olunub. Türkiyə türkcəsi üzərində tərcümə işləri artıq yekunlaşmaq üzrədir. Gələcəkdə kitabın daha bir neçə xarici dillərə tərcümə edilməsi nəzərdə tutulur.

V.Şahinoğlu diqqətə çatdırıb ki, bu kitabda əsasən cənab Prezident İlham Əliyevin İkinci Qarabağ savaşına qədər və postmüharibə dövründə etdiyi çıxışlar və xalqa müraciətləri öz əksini tapmışdır. Eyni zamanda, Qarabağdan olan ictimaiyyət, media nümayəndələrinin və digər peşə sahiblərinin Qələbə ruhunda yazılmış fikirləri də öz əksini tapıb.

Həmçinin mərasimdə Avropa Azərbaycanlıları Konqresinin baş katibi Arzu Oqtay, Almaniya-Azərbaycan Dostluq Cəmiyyətinin sədri Naibə Hacıyeva, İsveç Krallığında yaşayan Azərbaycan diasporunun tanınmış təmsilçisi və lobbiçisi, Stokholm Bələdiyyəsinin dövlət qulluqçusu Leyla Kiani , Kiyev Azərbaycanlıları Konqresinin Gənclər sektorunun əməkdaşı Möminə Xatun Səttərova, "Vəfa" sosial problemlərin həllinə dəstək İctimai Birliyinin sədri Fatimə Hacıyeva, Həcər Abbasqızı, Könül Məmmədzadə çıxış edərək kitabların mövzu baxımından böyük əhəmiyyət daşıdığını vurğulayıblar.
Hərbçilərə işgəncə verən bu gizir AXTARILIRBaş Prokurorluq “Tərtər işi” ilə bağlı yeni məlumat yayıb.

Bildirilib ki, Müdafiə Nazirliyinin Tərtər, Ağdam, Beyləqan rayonları istiqamətində yerləşən hərbi hissələrində xidmət etmiş bəzi hərbi qulluqçuların 2017-ci ildəki sorğulama prosesində fiziki və psixi işgəncəyə, qeyri-insani və ləyaqəti alçaldan rəftara məruz qoyulması ilə əlaqədar cinayət işləri üzrə icraat təzələnib.

Baş prokurorun birinci müavini tərəfindən prosessual rəhbərliyi həyata keçirilən istintaq qrupu tərəfindən 16 dekabr 2021-ci il tarixdən bütün istiqamətlər üzrə intensiv istintaq hərəkətləri aparılmaqdadır.

Rəsmi məlumatlara görə, 2017-ci ilin may-iyun aylarında dövlətə xəyanət faktlarının araşdırılması ilə əlaqədar işgəncəyə, fiziki və ya psixi təsirə, digər qanunsuzluqlara məruz qalan 397 nəfər zərərçəkmiş şəxs kimi müəyyən edilib.

Hərbi qulluqçulara işgəncə verməkdə təqsirləndirlən 7 nəfər Cinayət Məcəlləsinin 145.3 (qanunsuz azadlıqdan məhrum etmə), 293.2 (işgəncə, işgəncə hesab olunmayan qəddar, qeyri-insani, yaxud ləyaqəti alçaldan rəftar və ya cəza), 341.2.2 (vəzifə səlahiyyətlərini aşma), 341.2.3 və 128-ci (qəsdən sağlamlığa yüngül zərər vurma) maddələri ilə təqsirləndirilən şəxs qismində cəlb edilərək, barələrində həbs qətimkan tədbiri seçilib.

Qanunsuz həbs edilən hərbçilərə işgəncə verməkdə təqsirləndirilən Əzizov Polad Seyfəddin oğlu isə istintaqdan gizləndiyi üçün barəsində axtarış elan edilib.

Gizir Əzizov Polad Seyfəddin oğlu 1982-ci ildə Qazaxın Qazaxbəyli kəndində anadan olub.

2000-ci ildə hərbi xidmətə yollanıb, əsgərlikdə Xüsusi Təyinatlı Qüvvələrin kursuna yazılıb, kursu keçərək orda xidmətə başlıyıb.

2015-ci ilin oktyabrında Xüsusi Təyinatlı Qüvvələrdən və Ordu sıralarından tərxis olunub.

2016-cı il aprel döyüşlərindəndən sonra Tərtər əlahiddə kəşfiyyat taborunda xüsusi təyinatlı bölükdə yenidən xidmətə başlayıb.

2017-ci ilin may-iyun aylarında dövlətə xəyanətlə əlaqədar əsassız olaraq saxlanılan hərbi qulluqçulara dəhşətli işgəncələr verməkdə ad çıxarıb.

Hazırda axtarılır.
Ermənistan parlamentində Türkiyə ilə bağlı dinləmə keçiriləcəkErmənistan parlamentində Ermənistan-Türkiyə münasibətləri mövzusunda dinləmələr keçiriləcək.

Bu barədə Ermənistanın qanunverici orqanının rəsmi saytında məlumat yerləşdirilib.

“Aprelin 21-də saat 11:00-da “Hayastan” fraksiyasının təşəbbüsü ilə parlament “Ermənistan və Türkiyə arasında münasibətlərin konseptual müddəaları haqqında” bəyanat layihəsinə dair dinləmələr keçirəcək”, - məlumatda deyilir.

Xatırladaq ki, ötən il İrəvan və Ankara danışıqlar üçün xüsusi nümayəndələr təyin ediblər. Ermənistan və Türkiyənin xüsusi nümayəndələri Ruben Rubinyan və Serdar Kılıçın birinci görüşü yanvarın 14-də Moskvada, ikinci görüşü isə fevralın 24-də Vyanada baş tutub. Diplomatlar təsdiqləyiblər ki, danışıqların yekun məqsədi iki ölkə arasında münasibətlərin tam normallaşmasıdır.

Ermənistanla Türkiyə arasında diplomatik əlaqələr yoxdur, sərhəd 1993-cü ildən Ankaranın təşəbbüsü ilə bağlıdır.
Bu şəhərlərdə döyüşlər gedir, ruslar itki verirLuqansk vilayətinin Rubejnoe və Popasnaya şəhərlərində hazırda mövqe döyüşləri davam edir, lakin rus işğalçıları heç bir uğur əldə edə bilmirlər.

Bunu Luqansk vilayət administrasiyasının rəhbəri Sergey Qayday deyib.

“Onlar hər tərəfdən hücum edirlər, aviasiya artıq bizim şəhərlərdə, bütün müdafiə xətti boyunca əvvəlkilərdən dəfələrlə artıq işləyir. Doğrudan da, haqqında danışdığımız və uzun müddətdir gözlədiyimiz hücumun başladığını söyləmək olar”, - Qayday bildirib.

Onun sözlərinə görə, rus ordusu döyüşlərdə canlı qüvvə və hərbi texnika itirir:

“Hərbçilərimiz və PUA-lar vurur. Luqansk və Xarkov vilayətlərində təyyarələr vurulur. Müdafiəni saxlayırıq”