Ərdoğdu Bakıdan üzr istəməlidir - Hulusi Kılıç
Cümhuriyyət Xalq Partiyasının İstanbul millət vəkili Aykut Ərdoğdunun ittihamlarını ən sərt şəkildə pisləyirəm. Bu ittihamların heç biri doğru deyil, yalandır, məqsəd isə Türkiyə-Azərbaycan münasibətlərinə kölgə salmaqdır. TANAP-la bağlı iddialar da yalandır.
Bu sözləri Axar.az-a açıqlamasında Türkiyənin ölkəmizdəki keçmiş səfiri Hulusi Kılıç deyib. Keçmiş səfir rəqəmlərlə məsələni izah edib:
“TANAP-ın gerçəkləşməsi üçün 6,3 milyard dollar sərmayə yatırılıb, buradan Türkiyə podratçıları 4,5 milyard dollar gəlir əldə edib və layihədə ölkəmiz 30%-lik paya sahibdir. Ayrıca TANAP-la bağlı Azərbaycanın “Şahdəniz” yatağındakı qaz payından bir hissəsini Türkiyəyə verməsi nəticəsində ölkəmizin payı 9%-dən 19%-dək artıb. Bu layihə çərçivəsində 15 min insan hazırda işləyir.
Digər tərəfdən, 2008-ci ildə “Petkim” şirkətinin səhmlərinin 51%-i açıq şəkildə tender yolu ilə 2 milyard 40 milyon dollara Azərbaycana satılıb. Azərbaycan daha sonra sözügedən şirkətə əlavə sərmayə qoyub. Bu çərçivədə Azərbaycanın sərmayələri ilə Türkiyə üçün böyük əhəmiyyətə malik olan STAR neft emalı zavodu və “Petkim” neft-kimya kompleksi açılıb. Ümumilikdə bu günədək Azərbaycan Türkiyəyə 15 milyard dollardan çox, Türkiyə isə Azərbaycana 12-13 milyard civarında sərmayə qoyub. Görülən bu qədər işləri heçə saymaq, yalan danışmaq olmaz. Aykut Ərdoğdu Azərbaycan Xarici İşlər Nazirliyinin ona cavabını çox yaxşı oxumalıdır. Həm özü, həm də mənsub olduğu partiya Azərbaycandan üzr istəməlidir”.
Hulusi Kılıç Ərdoğdunun onun haqqında olan iddialarına cavab verərək açıqlamanın tarixinə diqqəti çəkib:
“Dünən bir müzakirə proqramında bu gün sizə sadaladığım rəqəmləri eyni ilə hər kəsin diqqətinə çatdırdım. Bu gün isə Aykut Ərdoğdu mənim haqqımda “SOCAR-ın İdarə Heyətinin üzvü olan səfir” sözlərini Tvitter səhifəsində yazıb. Mən on il bundan əvvəl “Petkim”in İdarə Heyətinin üzvü olmuşam. “Petkim” isə Azərbaycanın da payının olduğu Türkiyə şirkətidir. Ayrıca həmin vaxtı mən artıq səfir deyildim.
Bir də açıqlamanın zamanına diqqətinizi çəkmək istəyirəm. Aykut Ərdoğdu Şuşa Bəyannaməsinin TBMM-də təsdiq edildiyi və cənab Ərdoğanın Ukraynaya tarixi səfər etdiyi gün sözügedən açıqlamanı verdi. Səbəb, məqsəd və hədəf bəllidir. Ancaq hər kəs bilməlidir ki, heç kim belə açıqlamalarla bizim qardaşlığımıza zərbə vura bilməz. Bizim qardaşlığımız belə maneələri və daha böyük zərbələri dəf edə biləcək qədər dərin kökə və gücə sahibdir”.
